ຂ່າວໄພແຜ່ນດິນໄຫວທີ່ Chile : ພວກປະຊາຊົນ Chile ທ່ີພາກັນຢ້ານກົວແຜ່ນດິນໄຫວອີກຄັ້ງໃໝ່ຫລັງຈາກເກີດແຜ່ນດິນໄຫວຄັ້ງຮ້າຍແຮງນັ້ນ ໄດ້ພາກັນອອກໄປຫລັບນອນຢູ່ນອກບ້ານເຮືອນ ໃນວັນອາທິດມື້ນີ້ 1 ມື້ ຫລັງຈາກປະສົບກັບໄພແຜ່ນດິນໄຫວຄັ້ງຮ້າຍແຮງທ່ີໄດ້ສ້າງຄວາມເສັຍຫາຍຢ່າງໜັກໃນຂົງເຂດພາກກາງຂອງປະເທດແລ້ວ. ແຜ່ນດິນໄຫວທ່ີມີຄວາມແຮງ 8.8 ຕາມເຄືອງວັດແທກແຜ່ນດິນໄຫວ Richter ໄດ້ປະທະປະເທດໃນທະວີບອາເມຣິກາໃຕ້ແຫ່ງນີ້ ໃນຕອນເຊົ້າມືດວັນເສົາວານນີ້ ຊຶ່ງຫລັງຈາກນັ້ນ ແຜ່ນດິນໄດ້ສັ່ນສະເທືອນຢ່າງ ແຮງ ມາຕື່ມອີກຢ່າງນ້ອຍ 87 ຄັ້ງ ຮວມທັງຄັ້ງນຶ່ງຊຶ່ງມີຄວາມແຮງເຖິງ 6.9 . ໄພແຜ່ນດິນໄຫວ ຄັ້ງນີ້ໄດ້ເອົາຊີວິດຜູ້ຄົນໄປແລ້ວຫລາຍກວ່າ 300 ຄົນ ແລະໄດ້ສ້າງຄວາມເສັຍຫາຍໃຫ້ແກ່ບ້ານເຮືອນຫລາຍເຖິງ 1 ລ້ານ5 ແສນຫລັງ. ປະທານາທິບໍດີ ທ່ານນາງ Michelle Bachelet ໄດ້ປະກາດສະພາ ວະຫາຍະນະ ຢູ່ໃນພາກກາງຂອງ Chile ບ່ອນທ່ີແຜ່ນດິນໄຫວໄດ້ເຮັດໃຫ້ພວກຕຶກອາຄານພັງທະລາຍລົງ ພ້ອມທັງເຮັດໃຫ້ຍວດຍານ ພາຫະນະປິ້ນຂວ້ຳ ແລະເຮັດໃຫ້ສາຍໄຟຟ້າແລະໂທລະສັບຕັດຂາດ. ພວກຂົວສະພານຫລາຍແຫ່ງໄດ້ເພພັງລົງ ແລະພວກຖະໜົນຫົນທາງສາຍຕ່າງໆກໍເຕັມໄປດ້ວຍສິ່ງຫັກເພພັງ. ມີລາຍງານວ່າ ໄດ້ເກີດໄຟໄໝ້ຂຶ້ນຢູ່ຫລາຍບ່ອນ ແລະໂຮງໝໍຫລາຍແຫ່ງ ກໍໄດ້ເພພັງລົງເຊັ່ນກັນ.
ໄພແຜ່ນດິນໄຫວນີ້ ໄດ້ສ້າງການທ້າທາຍທ່ີໜ້າຢ້ານກົວອັນທຳອິດໃຫ້ແກ່ມະຫາເສດຖີເງິນພັນລ້ານທ່ານ Sebastian Pinera ທ່ີຫາກໍຖືກ ເລືອກເປັນປະທານາທິບໍດີຂອງ Chile ໃນເດືອນມັງກອນຜ່ານມານີ້ ແລະກຳນົດຈະຂຶ້ນດຳຣົງຕຳແໜ່ງໃນອີກ 2 ສັບປະດາຂ້າງໜ້າ.
