ອີຣ່ານ - ນິວເຄລັຽ:
ປະທານາທິບໍດີອີຣ່ານ ທ່ານ MAHMOUD AHMADINEJAD ບໍ່ ໄດ້ໃຫ້ຄວາມສຳຄັນ
ຕໍ່ລາຍງານຂ່າວ ຂອງ ໜັງສືພິມອັງກິດ ທີ່ກ່າວວ່າ ອີຣ່ານກຳລັງພະ ຍາຍາມ
ເຮັດກົນໄກ ທີ່ເຮັດໃຫ້ ຣະເບີດ ນິວເຄລັຽແຕກ. ໃນລາຍການສຳພາດ
ປະທານາທິບໍດີອິຣ່ານ ທາງໂທຣະພາບ ທີ່ອອກອາກາດ ຢູ່ສະຫະຣັດ ໂດຍຕາໜ່າງ
ໂທຣະພາບ ABC ໃນມື້ວານນີ້ ນັກຂ່າວ DIANE SAWYER ໄດ້ສະເນີ ເອກກະສານ
ສະບັບນຶ່ງ ໃຫ້ທ່ານ AHMADINEJAD ທີ່ໜັງສືພິມ TIMES ຂອງ ກຸງລອນດອນ ໄດ້ຮັບມາ
ທີ່ລາຍງານກ່າວວ່າ ເປັນລາຍລະອຽດ ກ່ຽວກັບວຽກງານ ສ້າງກົນໄກ ສຳລັບ
ຣະເບີດນິວເຄລັຽ ຂອງອີຣ່ານ. ປະທານາທິບໍດີ ອີຣ່ານ ບໍ່ໃຫ້ຄວາມສົນໃຈ
ແກ່ເອກກະສານດັ່ງກ່າວ ແລະເວົ້າວ່າ ມັນເປັນການ ເສກສັນປັ້ນແຕ່ງ
ຂອງຣັຖບານສະຫະຣັດ. ແຕ່ທີ່ປຶກສາຄົນນຶ່ງ ຂອງປະທານາທິບໍດີ OBAMA ກ່າວວ່າ
ການກ່າວຫາ ຂອງທ່ານ AHMADINEJAD ເປັນເຣື່ອງເຫລວໄຫລ. ນອກນັ້ນແລ້ວ
ໃນມື້ວານນີ້ ເຈົ້າໜ້າທີ່ອະວຸໂສ ທາງດ້ານທະຫານ ທ່ານນຶ່ງ ຂອງສະຫະຣັດ ກ່າວວ່າ
ທຳນຽບ 5 ແຈ ຕ້ອງໄດ້ກຽມພ້ອມ ກ່ຽວກັບຊ່ອງທາງ ໃນການປະຕິບັດງານ ທາງທະຫານ
ຕໍ່ຕ້ານໂຄງການນິວເຄລັຽ ຂອງອີຣ່ານ ໃນກໍຣະນີ ທີ່ປະທານາທິບໍດີ ມີຄຳສັ່ງໃຫ້
ພວກເຂົາເຈົ້າລົງມື.
ປາກິສຖານ: ເຈົ້າໜ້າທີ່ ປາກິສຖານ ກ່າວວ່າ ຜູ້ໂຈມຕີ ດ້ວຍຣະເບີດສະລະຊີບຄົນນຶ່ງໄດ້ບີບ ຄະນວນຣະເບີດ ໃຫ້ແຕກຂຶ້ນ ຢູ່ນອກ ສະໂມ ສອນນັກຂ່າວ ທີ່ເມືອງ PESHAWAR ໃນ ພາກຕາເວັນຕົກ ສຽງເໜືອ ຂອງປາກິສຖານ ເຮັດໃຫ້ມີ ຜູ້ເສັຽຊີວິດ 3 ຄົນ. ເຈົ້າໜ້າທີ່ກ່າວ ວ່າ ຕຳຣວດຄົນນຶ່ງ ໄດ້ຢຸດຄົນຮ້າຍ ຢູ່ປະຕູທາງເຂົ້າ ສະໂມສອນນັກຂ່າວ ໃນວັນອັງຄານມື້ນີ້ ແລະ ພະຍາຍາມ ທີ່ຈະຄົ້ນຕົວຜູ້ກ່ຽວ ຊຶ່ງໃນເວລານັ້ນ ຄົນຮ້າຍກໍໄດ້ບີບ ຄະນວນຣະເບີດ ໃຫ້ແຕກຂຶ້ນ. ເຫດຣະເບີດ ໃນຄັ້ງນີ້ ເຮັດໃຫ້ ຕຳຣວດຄົນນັ້ນ ພ້ອມກັບ ນັກບັນຊີ ຂອງສະໂມສອນ ນັກຂ່າວ ແລະແມ່ຍິງຄົນນຶ່ງ ເສັຽຊີວິດ. ນອກນັ້ນ ຍັງໄດ້ເຮັດໃຫ້ ປ່ອງຢ້ຽມຂອງອາຄານແຕກ ແລະເຮັດໃຫ້ 17 ຄົນ ໄດ້ຮັບບາດເຈັບ ຮວມທັງ ຜູ້ໂດຍສານ ຢູ່ເທິງ ຣົດເມຄັນນຶ່ງ ທີ່ແລ່ນຜ່ານໄປ. ນີ້ແມ່ນ ເປັນການໂຈມຕີ ເທື່ອທຳອິດ ຕໍ່ສື່ມວນຊົນ ທີ່ເມືອງ PESHAWAR ຊຶ່ງໄດ້ປະສົບ ການຖືກໂຈມຕີເລື້ອຍໆ ໃນໄລຍະ ບໍ່ເທົ່າໃດເດືອນ ຜ່ານມານີ້. ພວກຫົວຮຸນແຮງ ໄດ້ເພີ້ມທະວີ ການໂຈມຕີ ຢູ່ໃນທົ່ວປະເທດ ປາກິສຖານ ເພື່ອເປັນການແກ້ແຄ້ນ ຕໍ່ການທີ່ ກອງທັບປາກິສຖານ ໄດ້ບຸກໂຈມຕີ ກວດລ້າງ ເຂົ້າໄປໃນ ເຂດທີ່ໝັ້ນ ຂອງພວກກະບົດ ທາບີບານ ໃນພາກຕາເວັນຕົກ ສຽງເໜືອ ຂອງປາກິສຖານ.
ເກົາຫລີ: ສື່ມວນຊົນຂອງເກົາຫລີໃຕ້ລາຍງານ ວ່າ ຊາວເກົາຫລີເໜືອ 7 ຄົນໄດ້ພາກັນຂີ່ເຮືອ ນ້ອຍລຳນຶ່ງ ຂ້າມເຂດແດນ ໃນທະເລເຫລືອງ ທີ່ຍັງເປັນບັນຫາ ຖົກຖຽງໂຕ້ແຍ້ງກັນນັ້ນ. ອົງ ການຂ່າວຢອນຮັບ ຂອງເກົາຫລີໃຕ້ ລາຍງານ ວ່າ ເຈົ້າໜ້າທີ່ຍາມຝັ່ງ ໄດ້ພົບເຫັນ ຊາວເກົາຫລີເໜືອຈຸນີ້ ໃນຕອນບ່າຍມື້ວານ ຫລັງຈາກເຂົາເຈົ້າ ໄດ້ຂ້າມຊາຍແດນ ທາງທະເລ ທາງກ້ຳຕາເວັນຕົກ ຂອງເກົາຫຫລີໃຕ້. ເຈົ້າໜ້າທີ່ ເກົາຫລີໃຕ້ ກຳລັງສອບປາກຄຳ ຊາວເກົາຫລີເໜືອຈຸນີ້ ກ່ຽວກັບວ່າ ພວກເຂົາເຈົ້າ ໄດ້ພາກັນໂຕນໜີ ຫລືພຽງແຕ່ໄດ້ ຂີ່ເຮືອ ຫລົງເຂົ້າມາ ໃນເຂດເກົາຫລີໃຕ້ ໂດຍບັງເອີນ ເທົ່ານັ້ນ. ເຫດການທີ່ວ່ານີ້ ໄດ້ເກີດຂຶ້ນ ຂະນະທີ່ ເກົາຫລີເໜືອ ໃນມື້ວານນີ້ ໄດ້ກຳນົດໃຫ້ ເຂດແດນທາງທະເລ ໃນບໍຣິເວນດັ່ງກ່າວ ເປັນເຂດຍິງໄດ້ ແລະເຕືອນ ກຳລັງທະຫານ ຂອງເກົາຫຼີໃຕ້ ບໍ່ໃຫ້ເຂົ້າໄປ ໃນບໍຣິເວນດັ່ງກ່າວ. ໃນຮອບ ທົສວັດຜ່ານມານີ້ ກອງທັບເຮືອ ຂອງເກົາຫຼີເໜືອ ແລະເກົາຫຼີໃຕ້ ໄດ້ປະທະກັນ ມາສອງເທື່ອແລ້ວ ໃນເຂດນ່ານນ້ຳ ທີ່ຍັງມີການ ຂັດແຍ້ງກັນຢູ່ນັ້ນ. ກະຊວງທ້ອນໂຮມຊາດ ຂອງເກົາຫລີໃຕ້ ກ່າວວ່າ ມີຊາວເກົາຫລີເໜືອ ຫລາຍກວ່າ 16 ພັນຄົນ ໄດ້ໂຕນໜີ ມາຍັງເກົາຫລີໃຕ້ ນັບແຕ່ ສົງຄາມເກົາຫລີ ໄດ້ສິ້ນສຸດລົງ ໃນປີ 1953. ສ່ວນໃຫຍ່ ແມ່ນໄດ້ໂຕນໜີ ໃນໄລຍະ 10 ຜ່ານມານີ້.
