ຕໍາຫລວດອັຟການິສຖານກ່າວວ່າ ປະຊາຊົນ 9 ຄົນເສຍຊີວິດຍ້ອນການວາງລະເບີດ
ສະລະຊີບໃນລົດຄັນນຶ່ງ ຢູ່ນອກສະໜາມບິນແຫ່ງນຶ່ງທີ່ໃຊ້ສໍາລັບພວກຖ້ຽວບິນພົນລະ
ເຮືອນແລະທະຫານ ໃນພາກຕາເວັນອອກຂອງອັຟການິສຖານ.
ອີກຫລາຍຄົນໄດ້ຮັບບາດເຈັບໃນການວາງລະເບີດດັ່ງກ່າວໃນເຊົ້າວັນຈັນມື້ນີ້ ຢູ່ທາງ
ເຂົ້າສະໜາມບິນເມືອງ Jalalabad ນັ້ນ.
ບັນດາເຈົ້າໜ້າທີ່ແຂວງກ່າວວ່າ ປາກົດວ່າ ພວກທີ່ເສຍຊີວິດແລະບາດເຈັບສ່ວນຫລາຍ
ແມ່ນພວກພົນລະເຮືອນ. ມີຄົນຍາມສະໜາມບິນ 2 ຄົນແລະທະຫານຄົນນຶ່ງ ຮວມຢູ່
ໃນພວກທີ່ເສຍຊີວິດ.
ກຸ່ມຕາລີບັນໄດ້ອ້າງເອົາຄວາມຮັບຜິດຊອບໃນການໂຈມຕີຄັ້ງນີ້ ທີ່ເກີດຂຶ້ນໃນເວລາບໍ່
ເທົ່າໃດມື້ ຫລັງຈາກເກີດຄວາມວຸ້ນວາຍຂຶ້ນໃນທົ່ວອັຟການິສຖານ ທີ່ເປັນການຕອບໂຕ້
ຕໍ່ການທີ່ທະຫານເນໂຕ້ໄດ້ຈູດເຜົາພະຄໍາພີກູຣານທີ່ຖານທັບອາກາດ Bagram ຊຶ່ງນັບ
ແຕ່ນັ້ນມາ ກໍໄດ້ມີຫລາຍກວ່າ 30 ຄົນເສຍຊີວິດ ຮວມທັງທະຫານສະຫະລັດ 4 ຄົນໃນ
ການ ປະທ້ວງຫລາຍໆບັ້ນຕິດຕໍ່ກັນ.
ໃນວັນອາທິດວານນີ້ ທາງການອັຟການິສຖານໄດ້ເລີ້ມຊອກຄົ້ນຫາເຈົ້າໜ້າທີ່ສືບລັບອັຟ
ການິສຖານຄົນນຶ່ງຢ່າງຂຸ້ນຂ້ຽວ ທີ່ທາງການສົງໄສວ່າ ເປັນຜູ້ສັງຫານນາຍທະຫານສະ
ຫະລັດ 2 ຄົນໃນວັນເສົາຜ່ານມາ ທີ່ ກະຊວງພາຍໃນຂອງອັຟການິສຖານ ໃນກຸງຄາບູລ
ນັ້ນ.
ໄດ້ມີການພົບເຫັນສົບຂອງນາຍທະຫານສອງຄົນນີ້ໃນຫ້ອງການແຫ່ງນຶ່ງທີ່ລ໊ອກປະຕູໄວ້
ຊຶ່ງບໍ່ມີໃຜເຂົ້າໄປໄດ້ ນອກຈາກຄົນທີ່ຮູ້ຈັກນໍາເບີກະແຈລ໊ອກເທົ່ານັ້ນ.
ປະທານາທິບໍດີ Hamid Karzai ແຫ່ງອັຟການິສຖານໄດ້ກ່າວເຖິງເລື້ອງການຍິງກັນຕາຍ
ນີ້ໃນວັນອາທິດວານນີ້ໃນກຸງຄາບູລ ແລະຮຽກ ຮ້ອງໃຫ້ປະຊາຊົນຢູ່ໃນຄວາມສະຫງົບ.
ທ່ານKarzai ກ່າວວ່າທ່ານມີຄວາມເສຍໃຈນໍາພວກທີ່ເສຍຊີວິດໄປນັ້ນ ແລະໄດ້ສົ່ງຄວາມ
ໂສກເສົ້າສະຫລົດໃຈໄປຍັງພວກຄອບຄົວຂອງພວກທີ່ເສຍຊີວິດ.
ໃນວັອາທິດວານນີ້ ຜູ້ປະທ້ວງຄົນນຶ່ງເສຍຊີວິດ ແລະທະຫານອາເມຣິກັນ 7 ຄົນໄດ້ຮັບ
ບາດເຈັບຈາກການໂຈມຕີດ້ວຍລະເບີດມືທີ່ຖານທັບແຫ່ງນຶ່ງຂອງສະຫະລັດໃນແຂວງ
Kunduz ໃນພາກເໜືອຂອງອັຟການິສຖານ.