ຂ່າວຄວາມວຸ້ນວາຍທີ່ອິຣັກ: ຕຳຫລວດອິຣັກກ່າວວ່າ ການວາງລະເບີດລົດຕິດຕໍ່ກັນຫລາຍຄັນໃນທົ່ວນະຄອນຫລວງແບກແດ໊ດ ໄດ້ສັງຫານຜູ້ຄົນໄປຢ່າງນ້ອຍ 112 ຄົນ ແລະບາດເຈັບຕື່ມອີກເກືອບ 200 ຄົນ. ລະເບີດທ່ີແຕກຂຶ້ນ 3 ລູກ ໄດ້ເກີດຂຶ້ນໃນເວລາໄລເລັ່ຍກັນພຽງບໍ່ເທົ່າ ໃນນາທີ ໃນວັນອັງຄານມື້ນີ້. ລະເບີດລູກນຶ່ງໄດ້ແນເປົ້າໝາຍໃສ່ຕລາດ ແຫ່ງນຶ່ງ ທ່ີມີຜູ້ຄົນຢ່າງໜາແໜ້ນ ໃນໃຈກາງກຸງແບກແດ໊ດ ແລະອີກ 2 ລູກໄດ້ລະເບີດຂຶ້ນໃກ້ໆກັບກະຊວງພາຍໃນ ໃນເຂດຕາເວັນອອກ ຂອງແບກແດ໊ດ ແລະກະຊວງແຮງງານ.
ກ່ອນໜ້ານັ້ນ ຜູ້ວາງລະເບີດສະລະຊີບໃນລົດຄັນນຶ່ງ ໄດ້ໂຈມຕີຕຳ ຫລວດລາດຕາເວັນໜ່ວຍນື່ງ ໃນພາກໃຕ້ກຸງແບກແດ໊ດ ໂດຍໄດ້ສັງ ຫານເຈົ້າໜ້າທ່ີຕຳຫລວດຢ່າງນ້ອຍ 3 ຄົນແລະພົນລະເຮືອນຄົນນຶ່ງ ແລະມີຜູ້ຄົນຕື່ມອີກ 5 ຄົນໄດ້ຮັບບາດເຈັບເຊັ່ນກັນ. ການໂຈມຕີໃນວັນອັງຄານມື້ນີ້ ນັບວ່າເປັນຄັ້ງຮ້າຍແຮງທ່ີສຸດທ່ີເກີດຂຶ້ນໃນນະຄອນຫລວງ ນັບແຕ່ໃນທ້າຍເດືອນຕຸລາເປັນຕົ້ນມາ ເວລາການໂຈມຕີທ່ີຫ້າງໄວ້ໃນລົດສອງຄັນເກີດຂຶ້ນພ້ອມກັນ ຢູ່ນອກຫ້ອງການເທດສະບານ ແລະໄດ້ສັງຫານຜູ້ຄົນໄປ ຢ່າງນ້ອຍ 155 ຄົນ.
ທີ່ອັຟການີສຖານ: ປະທານາທິບໍດີ Hamid Karzai ແຫ່ງອັຟການີສຖານ ກ່າວວ່າ ຣັຖບານຂອງທ່ານ ຈະບໍ່ສາມາດ
ຮັກສາ ກຳລັງຮັກສາຄວາມປອດໄພຢ່າງຫລວງຫລາຍໄວ້ໄດ້ ດ້ວຍງົບປະມານຂອງຕົນເອງ ເປັນເວລາອີກຢ່າງນ້ອຍ
15 ປີ. ທ່ານ Karzai ໄດ້ຮ້ອງຂໍການຊ່ອຍເຫລືອ ຈາກຕ່າງປະເທດ ໃນລະຫວ່າງການໃຫ້ສັມພາດຕ່ໍນັກຂ່າວຮ່ວມ
ກັບທ່ານ Robert Gates ຣັຖມຸນຕີປ້ອງກັນປະເທດສະຫະຣັດ ທ່ີກຳລັງທຳການຢ້ຽມຢາມ ອັຟການີສຖານ ໃນວັນ
ອັງຄານມື້ນີ້. ປະທານາທິບໍດີ ອັຟການີສຖານກ່າວວ່າ ປະເທດຂອງທ່ານ ຂາດຊັບພະຍາກອນເພື່ອຈ່າຍກຳລັງ
ຮັກສາຄວາມປອດໄພ ທ່ີເພ່ີມຈຳນວນຂຶ້ນນີ້ ເພື່ອປ້ອງກັນບໍ່ໃຫ້ເກີດ ການກະບົດທີ່ຮຸນແຮງ ຂຶ້ນນັ້ນ.
