ກຸ່ມສັງເກດການສິດທິມະນຸດຊີເຣຍທີ່ຕັ້ງຢູ່ອັງກິດ ກ່າວວ່າ ຝ່າຍ
ແນວໂຮມນາໆຊາດ ທີ່ນຳພາໂດຍສະຫະລັດ ໄດ້ໂຈມຕີເມືອງນຶ່ງ
ທີ່ສຳຄັນ ຢູ່ເລາະຕາມຊາຍແດນ ຊີເຣຍ-ເທີກີ ບ່ອນທີ່ກຳລັງຂອງ
ຊາວເຄີດພວມ ຕໍ່ສູ້ຕ້ານຢັນ ພວກນັກລົບຂອງກຸ່ມອິສລາມ.
ກຸ່ມ Syrian Observatory ເວົ້າວ່າ ເຮືອບິນຂອງຝ່າຍແນວໂຮມ
ໄດ້ທຳການໂຈມຕີ ຢ່າງນ້ອຍ 5 ຖ້ຽວ ໃນວັນພຸດມື້ນີ້ ຢູ່ທາງກ້ຳໃຕ້
ຂອງ ເມືອງ Kobani ທີ່ມີອີກຊື່ນຶ່ງວ່າ Ayn Arab. ການປະທະກັນ
ຢູ່ໃນເຂດນັ້ນ ໃນໄລຍະບໍ່ເທົ່າໃດອາທິດຜ່ານມານີ້ ໄດ້ເຮັດໃຫ້
ປະຊາຊົນ ຫລາຍກ່ວາ 160.000 ຄົນ ພາກັນອົບພະຍົບໜີໄປສູ່ບ່ອນປອດໄພ.
ອົບພະຍົບ ຊີເຣຍ ສ່ຽງຊີວິດ ຫຼົບໜີ
ຢູ່ໃນປະເທດເພື່ອນບ້ານອີຣັກນັ້ນ ເຮືອບິນລົບຂອງອັງກິດ ກໍໄດ້ທຳການໂຈມຕີເປັນມື້ທີສອງ ຕໍ່ກຸ່ມລັດອິສລາມ. ກະຊວງປ້ອງກັນປະເທດ ອັງກິດກ່າວວ່າ ເຮືອບິນອັງກິດຂຶ້ນບິນປະຕິບັດງານ ໃຫ້ການສະໜັບ ສະໜຸນແກ່ກອງກຳລັງຂອງອີຣັກ ແລະໄດ້ຍິງລູກສອນໄຟ ໃສ່ລົດຂອງພວກຫົວຮຸນແຮງ ຢູ່ທາງກ້ຳຕາເວັນຕົກຂອງແບກແດດ.
ກຳລັງ ຊາວເຄີດ ບຸກ ລັດອິສລາມ
ໃນຂະນະດຽວກັນ ທີ່ອອສເຕຣເລຍ ນາຍົກລັດຖະມົນຕີ Tony Abbott ກ່າວໃນວັນພຸດມື້ນີ້ວ່າ ເຮືອບິນທະຫານຂອງປະເທດຂອງທ່ານຈະຂຶ້ນບິນສະໜັບສະໜຸນ ການປະຕິບັດງານຂອງຝ່າຍແນວໂຮມ ທີ່ນຳພາໂດຍສະຫະລັດນັ້ນ ແຕ່ຈະບໍ່ທຳການໂຈມຕີໃດໆຂອງຕົນເອງເທື່ອ.