ກຳປູເຈັຽ - ຈີນ: ປັກກິ່ງ ໄດ້ປະຕິເສດ ໃນວັນອັງ ຄານມື້ນີ້ວ່າ ຕົນບໍ່ໄດ້ ເອົາການໃຫ້ຄວາມຊ່ອຍເຫລືອ ແກ່ກຳປູເຈັຽ ເປັນເງື່ອນໄຂ ບີບບັງຄັບ ໃຫ້ກຳປູເຈັຽ ຕັດສິນໃຈສົ່ງ ຊາວວີເກີ້ມຸສລິມຈຸນຶ່ງ ທີ່ຊອກຫາຊ່ອງ ທາງຂໍລີ້ພັຍ ຢູ່ກຳປູເຈັຽນັ້ນ ກັບຄືນໄປຈີນ. ໂຄສົກ ກະຊວງ ການຕ່າງປະເທດຈີນຄົນນຶ່ງ ເອີ້ນການເນຣະເທດ ຊາວວີເກີ້ວ່າ ເປັນເຣື່ອງພາຍໃນ ຂອງກຳປູເຈັຽ ແລະກ່າວວ່າ ຊາວວີເກີ້ບາງຄົນ ແມ່ນເປັນຜູ້ຕ້ອງສົງສັຍວ່າ ໄດ້ມີກິຈກັມ ທີ່ເປັນອາຊຍາກັມ. ຈີນໄດ້ລົງນາມ ໃນຂໍ້ຕົກລົງ ໃຫ້ການຊ່ອຍເຫຼືອ 14 ສະບັບ ແກ່ກຳປູເຈັຽໃນ ວັນຈັນວານນີ້ ທີ່ມີມູນຄ່າທັງໝົດ ເກືອບ 1 ພັນລ້ານໂດລາ 2 ມື້ຫລັງຈາກ ກຳປູເຈັຽ ໄດ້ປະຕິບັດຕາມ ການຮ້ອງຂໍຂອງປັກກິ່ງ ທີ່ຢາກໃຫ້ສົ່ງ ຊາວວີເກີ້ 20 ຄົນ ກັບຄືນໄປຍັງປະເທດຈີນ. ຮອງປະທານປະເທດຈີນ ທ່ານ XI JINPING ເປັນຜູ້ກຳກັບເບິ່ງນຳ ການເຊັນຂໍ້ຕົກລົງ ຊ່ວຍເຫລືອດັ່ງກ່າວ ໃນລະຫວ່າງ ການຢ້ຽມຢາມ ກຳປູເຈັຽ ເປັນເວລາ 3 ມື້. ທ່ານນາງ REBIYA KADEER ນັກເຄື່ອນໄຫວ ຊາວວີເກີ້ ທີ່ລີ້ພັຍຢູ່ ໃນສະຫະຣັດ ຂຽນລົງໃນໜັງສືພິມ WALL STREET JOURNAL ວ່າ ການຕັດສິນໃຈ ຂອງກຳປູເຈັຽ ແມ່ນໄດ້ຮັບອິດທິພົນ ຈາກການກົດດັນຢ່າງໃຫຍ່ ຈາກຈີນ ໂດຍມີເງິນຊ່ອຍເຫລືອ ຫລາຍຮ້ອຍລ້ານໂດລາ ເປັນເດີມພັນ.
ໃຕ້ຫວັນ - ຈີນ: ພວກນັກການທູດອະວຸ ໂສຂອງໃຕ້ຫວັນ
ແລະຈີນແຜ່ນດິນໃຫຍ່ໄດ້ ພົບປະກັນ ເພື່ອເຈຣະຈາຫາຣື ກ່ຽວກັບ ເຣື່ອງການຄ້າໃນວັນອັງຄານມື້ນີ້ ທ່າມກາງ ການປະທ້ວງ ຂອງປະຊາຊົນ ທີ່ມີຄວາມວິ ຕົກກັງວົນ
ຢ້ານວ່າ ການເຈຣະຈາດັ່ງກ່າວ ອາດຈະນຳໄປສູ່ ການທ້ອນໂຮມໃຕ້ຫວັນ ເຂົ້າກັບຈີນແຜ່ນດິນໃຫຍ່ໃນທີ່ສຸດນັ້ນ. ໄດ້ ມີການສົ່ງ ກຳລັງຕຳຣວດໄປຍາມຮັກສາການ
ຢ່າງແໜ້ນໜາ ຢູ່ຂ້າງນອກ ຂອງໂຮງແຮມ TAICHUNG ບ່ອນທີ່ ທູດພິເສດຂອງຈີນ ທ່ານ
CHEN YUNLIN ໄດ້ພົບປະ ເປັນຄັ້ງ ທີ 4 ກັບທ່ານ CHIANG PIN KUNG ນັກ ເຈຣະຈາ
ຂອງໃຕ້ຫວັນ ກ່ຽວກັບຂໍ້ຕົກລົງ ການຄ້າເສຣີ. ນອກນັ້ນແລ້ວ ຍັງເປັນທີ່ຄາດກັນວ່າ
ທັງສອງຝ່າຍ ຍັງຈະໄດ້ລົງນາມ ໃນຂໍ້ຕົກລົງ ທາງດ້ານການຄ້າ ອີກ 3 ສະບັບ.