ທີ່ປາກີສຖານ: ຕຳຫລວດກ່າວວ່າ ລະເບີດລູກນຶ່ງທ່ີແຕກຂຶ້ນຢູ່ໃກ້ໆກັບຫ້ອງການສືບ ຂ່າວລັບແຫ່ງນຶ່ງໃນເມືອງ Multan ໃນພາກກາງຂອງປະເທດ ເຮັດໃຫ້ປະຊາຊົນເສັຍຊີວິດໄປ 12 ຄົນ ແລະບາດເຈັບຕື່ມອີກຫລາຍຄົນ. ຕຳຫລວດກ່າວອີກວ່າ ລະເບີດ ທ່ີແຕກຂຶ້ນໃນວັນອັງຄານມື້ນີ້ ໄດ້ສ້າງຄວາມເສັຍຫາຍໃຫ້ແກ່ອາຄານຫລາຍຫລັງ.
ລາຍງານຂ່າວເວົ້າວ່າອາຄານຫລັງນຶ່ງທ່ີໄດ້ຮັບ ຄວາມເສັຍຫາຍນັ້ນ ແມ່ນເປັນຂອງອົງການ Inter-Services Intelligence ຊື່ງເປັນອົງການສືບຂ່າວລັບທ່ີສຳຄັນ ຂອງປະເທດ. ກ່ອນໜ້ານີ້ ຣັຖມຸນຕີປ້ອງກັນປະເທດສະຫະ ຣັດ ທ່ານ Robert Gates ກ່າວວ່າ ສະຫະຣັດພ້ອມແລ້ວທ່ີຈະໃຫ້ການຊ່ອຍເຫລືອແກ່ ປາກີສຖານຕື່ມອີກ ເພື່ອຕໍ່ສູ້ກັບກຸ່ມຕາລີບັນແລະເຄືອຂ່າຍອານກາອິດາ ນັ້ນ ທັນທີທີ່ປາກີສຖານຕ້ອງການການຊ່ອຍເຫລືອຕື່ມອີກ.
ທ່ານ Gates ກ່າວຕໍ່ບັນດານັກຂ່າວໃນລະຫວ່າງຖ້ຽວບິນເດີນທາງໄປຍັງກຸງຄາບູລ ວ່າ ການໂຈມຕີຫວ່າງໄວໆຜ່ານມານີ້ຂອງພວກຫົວຮຸນແຮງຈັດໃນປາກີສຖານ ແມ່ນບັງຄັບໃຫ້ຣັຖບານປາກີສຖານຕ້ອງ ໄດ້ ນຳໃຊ້ກຳລັງເພີ່ມຂຶ້ນ ເພື່ອຕໍ່ສູ້ກັບພວກຫົວຮຸນແຮງເຫລົ່ານັ້ນ. ການວາງລະເບີດໂຈມຕີໃນ 2 ຫົວເມືອງໃນປາກີສຖານໃນວັນຈັນວານນີ້ ໄດ້ເຮັດໃຫ້ປະຊາຊົນເສັຍຊີວິດໄປ 60 ຄົນແລະບາດເຈັບຫລາຍກວ່າ 140 ຄົນ.
ກ່ຽວກັບນີວເຄລັຍຂອງເກົາຫລີເໜືອ: ທູດພິເສດຂອງວໍຊິງຕັນວ່າດ້ວຍກິດຈະການເກົາຫລີ ເໜືອເດີນທາງໄປຮອດກຸງພຽງຢ້າງແລ້ວ ເພື່ອທຳການເຈຣະຈາສອງຝ່າຍກັບບັນດາເຈົ້າໜ້າທ່ີເກົາຫລີເໜືອ ໃນລະດັບສູງສຸດນັບແຕ່ປະທານາທິບໍດີ ບາຣັກ ໂອບາມາແຫ່ງສະຫະຣັດ ໄດ້ຂຶ້ນດຳຣົງຕຳແໜ່ງມາ.
