ອົງການເນໂຕ້ ກ່າວໃນວັນເສົາ ມື້ນີ້ວ່າ ນຶ່ງໃນການ ປະຕິບັດງານຂອງຕົນ ຢູ່ໃນອັຟການິສຖານ ໄດ້ຍັງຜົນໃຫ້ ພົນລະເຮືອນ 2 ຄົນ ເສຍຊີວິດ ແລະອີກຄົນນຶ່ງ ໄດ້ຮັບບາດເຈັບ.
ທະຫານ ຂອງອົງການເນໂຕ້ ໄດ້ຄົ້ນພົບ ແມ່ຍິງຄົນນຶ່ງ ເສຍຊີວິດ ແລະຜູ້ຊາຍ 2 ຄົນ ບາດເຈັບ ຊຶ່ງພວກກ່ຽວ ໄດ້ຕົກຄ້າງ ຢູ່ລະຫວ່າງກາງ ການຍິງຕໍ່ສູ້ກັນ ເພື່ອເຂົ້າຢຶດເອົາ ເຮືອນຫຼັງນຶ່ງ ທີ່ບ້ານ KALACHEN ໃນເຂດເມືອງ ການດາຮາ ບ່ອນທີ່ ທະຫານພັນທະມິດເນໂຕ້ ຊອກຄົ້ນຫາໂຕຜູ້ບັນຊາການ ຂອງກຸ່ມທາລີບານ. ນຶ່ງໃນພວກຜູ້ຊາຍ 2 ຄົນ ທີ່ໄດ້ຮັບບາດເຈັບ ເສຍຊີວິດ ໃນເວລາຕໍ່ມາ.
ກຳລັງຂອງ ອົງການເນໂຕ້ ຈັບຜູ້ບັນຊາການ ຂອງກຸ່ມທາລີບານໄດ້ ແລະສັງຫານ ພວກກະບົດຄົນນຶ່ງ ຂະນະທີ່ ອີກຄົນນຶ່ງ ໄດ້ຮັບບາດເຈັບ.
ອົງການເນໂຕ້ ກ່າວວ່າ ກຳລັງປະຕິບັດງານຮ່ວມ ພ້ອມໆກັບ ຜູ້ອະວຸໂສ ໃນເຂດທ້ອງຖິ່ນ ແລະ ເຈົ້າໜ້າທີ່ ລັດຖະບານ ພວມທົບທວນເບິ່ງ ສະພາບການ ຫ້ອມລ້ອມ ການເສຍຊີວິດ ຂອງພົນລະເຮືອນ ໃນຄັ້ງນີ້.