ປະຕິກິຣິຍາກ່ຽວກັບໄພແຜ່ນດິນໄຫວທ່ີ Chile: ປະຊາຄົມນາໆຊາດກຳລັງສະເໜີໃຫ້ການຊ່ອຍ
ເຫລືອແກ່ Chile ຫລັງຈາກເກີດໄພພິບັດແຜ່ນດິນໄຫວຄັ້ງຮ້າຍແຮງໃນວັນເສົາວານນີ້.ປະທານາທິບໍດີ
ບາຣັກໂອບາມາແຫ່ງສະຫະຣັດ ກ່າວວ່າ ທ່ານໄດ້ຕິດຕ່ໍພົວພັນກັບປະທານາທິບໍດີ Michelle Bachelet ແລ້ວເພື່ອສະເໜີໃຫ້ ການຊ່ອຍເຫລືອຂອງສະຫະຣັດ ໃນການດຳເນີນຄວາມພະຍາຍາມເພື່ອກູ້ໄພແລະຟື້ນໂຕຄືນນັ້ນ ຊຶ່ງທ່ານກ່າວວ່າສະຫະຣັດມີກຳລັງວັດຖຸທ່ີຕຽມພ້ອມທ່ີຈະສົ່ງໄປຍັງ Chile ເວລາໃດທ່ີທາງຣັຖບານ Chile ຫາກຕ້ອງການການຊ່ອຍເຫລືອນັ້ນ. ທ່ານນາງ Hillary Clinton ຣັຖມຸນຕີການຕ່າງປະເທດສະຫະຣັດກໍ ກ່າວວ່າ ສະຫະຣັດກຳລັງປະສານງານຢ່າງໃກ້ຊິດກັບບັນດາເຈົ້າໜ້າທ່ີຂັ້ນສູງຂອງ Chile ແລະທ່ານນາງກ່າວຕໍ່ໄປວ່າ ທ່ານນາງຢາກຈະອອກເດີນທາງຕາມກຳນົດທ່ີໄດ້ວາງແຜນໄວ່້ໃນວັນອາທິດມື້ນີ້ ໄປຍັງ ຂົງເຂດອາເມຣິກາໃຕ້ ທ່ີຮວມທັງການຢຸດແວ່ທ່ີປະເທດ Chile ນຳ. ສະຫະພາບຢູໂຣບກໍໄດ້ໃຫ້ຄຳໝັ້ນສັນຍາທ່ີຈະໃຫ້ເງິນຊ່ອຍເຫລືອ ຈຳ ນວນ 4 ລ້ານດອນລາໃນທັນທີ ແກ່ CHILE. ທ່ານພັນກິມູນ ເລຂາທິການໃຫຍ່ ສະຫະປະຊາຊາດໄດ້ສະແດງຄວາມເສົ້າເສັຍໃຈນຳການເສັຍຊີວິດຈາກໄພແຜ່ນດິນໄຫວນີ້ ແລະກ່າວວ່າ ທ່ານກຳລັງຂໍເອົາການຊັ່ງຊາຕີລາຄາເບິ່ງສະຖານະການ ຈາກຄນະກັມ ມາທິການວ່າດ້ວຍເສດຖະກິດຂອງສະຫະປະຊາຊາດ ສຳລັບອາເມຣິ ກາລາຕິນແລະເຂດທະເລແຄຣິບບຽນຢູ່ ຊຶ່ງມີສຳນັກງານຕັ້ງຢູ່ໃນ ນະຄອນຫລວງ Santiago ຂອງ Chile ນັ້ນ. ອົງການວ່າດ້ວຍປະເທດໃນຂົງເຂດອາເຣິກາກໍໄດ້ສະເໜີຄວາມເປັນ ເອກະ ພາບເຊັ່ນກັນຕໍ່ປະຊາຊົນຂອງ Chile ນັ້ນ. ເລຂາທິການໃຫຍ່ຂອງອົງການປະເທດໃນຂົງເຂດອາເມຣິກາ ຫລື OAS ທ່ານ Jose Miguel Insulza ທ່ີມາຈາກປະເທດ Chile ກ່າວວ່າ ປະເທດຂອງທ່ານສາມາດກາງຕໍ່ການ ຮ່ວມໄມ້ຮ່ວມມືທຸກຢ່າງ ທ່ີທາງອົງການກຸ່ມປະເທດ OAS ສາມາດອຳນວຍໃຫ້ໄດ້.
