ບັນດາເຈົ້າໜ້າທີ່ອັຟການິສຖານກ່າວວ່າ ພວກຫົວຮຸນແຮງລັດອິສລາມໄດ້ສັງຫານກຳລັງຮັກສາຄວາມປອດໄພ ຢ່າງໜ້ອຍຫົກຄົນ ຮວມທັງຜູ້ບັນຊາການຕຳຫລວດປະຈຳເຂດ ໃນການໂຈມຕີຕອນເຊົ້າມືດ ໃນພາກຕາເວັນອອກຂອງອັຟການິສຖານ.
ການໂຈມຕີກອງບັນຊາການຕຳຫລວດ ທີ່ເມືອງ Haska Mena ໃນແຂວງ Nangarhar ທີ່ມີຊາຍແດນຕິດກັບປາກິສຖານ ໄດ້ພາໃຫ້ມີການສູ້ລົບກັນຢ່າງໜັກເປັນເວລາຫລາຍຊົ່ວໂມງ ທີ່ເຮັດໃຫ້ພວກນັກລົບຂອງກຸ່ມລັດອິສລາມຫລື Daesh ຢ່າງໜ້ອຍ 15 ຄົນເສຍຊີວິດແລະເຈັດຄົນໄດ້ຮັບບາດເຈັບ ອີງຕາມໂຄສົກຂອງລັດຖະບານໃນແຂວງດັ່ງກ່າວ ທີ່ໄດ້ໃຊ້ຊື່ຫຍໍ້ເປັນພາສາອາຮັບຂອງ ກຸ່ມລັດອິສລາມ.
ການສົ່ງກຳລັງກອງໜູນໄປເຖິງທັນເວລາ ໄດ້ຊ່ວຍໃຫ້ກຳລັງອັຟການິສຖານເອົາຊະນະພວກບຸກໂຈມຕີ ທ່ານ Attaullah Khogyani ໄດ້ກ່າວຕໍ່ວີໂອເອ ໂດຍເວົ້າວ່າ ເຖິງແມ່ນມີເຈົ້າໜ້າທີ່ຕຳຫລວດຢ່າງໜ້ອຍຫົກຄົນໄດ້ຮັບບາດເຈັບ.
ສື່ມວນຊົນ ແລະປະຊາຊົນໃນເຂດທ້ອງຖິ່ນ ເຖິງຢ່າງໃດກໍດີ ໄດ້ລາບງານວ່າ ເຈົ້າໜ້າທີ່ຮັກສາຄວາມປອດໄພຢ່າງໜ້ອຍ 11 ຄົນໄດ້ຮັບບາດເຈັບ ແລະອີກຫົກຄົນຂອງຈຳນວນດັ່ງກ່າວແມ່ນມີ “ອາການສາຫັດ.” ພວກຜູ້ໂຈມຕີທີ່ຕິດອາ ວຸດໜັກ ມີລາຍງານວ່າ ສາມາດເລັດລອດເຂົ້າໄປໃນກອງບັນຊາການຕຳຫຼວດ ໃນການໂຈມຕີຢ່າງບໍ່ຄາດຝັນ ກ່ອນຈະຖືກຂັບໄລ່ໃຫ້ແຕກຖອຍໄປ.
ສ່ວນທີ່ເມືອງ Rodat ຊຶ່ງຕັ້ງຢູ່ໃກ້ໆນັ້ນ ລະເບີດທີ່ເຮັດເອົາເອງຊຶ່ງຖືກວາງໄວ້ຢູ່ໃນວັດອິສລາມແຫ່ງນຶ່ງໄດ້ແຕກຂຶ້ນ ໃນລະຫວ່າງພິທີສູດມົນ ໃນວັນສຸກວານນີ້ ເຮັດໃຫ້ຜູ້ໄຫວ້ພະເສຍຊີວິດຢ່າງໜ້ອຍສີ່ຄົນ ແລະໄດ້ຮັບບາດເຈັບຫລາຍກວ່າ 70 ຄົນ. ຜູ້ນຳພາໃນການສູດມົນ ຮວມຢູ່ໃນຈຳນວນຜູ້ເສຍຊີວິດ.
ສະຫະປະຊາຊາດໄດ້ປະນາມການແນເປົ້າໝາຍໃສ່ພົນລະເຮືອນວ່າ ເປັນການກໍ່ອາຊະຍາກຳສົງຄາມ ແລະທວງໃຫ້ນຳເອົາໂຕພວກຮັບຜິດຊອບມາລົງໂທດ.
ກຸ່ມຫົວຮຸນແຮງທາລິບານ ໄດ້ປະຕິເສດວ່າ ຕົນບໍ່ໄດ້ຢູ່ເບື້ອງຫລັງຂອງການວາງລະເບີດຄັ້ງນີ້.