ຂ່າວຄືບໜ້າ ກ່ຽວກັບແຜນການປະຕິຮູບລະບົບຮັກສາສຸຂະພາບຂອງສະຫະຣັດ:ສະພາຕ່ຳສະຫະຣັດ
ກຳນົດຈະລົງມະຕິຄັ້ງປວັດສາດກັນ ໃນວັນອາທິດມື້ນີ້ ກ່ຽວກັບຮ່າງກົດໝາຍທີ່ຈະສະໜອງປະກັນໄພສຸຂະພາບໃຫ້ແກ່ ຊາວອາເມຣິກັນຈຳນວນຫລາຍກວ່າ 30 ລ້ານຄົນທ່ີທຸກຍາກ ບໍ່ມີປະ ກັນໄພສຸຂະພາບນັ້ນ. ບັນດາຜູ້ນຳພັກ Democrat ໃນສະພາພາກັນຫາສຽງສະໜັບສະໜຸນຢ່າງຂຸ້ນຂ້ຽວ ໃນວັນເສົາວານນີ້ ເພື່ອໃຫ້ໝັ້ນໃຈວ່າຈະໄດ້ ຢ່າງນ້ອຍ 216 ສຽງ ອັນເປັນສຽງສ່ວນຫລາຍໃນສະພາຕ່ຳນັ້ນ ເພື່ອຮັບຜ່ານຮ່າງກົດໝາຍດັ່ງກ່າວ ໃນຂະນະທ່ີພວກປະທ້ວງຫລາຍຮ້ອຍຄົນພາກັນໂຮມ ຊຸມນຸມປະທ້ວງຄັດຄ້ານ ຢູ່ນອກຕຶກສະພາ. ປະທານາທິບໍດີບາຣັກໂອບາມາໄດ້ໄປຍັງຕຶກຣັຖສະພາເພື່ອທຳການ ຮຽກຮ້ອງໃຫ້ພວກສະມາຊິກພັກເດໂມແກຣັດ ຮັບຜ່ານຮ່າງກົດໝາຍ ປະຕິຮູບແຜນການຮັກສາສຸຂະພາບຢ່າງຮອບດ້ານ ສະບັບນີ້. ພວກສະມາຊິກພັກ Republican ຍັງພາກັນຄັດຄ້ານຢ່າງແຂງແຮງຢູ່ ຕໍ່ມາ. ທ່ານ John Boehner ຜູ້ນຳພັກ Republican ໃນສະພາຕ່ຳ ກ່າວວ່າຮ່າງຍັດຕິສະບັບນີ້ ຈະໝາຍວ່າປະຊາຊົນຈະໄດ້ເສັຍພາສີ ລາຍໄດ້ສູງຂຶ້ນ ແລະຣັຖບານຈະເຂົ້າແຊກແຊງຫລາຍໂພດໃນການ ຕັດສິນໃຈໃດໆ ກ່ຽວກັບການຮັກສາສຸຂະພາບນັ້ນ. ສະຫະຣັດອາເມຣິກາເປັນປະເທດດຽວເທົ່ານັ້ນໃນບັນດາປະເທດທ່ີ ພັດທະນາແລ້ວ ທ່ີບໍ່ໃຫ້ການບໍລິການດ້ານການຮັກສາສຸຂະພາບຟຣີ ຢ່າງຮອບດ້ານໃຫ້ແກ່ປະຊາຊົນຂອງຕົນ.
