ນາຍົກລັດຖະມົນຕີອອສເຕຣເລຍ ທ່ານ Tony Abbott ໄດ້
ບັນລະຍາຍ ການຈັບໂຕປະກັນ ຢູ່ທີ່ຮ້ານອາຫານໃນນະຄອນ
ຊິດນີ ວ່າເປັນ “ຄວາມໄຝ່ຝັນແບບຈິດໃຈບໍ່ສົມປະກອບ
ຂອງບຸກຄົນຜູ້ມີແຕ່ຄວາມວຸ້ນວາຍ.”
ນາຍົກລັດຖະມົນຕີ Abbott ພ້ອມກັນກັບຊາວອອສເຕຣເລຍ
ໄດ້ພາກັນ ຮ່ວມໄວ້ອາໄລ ແກ່ບັນດາຜູ້ເຄາະຮ້າຍ ໃນການຈັບ
ໂຕປະກັນຄັ້ງນີ້ ຊຶ່ງສິ້ນສຸດລົງ ໃນເວລາຕຳຫລວດ ປະຕິບັດ
ການບຸກໂຈມຕີ ໃນຕອນເຊົ້າໆ ເພື່ອຊ່ວຍໃຫ້ບັນດາໂຕປະກັນ
ໃຫ້ເປັນອິດສະລະ. ໂຕປະກັນສອງຄົນ ຮວມທັງມືປືນ ເສຍຊີວິດ
ໃນການຍິງຕອບໂຕ້ກັນ.
ຫຼັງຈາກທີ່ໄດ້ວາງດອກໄມ້ຕ່າງໆ ຢູ່ສະຖານທີ່ເກີດເຫດເພື່ອໄວ້ອາໄລ ແລ້ວ ທ່ານ Abbott
ໄດ້ບັນລະຍາຍ ເຖິງຜູ້ຕ້ອງສົງໄສທີ່ເກີດຢູ່ປະເທດອີຣ່ານ ວ່າເປັນຄົນທີ່ “ວຸ້ນວາຍຢ່າງ
ເລິກເຊີ່ງ” ແລະ ກ່າວຕໍ່ໄປວ່າ ຜູ້ກ່ຽວມີປະຫວັດອາຊະຍາກຳອັນຍາວນານ ພ້ອມກັບ
ສະພາບຈິດທີ່ບໍ່ທຸ່ນທ່ຽງ ແລະ ພົວພັນກັບພວກຫົວຮຸນແຮງຈັດ.
ຜູ້ຕ້ອງສົງໄສ ທີ່ຖືກລະບຸໂຕ ວ່າແມ່ນ ທ້າວ Man Haron Monis ໄວ 50 ປີ ຊຶ່ງບັນດາ
ເຈົ້າໜ້າທີ່ອອສເຕຣເລຍຮູ້ຈັກຜູ້ກ່ຽວດີ ແຕ່ທ່ານ Abbott ກ່າວວ່າ ຜູ້ກ່ຽວບໍ່ປາກົດວ່າ
ເປັນຜູ້ກໍ່ການຮ້າຍ ທີ່ຢູ່ໃນບັນຊີ ຕິດຕາມເບິ່ງ.
ຜູ້ກ່ຽວໄດ້ອ້າງຕົນວ່າເປັນນັກສອນສາສະໜາມຸສລິມ ແມ່ນໄດ້ຖືກປ່ອຍ ດ້ວຍການປະກັນ
ໂຕ ຫຼັງຈາກຖືກກ່າວຟ້ອງ ໃນຄະດີທີ່ກ່ຽວພັນເຖິງ ການຄາດຕະກຳອະດີດພັນລະຍາ
ຂອງຜູ້ກ່ຽວໃນປີ 2013. ຜູ້ກ່ຽວຍັງໄດ້ຖືກ ສານຕັດສິນວ່າ ມີຄວາມຜິດໃນຂໍ້ຫາ ສົ່ງຈົດ
ໝາຍຂົ່ມຂູ່ ໄປໃຫ້ບັນດາພໍ່ແມ່ ຂອງພວກທະຫານອອສເຕຣເລຍ ທີ່ເສຍຊີວິດຢູ່ໃນ
ອັຟການິສຖານ.
ໃນລະຫວ່າງການປະເຊີນໜ້າກັນນັ້ນ ທ້າວ Monis ໄດ້ບັງຄັບໃຫ້ບັນດາໂຕປະກັນ ຍົກທຸງ
ທີ່ມີຂໍ້ຄວາມຂຽນເປັນພາສາອິສລາມຂອງສາ ສະໜາອິສລາມຂຶ້ນ. ໃນຄຳຖະແຫລງຕໍ່ສື່
ມວນຊົນນັ້ນ ທ້າວ Monis ກ່າວວ່າ ລາວສະໜັບສະໜຸນກຸ່ມພວກຫົວຮຸນແຮງລັດອິສລາມ.
ບັນດາເຈົ້າໜ້າທີ່ອອສເຕຣເລຍ ໄດ້ກ່າວເນັ້ນວ່າ ທ້າວ Moni ບໍ່ປາກົດວ່າ ພົວພັນກັບກຸ່ມ
ກໍ່ການຮ້າຍໃດໆເລີຍ. ຕຳຫລວດລັດ New South Wales ເອີ້ນການໂຈມຕີຄັ້ງນີ້ວ່າເປັນ
“ເຫດການທີ່ໂດດດ່ຽວ.”
Your browser doesn’t support HTML5
AUSTRALIA HOSTAGES CNPK