ກ່ຽວກັບຄື້ນຟອງຍັກສຶນາມິ: ໄພແຜ່ນດິນໄຫວທ່ີປະເທດ Chile ໄດ້ສົ່ງຄື້ນຟອງຍັກສຶນາມິ ຫລາຍພັນຫລັກກິໂລແມັດ ຂ້າມມະຫາສມຸດປາຊີຟິກໄປຮອດແຄມຝັ່ງທະເລ ຂອງຣັດຮາວາຍ,New Zealand, ຍີ່ປຸ່ນ ຣັດເຊັຍແລະໝູ່ເກາະຕ່າງໆໃນພາກໃຕ້ຂອງມະຫາສມຸດປາຊີຟິກ ແຕ່ບໍ່ຮ້າຍແຮງ ແລະຫລາຍໆ ບ່ອນໄດ້ລົບລ້າງການເຕືອນໄພໃຫ້ລະວັງຄືນຟອງຍັກສຶນາມິນັ້ນ. ສູນກາງເຕືອນໄພສຶນາມິໃນເຂດປາຊີຟິກ ທີ່ ເກາະຮາວາຍຂອງສະຫະ ຣັດ ກໍໄດ້ປະກາດລົບລ້າງການເຕືອນໄພໃນທົ່ວເຂດມະຫາສະມຸດປາຊີຟິກ ໃນມື້ນີ້ ຫລັງຈາກທີ່ຄື້ນຟອງທີ່ພັດເຂົ້າປະທະ 15 ຊົ່ວໂມງຫລັງຈາກເກີດໄພແຜ່ນດິນໄຫວທີ່ CHILE ນັ້ນ ມີຂະນາດນ້ອຍກ່ວາທີ່ຄາດ ຄະເນໄວ້.ບໍ່ມີໄດ້ລາຍງານແຈ້ງໃຫ້ ຊາບກ່ຽວກັບຄວາມເສັຍຫາຍ ຫລືບາດເຈັບລົ້ມຕາຍລາຍສຳຄັນໃດໆ ໃນຂົງເຂດ ມະຫາສມຸດປາຊີຟິກນັ້ນ ຫລັງຈາກທີ່ໄດ້ມີການຍົກຍ້າຍປະຊາຊົນຫລາຍແສນຄົນ ອອກໄປຈາກແຄມ ຝັ່ງທະເລຢູ່ໃນຫລາຍໆປະເທດ ໂຮມທັງຟີລິບປີນ ແລະນິວຊີແລນດ໌.ເຖິງຢ່າງໃດກໍຕາມ ຄື້ນຟອງສຶນາມິ ໄດ້ເອົາຊີວິດຜູ້ຄົນໄປແລ້ວ ຢ່າງ ນ້ອຍ 5 ຄົນເທິງເກາະນຶ່ງຢູ່ນອກຝັ່ງທະເລ Chile ບ່ອນເກີດແຜ່ນດິນໄຫວນັ້ນ ແລະມີລາຍງານວ່າ ມີ 11 ຄົນໄດ້ຫາຍສາບສູນໄປເທິງເກາະ Robinson Crusoc ໃນເຂດສອກຫລີກຫ່າງໄກຂອງChile.
ທີ່ອັຟການີສຖານ:ຣັຖບານອັຟການີສຖານໄດ້ເລີ້ມເຂົ້າຄຸ້ມຄອງຄຸກແຫ່ງນຶ່ງທ່ີຢູ່ພາຍໃຕ້ ການຄວບຄຸມ ຂອງສະຫະຣັດທ່ີຖານທັບອາກາດ Bagram ນັ້ນແລ້ວ.ທ່ານ Mohammad Kaseem ຮອງຣັຖມຸນ ຕີກະຊວງຍຸຕິທັມອັຟກາ ນີສຖານກ່າວຕໍ່ບັນດານັກຂ່າວທ່ີກຸງຄາບູລ ໃນວັນເສົາວານນີ້ວ່າ ຂັ້ນຕອນໃນການເຂົ້າຄວບຄຸມຄຸກດັ່ງກ່າວ ຈະກິນເວລາເຖິງ 1 ປີ. ກອງທັບສະຫະຣັດຈະທຳການເຝິກອົບຮົມພວກທະຫານອັຟການີສຖານປະມານ 300 ຄົນ ໃຫ້ເປັນຜູ້ດູແລຄຸກດັ່ງກ່າວ ກ່ອນພວກເຂົາເຈົ້າຈະຄວບຄຸມແລະເປັນຜູ້ບໍລິຫານຄຸກ ໂດຍເຕັມ.