ອີສຣາແອນແລະປາເລສໄຕນ໌: ທ່ານພັນຄີມູນ ເລຂາທິການໃຫຍ່ອົງການສະຫະປະຊາຊາດໄດ້ເດີນ ທາງໄປເຖິງເຂດກາຊາແລ້ວ ໃນມື້ທີ່ສອງຂອງການຢ້ຽມຢາມພາກ ຕາເວັນອອກກາງ
ບ່ອນທີ່ທ່ານໄດ້ຮຽກຮ້ອງໃຫ້ອີສຣາແອລ ແລະປາ ເເລສຕາຍ ຍຸຕິວິທີການຕ່າງໆທີ່ສ້າງຄວາມອ່ອນແອໃຫ້ແກ່ຂັ້ນຕອນສ້າງສັນຕິພາບນັ້ນ. ທ່ານພັນຄີມູນໄດ້ຮັບການຕ້ອນຮັບຈາກ ຊາວປາເເລສຕາຍກຸ່ມນ້ອຍໆ ກຸ່ມນຶ່ງ ທີ່ໂບກທຸງ ໃນຂະນະທີ່ ທ່ານຂີ່ລົດຜ່ານດ່ານຂ້າມ Erez ທີ່ ເຊື່ອມຕໍ່ ອິສຣາແອລ ກັບເຂດກາຊານັ້ນ. ທ່ານພັນຄີມູນບອກກັບຜູ້ສື່ຂ່າວໃນເຂດ West Bank ເມື່ອວັນເສົາ ວານນີ້ວ່າ ທ່ານກຳລັງເດີນທາງໄປເຂດກາຊາ ເພື່ອສະແດງຄວາມເປັນ ເອກກະພາບ ກັບຊາວປາເເລສຕາຍ.
ນີ້ເປັນຄັ້ງທີ່ສອງທີ່ທ່ານ ພັນຄີມູນ ເດີນທາງໄປຢ້ຽມຢາມເຂດກາຊາ ນັບຕັ້ງແຕ່ເກີດສົງຄາມເປັນເວລາສາມອາທິດໃນເຂດດັ່ງກ່າວ ໃນທ້າຍ ປີ 2008 ຊຶ່ງສົງຄາມຄັ້ງນັ້ນໄດ້ຍັງຜົນໃຫ້ຊາວປາເເລສຕາຍເສຍຊີວິດ ໄປ 1300 ຄົນ ແລະຊາວອີສຣາແອລ 13 ຄົນ. ນອກນີ້ແລ້ວ ທ່ານພັນຄີມູນຍັງໄດ້ພົບປະກັບພວກຜູ້ນຳສູງສຸດຂອງປາ ເເລສຕາຍ ກັບອີສຣາແອລ ໃນວັນເສົາວານນີ້ ໃນຕອນເລີ່ມຕົ້ນຂອງ ການຢ້ຽມຢາມສອງວັນຂອງທ່ານ ໃນຂົງເຂດດັ່ງກ່າວ.
ທີ່ອັຟການີສຖານ: ເຈົ້າໜ້າທ່ີກ່າວວ່າ ການໂຈມຕີຂອງຜູ່ວາງລະເບີດສະລະຊີບຄົນນຶ່ງໄດ້ເຮັດໃຫ້ 10 ຄົນເສັຍຊີວິດ ແລະອີກ 7 ຄົນບາດເຈັບທີ່ແຂວງ Hel-mand ໃນພາກໃຕ້ຂອງອັຟການີສຖານ.
ບັນດາເຈົ້າໜ້າທ່ີປະຈຳທ້ອງຖິ່ນກ່າວວ່າ ຜູ້ວາງລະເບີດອາດໄດ້ແນເປົ້າ ໝາຍໃສ່ລົດກອງທັບຄັນນຶ່ງ ແຕ່ໄດ້ຈູດວັດຖຸລະເບີດຂອງຜູ້ກ່ຽວຢູ່ໃນ ເຂດທ່ີພວກພົນລະເຮືອນຫລາຍຄົນ ກຳລັງພາກັນເຂົ້າຮ່ວມໃນງານ Nowruz ເພື່ອສະເຫລີ້ມສະຫລອງວັນປີໃໝ່ກັນ. ໃນບ່ອນນຶ່ງຕ່າງຫາກ ຜູ້ຄົນ 2 ຄົນໄດ້ເສັຍຊີວິດແລະ ຢ່າງນ້ອຍ ອີກ 2 ຄົນ ໄດ້ຮັບບາດເຈັບ ຍ້ອນກະເບີດທ່ີແຕກຂຶ້ນໃນແຂວງ Khost ໃນພາກຕາເວັນອອກສຽງໃຕ້ຂອງອັຟການີສຖານ.