ສື່ມວນຊົນຂອງຈີນ ລາຍງານວ່າ ສ່ວນຂໍ້ຕົກລົງ ສະບັບທີ 4 ກ່ຽວກັບເຣື່ອງ
ການເກັບພາສີນັ້ນ ໄດ້ຖືກຍົກເລີກ ຈາກຫົວຂໍ້ ຂອງການປະຊຸມ. ພວກນັກເຄື່ອນໄຫວ
ຈາກພັກປະຊາທິປະໄຕກ້າວໜ້າ ຊຶ່ງເປັນພັກຝ່າຍຄ້ານ ຂອງໃຕ້ຫວັນ ໄດ້ປະກາດວ່າ
ຈະສືບຕໍ່ ການປະທ້ວງ ຢູ່ນອກໂຮງແຮມ ບ່ອນທີ່ທ່ານ CHEN ພັກເຊົາຢູ່ນັ້ນ
ຕລອດເວລາ 5 ມື້ ທີ່ທ່ານຢ້ຽມຢາມ ໃຕ້ຫວັນ.
ໂຄລັມເບັຽ: ເຈົ້າໜ້າທີ່ໂຄລັມເບັຽກ່າວວ່າ ເຈົ້າ ແຂວງຄົນນຶ່ງ ໄດ້ຖືກລັກພາໂຕໄປ ຈາກເຮືອນ ຂອງ ທ່ານ ໂດຍສະມາຊິກ ຂອງກຸ່ມກຳລັງປະກອບອາວຸດ ປະຕິວັດໂຄລັມເບັຽ ທີ່ເອີ້ນຫຍໍ້ ເປັນພາສາອັງກິດວ່າ FARC ນັ້ນ. ທ່ານ LUIS FRANCISCO CUELLAR ເຈົ້າແຂວງໆ CAQUETA ໃນພາກໃຕ້ ຂອງໂຄລັມເບັຽ ໄດ້ຖືກລັກພາໂຕໄປ ໃນມື້ວານນີ້ ທີ່ເມືອງ FLORENCE ຊຶ່ງເປັນເມືອງເອກ ຫລືທີ່ວ່າການແຂວງ ໃນລະຫວ່າງ ການບຸກໂຈມຕີ ເຮືອນຂອງທ່ານ ໂດຍພວກທີ່ ສົງສັຍວ່າ ເປັນກຸ່ມກະບົດ ກຳລັງປະກອບອາວຸດ ປະຕິວັດ ໂຄລັມເບັຽ. ຕຳຣວດຄົນນຶ່ງ ທີ່ຍາມຢູ່ເຮືອນເຈົ້າແຂວງ ໄດ້ເສັຽຊີວິດ ໃນເຫດຣະເບີດ ລະຫວ່າງ ການບຸກໂຈມຕີ. ກຸ່ມ FARC ໄດ້ກໍ່ກະບົດ ຕໍ່ຕ້ານຣັຖບານ ມາໄດ້ 4 ທົສວັດແລ້ວ ແຕ່ຖັນແຖວຂອງພວກເຂົາ ໄດ້ຖືກທັບມ້າງ ທຳລາຍຢ່າງໜັກ ໃນໄລຍະ ສອງ-ສາມປີ ຜ່ານມານີ້ ຍ້ອນການບຸກໂຈມຕີ ທີ່ຍັງດຳເນີນຢູ່ຕໍ່ມາ ຂອງກອງທັບ ໂຄລັມເບັຽ. ເຈົ້າໜ້າທີ່ເຊື່ອວ່າ ພວກກະບົດຈຸນີ້ ຍັງຈັບ ເຈົ້າໜ້າທີ່ຕຳຣວດ ແລະທະຫານ 20 ກວ່າຄົນ ໄວ້ເປັນໂຕປະກັນ.
ເຊີນຟັງຂ່າວລາຍລະອຽດ ໂດຍຄລິກບ່ອນສຽງ.