ໝີຄົວລ້າຫລົງປ່າໂຕນຶ່ງຫລຸດເຂົ້າໄປໃນສະຖານີລົດໄຟໃນນະຄອນຊິດນີ ປະເທດອອສເຕຣເລຍ ເຮັດໃຫ້ເຈົ້າໜ້າທີ່ຕຳຫຼວດຕ້ອງພາກັນອອກໄປໄລ່ຈັບມັນ ຈົນສ້າງຄວາມແປກໃຈໃຫ້ກັບພວກຜູ້ໂດຍສານທີ່ໃຊ້ບໍລິການໄປທົ່ວສະຖານີ ຕາມລາຍງານຂອງອົງການຂ່າວຣອຍເຕີສ໌.
ໃນວັນອັງຄານວານນີ້ ຣອຍເຕີສ໌ ໄດ້ເຜີຍແຜ່ຄລິບວີດີໂອຈາກໜ່ວຍງານຄົມມະນາຄົມ ລັດນິວເຊົ້າເວລ ຂອງອອສເຕຣເລຍ ທີ່ສະແດງໃຫ້ເຫັນພາບຂອງໝີຄົວລ້າໂຕນຶ່ງຄ່ອຍຍ່າງຫຼິ້ນໄປທົ່ວສະຖານີລົດໄຟ ຄາຊູລາ ເມື່ອວັນສຸກທີ່ຜ່ານມາ.
ສະຖານີລົດໄຟດັ່ງກ່າວ ຢູ່ຫ່າງຈາກເຂດສູນກາງທຸລະກິດຂອງນະຄອນຊິດນີ ໄປທາງຕາເວັນຕົກສຽງໃຕ້ເປັນໄລຍະທາງຍາວປະມານ 34 ກິໂລແມັດ.
ໃນຄລິບວີດີໂອນີ້ ຜູ້ຊົມຈະເຫັນພາໝີຄົວລ້າໂຕນ້ອຍພວກຍ່າງໄປເບິ່ງຈຸດຕ່າງໆຂອງສະຖານີ ລວມທັງ ລິຟສຳລັບຂຶ້ນລົງ ກ່ອນທີ່ມັນຈະເລືອກຍ່າງລົງຂັ້ນໄດແທນ.
ແລະຍ້ອນການອອກສຳຫຼວດສະຖານີຂອງໝີຄົວລ້າໂຕນີ້ ລົດໄຟທີ່ແລ່ນຜ່ານຕ້ອງໄດ້ແລ່ນຊ້າລົງເພື່ອຄວາມປອດໄພຂອງສັດສະເພາະທ້ອງຖິ່ນທີ່ມີຜູ້ຊື່ນຊົມຫຼາຍທີ່ສຸດຂອງອອສເຕຣເລຍ ເຊິ່ງຍ່າງເຂົ້າມາໃກ້ຂອບບໍລິເວນຂຶ້ນລົດໄຟ ຈົນກາຍເປັນຄວາມສ່ຽງວ່າ ຈະຕົກລົງໄປໃນລາງລົດໄຟ.
ສະຖານະການດັ່ງກ່າວ ເຮັດໃຫ້ໜ່ວຍງານຄົມມະນາຄົມລັດນິວເຊົ້າເວລ ອອກຖະແຫລງການທີ່ມີເນື້ອຄວາມວ່າ “ຜູ້ໂດຍສານທຸກທ່ານ ທັງຜູ້ໃຫຍ່ແລະເດັກນ້ອຍ ຂໍໃຫ້ຢືນຢູ່ຫລັງເສັ້ນສີເຫຼືອງຕະຫຼອດເວລາ.”
ແລະເມື່ອເຈົ້າໜ້າທີ່ຕຳຫຼວດທີ່ຖືກສົ່ງມາໄລ່ໝີໂຕນ້ອຍໃຫ້ອອກໄປຈາກບໍລິເວນລາງລົດໄຟ ແຂກບໍ່ໄດ້ຮັບເຊີນໂຕນີ້ ຈຶ່ງໂດດຂ້າມຮົ້ວສະຖານີ ແລ້ວແລ່ນເຂົ້າໄປໃນພື້ນທີ່ປ່າທີ່ຢູ່ຕິດກັນນັ້ນ.
ທັງນີ້ ໝີຄົວລ້າຖືກຂຶ້ນຊື່ໄວ້ວ່າ ເປັນສັດທີ່ມີຄວາມສ່ຽງທີ່ຈະສູນພັນໃນລັດນິວເຊົ້າເວລ ລວມທັງບາງພື້ນທີ່ໃນອອສເຕຣເລຍນຳດ້ວຍ.