ທີ່ໄທ: ພວກປະທ້ວງໃນປະເທດໄທກ ພາກັນທຳການປະທ້ວງອີກບັ້ນນຶ່ງ ໃນ ວັນອາທິດມື້ນີ້ ໂດຍ ທີ່ພວກນັກເຄຶ່ອນໄຫວທັງຫລາຍມີແຜນການທີ່ຈະ ໃຊ້ເລືອດແຕ້ມຮູບໃສ່ບົນແຜ່ນຜ້າ ໃນອັນທີ່ເອີ້ນກັນວ່າ“ການແຕ້ມດ້ວຍ ເລືອດ” ຊຶ່ງເປັນພາກສ່ວນນຶ່ງຂອງຍຸທະວິທີລ່າສຸດ ຂອງພວກປະທ້ວງ ຫລາຍພັນຄົນ ທີ່ໄດ້ພາກັນບໍລິຈາກເລືອດຂອງຕົນ ແລ້ວເອົາໄປຖອກ ໃສ່ໜ້າໂຮງການຕ່າງໆຂອງລັດຖະບານ ໂຮມທັງບ້ານພັກຂອງນາຍົກ ລັດຖະມົນຕີນຳ. ພວກປະທ້ວງກ່າວວ່າພວກເຂົາຈະໃຊ້ເລືອດທີ່ຍັງ ເຫລືອຢູ່ນັ້ນ ເປັນສີແຕ້ມຮູບສິລະປະຂນາດໃຫຍ່ ຢູ່ບົນແຜ່ນຜ້າສີຂາວ ຜືນໃຫຍ່ໃນກຸງເທບ ເມືອງຫລວງຂອງປະເທດໄທ.
ວັນເສົາວານນີ້ ພວກປະທ້ວງຫລາຍສິບພັນຄົນໄດ້ພາກັນຂີ່ລົດເກ໋ງ ລົດ ກະບະ ລົດເມແລະລົດຈັກ ໄປທົ່ກຸງເທບເພື່ອເກນເອົາພວກ
ສະຫນັບ ສະຫນຸນສຳລັບການປຸກລະດົມຕໍ່ຕ້ານລັດຖະບານ ຂອງພວກເຂົາ ຊຶ່ງຂະ ບວນລົດດັ່ງກ່າວ ເປັນພາກສ່ວນນຶ່ງໃນການດຳເນີນຄວາມພະຍາຍາມ ເປັນເວລານຶ່ງອາທິດໂດຍກຸ່ມທີ່ເອີ້ນວ່າ ພວກເສື້ອແດງ ເພື່ອໂຄ່ນລົ້ມ ລັດຖະບານຂອງ ທ່ານອະພິສິດ ເວຊຊາຊິວະ ນາຍົກລັດຖະມົນຕີໄທ.
ຈີນແລະສະຫະຣັດ: ຈີນກ່າວວ່າ ຕົນອາດຈະທຳການຕອບໂຕ້ຖ້າຫາກສະຫະຣັດວາງການ ລົງໂທດດ້າການຄ້າ ແລະທຳການລົງໂທດອື່ນໆຕໍ່ຕົນ ຍ້ອນບັນຫາຂັດແຍ່ງກັນ ກ່ຽວກັບຄ່າຂອງເງິນຕາຂອງຈີນນັ້ນ.
ໜັງສືພິມປະຊາຊົນລາຍວັນ ຫລື Peole’s Daily ຂອງທາງການຈີນ ອ້າງຄຳເວົ້າຂອງທ່ານ Chen Deming ຣັຖມຸນຕີການຄ້າຈີນໃນວັນອາທິດມື້ນີ້ວ່າ ກຸງປັກກິງຈະບໍ່ຫລັບຫູຫລັບຕາ ເຮັດຄືກັນກັບວ່າບໍ່ມີຫຍັງເກີດຂຶ້ນ ຖ້າກະຊວງການເງິນຂອງສະຫະຣັດປະກາດວ່າ ຈີນເປັນຜູ້ຄວບຄຸມເງິນຕານັ້ນ.