ຄຸກແຫ່ງນີ້ ທ່ີຕັ້ງຢູ່ໃກ້ໆກັບນະຄອນຫລວງກຸງຄາບູລ ໄດ້ຖືກໃຊ້ເປັນບ່ອນຄຸມຂັງພວກຜູ້ຕ້ອງສົງໄສ ເປັນພວກນັກຕໍ່ສູ້ຫົວຮຸນແຮງທ່ີຖືກຈັບກຸມໃນລະຫວ່າງໃນບຸກໂຈມຕີພາຍໃຕ້ການນຳພາຂອງສະຫະຣັດຕໍ່ ພວກຕາລີບັນໃນຕົ້ນປີ 2001 ນັ້ນ. ຄຸກແຫ່ງໃໝ່ໄດ້ໄຂຂຶ້ນໃນເດືອນພະຈິກປີແລ້ວນີ້ ແລະມີວັດຖຸປະສົງເພື່ອອຳນວຍ ສະພາບການເປັນຢູ່ທ່ີດີຂຶ້ນໃຫ້ແກ່ພວກນັກໂທດກວ່າຄຸກແຫ່ງກ່ອນນັ້ນ.ບັນດາກຸ່ມປົກປ້ອງສິດທິມະນຸດ ກ່າວຫາວ່າ ໄດ້ມີການລະເມີດສິດຂອງພວກນັກໂທດຢູ່ໃນຄຸກທ່ີຖານທັບອາກາດ Bagram ນັ້ນ ທ່ີມີຮວມທັງການທຸບຕີແລະຄຸມຂັງຢ່າງດົນນານໂດຍບໍ່ມີການຕັ້ງຂໍ້ກ່າວຫາຕໍ່ພວກທ່ີຖືກຄຸມຂັງໄວ້ນັ້ນ.
ຜົນການແຂ່ງຂັນກິລາໂອລິມປິກລະດູໜາວທີ່ແວນຄູເວີ: ມາຮອດປັດຈຸບັນ ປາກົດວ່າການາດາ ປະເທດເຈົ້າພາບ ໄດ້ຮັບຫລຽນຄຳຫລາຍກ່ວາໝູ່ ລວມເປັນທັງໝົດ 13 ຫລຽນຄຳ ຫລັງຈາກທີ່ໄດ້ຮັບຕື່ມອີກ 3 ຫລຽນໃນວັນເສົາວານນີ້ ຊຶ່ງບໍ່ເຄີຍມີປະເທດໃດໄດ້ຮັບມາກ່ອນໃນມື້ດຽວ ໃນປະວັດສາດຂອງກິລາໂອລິມປິກລະດູໜາວ ແລະເປັນຄວາມກ້າວໜ້າຢ່າງໃຫຍ່ຫລວງ ຈາກສອງເທື່ອກ່ອນທີ່ການາດາເປັນເຈົ້າພາບຈັດການແຂ່ງຂັນກິລາໂອລິມປິກລະດູໜາວ ຄືໃນປີ 1976 ທີ່ນະຄອນ MONTREAL ແລະໃນປີ 1988 ທີ່ເມືອງ CAL-GARY ຊຶ່ງການາດາບໍ່ໄດ້ຫລຽນຄຳຈັກຫລຽນ. ມາເທື່ອນີ້ ນອກຈາກສ້າງປະວັດສາດໃນການໄດ້ຫລຽນຄຳ 3 ຫລຽນໃນມື້ດຽວແລ້ວ ການາດາຍັງໄດ້ຫລຽນຄຳເທົ່າກັບສອງປະເທດເຈົ້າພາບກິລາໂອລິມປິກລະດູໝາວ ທີ່ເຄີຍສ້າງປະວັດສາດມາແລ້ວ ຄື ອະດີດສະຫະພາບໂຊວຽດໃນປີ 1976 ແລະນໍເວ ໃນປີ 2002. ລວມທັງໝົດແລ້ວ ການາດາໄດ້ 25 ຫລຽນ ມາໃນອັນດັບສາມ ໃນຂະນະທີ່ສະຫະຣັດຍັງຄອງຕຳ ແໜ່ງອັນດັນນຶ່ງຢູ່ ໂດຍໄດ້ມາທັງໝົດ 36 ຫລຽນ ມີ 9 ຫລຽນຄຳ 14 ຫລຽນເງິນ ແລະ 13 ຫລຽນທອງແດງ. ອັນດັບສອງແມ່ນເຢັຍລະມັນ ຊຶ່ງໄດ້ທັງໝົດ 29 ຫລຽນ ມີ 10 ຫລຽນຄຳ 12 ຫລຽນເງິນ ແລະ 7 ຫລຽນທອງແດງ.