ທ່ານ Chen ໄດ້ກ່າວເຊ່ນນັ້ນ ຕໍ່ກອງປະຊຸມວ່າດ້ວຍເສດຖະກິດທ່ີກຸງປັກກິງ ຫລັງຈາກພວກສະມາຊິກສະພາສູງສະຫະຣັດຈຳນວນນຶ່ງໄດ້ ສະເໜີໃຫ້ວາງຂໍ້ລົງໂທດຕໍ່ຈີນ ຖ້າທາງຈີນບໍ່ປັບຄ່າເງິນຢວນຂອງຈີນ ໃໝ່ນັ້ນ. ໃນການກ່າວຕໍ່ບັນດານັກຂ່າວທ່ີກຸງປັກກິງໃນວັນສຸກຜ່ານມານີ້ ທ່ານ He Ning ເຈົ້າໜ້າທ່ີປະຈຳກະຊວງການຄ້າຈີນເວົ້າວ່າ ການ ເອົາມາດຕະການດັ່ງກ່າວ ຈະເປັນການລົບກວນພາຍນອກ ທ່ີຈະເຮັດໃຫ້ການເຈຣະຈາກັນກ່ຽວກັບເຣື່ອງນີ້ ມີຄວາມສລັບຊັບຊ້ອນແລະຫຍຸ້ງຍາກຂຶ້ນ.
ທີ່ເນປານ: ພວກໄວ້ອາໄລຫລາຍພັນຄົນພາກັນຢືນລຽນແຖວ ຕາມຖະໜົນໃນນະ ຄອນຫລວງ Kathmandu ໃນວັນອາທິດມື້ນີ້ ເພື່ອສະແດງຄວາມເຄົາ ຣົບໄວ້ອາໄລບັ້ນສຸດທ້າຍ ຕໍ່ມື້ລາງນາຍົກຣັຖມຸນຕີ Girija Prasad Koirala ທ່ີໄດ້ຊ່ອຍນຳພາປະເທດໃນເຂດພູເຂົາຫິມາໄລແຫ່ງນີ້ ອອກຈາກລະບອບຣາຊາທິປະໄຕ ທີ່ປົກຄອງປະເທດມາເປັນເວລາຫລາຍ ສັດຕະວັດນັ້ນ ໄປສູ່ລະບອບປະຊາທິປະໄຕ. ທ່ານ Koirala ໄດ້ເຖິງແກ່ມຊໍຣະນະກັມໄປໃນວັນເສົາວານນີ້ ຮວມອາຍຸໄດ້ 86 ປີ.
ນາຍົກຣັຖມຸນຕີ Madhav kumar Nepal ໄດ້ເອົາທຸງຊາດຂອງເນປານ ປົກຄຸມສົບຂອງທ່ານ Koirala ທ່ີຖືກນຳໄປດອຍໄວ້ທີ່ສະໜາມກີລາແຫ່ງຊາດ Dasharath ເພື່ອໃຫ້ປະຊາຊົນໄປຢ້ຽມເຄົາລົບສົບ. ພິທີເຜົາສົບຂອງທ່ານ Koirala ກຳນົດຈະມີຂຶ້ນໃນຕອນບ່າຍວັນອາ ທິດມື້ນີ້. ທ່ານ Koirala ໄດ້ເປັນຜູ້ນຳພັກ Congress ຂອງເນປານ ແລະເຄີຍຮັບໃຊ້ເປັນນາຍົກຣັຖມຸນຕີຂອງເນປານເປັນເວລາ 5 ສະໄໝມີການມອງເບິ່ງວ່າ ທ່ານເປັນກຳລັງຜັກດັນໃຫ້ມີສະຖຽນລະພາບຢູ່ໃນປະເທດ ທ່ີມັກປະເຊີນກັບບັນຫາການລຸກຮືຂຶ້ນເລື້ອຍໆແຫ່ງນີ້.