ບັນດາເຈົ້າໜ້າທ່ີກະຊວງການຕ່າງປະເທດສະຫະຣັດກ່າວໃນວັນຈັນວານນີ້ວ່າ ຈຸດເພ່ງເລັງທ່ີສຳຄັນຂອງທ່ານ Stephen Bosworth ໃນ ການຢ້ຽມຢາມເປັນເວລາ 3 ມື້ໃນຄັ້ງນີ້ ຈະແມ່ນພະຍາຍາມເຂົ້າອົກ ເຂົ້າໃຈເຈດຕະນາຂອງເກົາຫລີເໜືອກ່ຽວກັບການຟື້ນການເຈຣະຈາ 6 ຝ່າຍຄືນກ່ຽວກັບການຍຸດຕິໂຄງການນີວເຄລັຍຂອງເກົາຫລີເໜືອນັ້ນ. ຍັງບໍ່ເປັນທ່ີຈະແຈ້ງເທ່ືອວ່າ ທ່ານ Bosworth ຈະໄດ້ພົບປະກັບທ່ານ
ກິມຢອງອີລ ຜູ້ນນຳທີ່ເກັບໂຕຂອງເກົາຫລີເໜືອນັ້ນຫລືບໍ?. ໂຄສົກກະ ຊວງການຕ່າງປະເທດ ກ່າວແຕ່ພຽງວ່າ ທາງກຸງວໍຊິງຕັນໄດ້ຮັບຄວາມໝັ້ນໃຈວ່າ ທ່ານ Bosworth ຈະໄດ້ພົບປະກັບບັນດາເຈົ້າໜ້າທ່ີລະດັບສູງທ່ີຖືກຕ້ອງເຫມາະສົມຂອງເກົາຫລີເໜືອ. ຫລັງຈາກການຢ້ຽມຢາມກຸງພຽງຢ້າງແລ້ວ ທ່ານ Bosworthຈະທຳການຢຸດແວ່ເປັນເວລາສັ້ນໆ ທ່ີເກົາຫລີໃຕ້ ຈີນ ຍີ່ປຸ່ນ ແລະຣັດເຊັຍ ຊຶ່ງເປັນອີກ 4 ປະເທດພາຄີໃນການເຈຣະຈາ 6 ຝ່າຍນັ້ນ ເພື່ອປຶກສາຫາລືກັບຄູ່ຕຳແໜ່ງຂອງທ່ານ.
ການດຳເນີນຄະດີສາຍລັບໄທທີ່ກຳປູເຈັຍ: ສານແຫ່ງນື່ງຂອງກຳປູເຈັຍໄດ້ຕັດສິນໂທດຈຳຄຸກ ຜູ້ຊາຍຄົນນຶ່ງ 7 ປີ ແລະປັບໃໝຜູ້ກ່ຽວອີກ 2500 $ ໃນວັນອັງຄານມື້ນີ້ ໃນຂໍ້ຫາຖານທຳການສອດແນມ ທ່ານທັກສິນຊິນນະວັດ ອະດີດນາຍົກຣັຖມຸນໄທ ເວລາທ່ານໄປຢ້ຽມຢາມນະຄອນຫລວງພະນົມເປັນ ໃນເດືອນແລ້ວນີ້.
ນາຍສີວະຣັກ ໂຊທິພົງ ພນັກງານຜະແນກຄວບຄຸມການບິນກຳປູເຈັຍໄດ້ຖືກສານຕັດສິນ ໃນການດຳ ເນີນຄະດີມື້ດຽວ ວ່າເອົາຕາຕະລາງ ຖ້ຽວບິນຂອງທ່ານທັກສິນ ໃຫ້ສະຖານທູດໄທທ່ີກຳປູເຈັຍ. ກຳປູເຈັຍໄດ້ແຕ່ງຕັ້ງທ່ານທັກສິນໃຫ້ເປັນທ່ີປຶກສາພິເສດດ້ານເສດຖະ ກິດຂອງຕົນໃນ ຕົ້ນເດືອນພະຈິກຜ່ານມານີ້.
ການຈັບກຸມນາຍສີວະຣັກທ່ີນະຄອນຫລວງພະນົມເປັນໄດ້ເພິ່ມຄວາມຮ້າຍແຮງໃຫ້ແກ່ວິກິດການດ້ານການທູດລະວ່າງສອງປະເທດ ກ່ຽວກັບການແຕ່ງຕັ້ງທ່ານທັກສິນ ແລະການທ່ີກຳປູເຈັຍບໍ່ຍອມສົ່ງໂຕອະດີດ ນາຍົກຣັຖມຸນຕີໄທ ໄປໃຫ້ໄທ ບ່ອນທ່ີທ່ານທັກສິນປະເຊີນກັບການຕັດ ສິນລົງໂທດຈຳຄຸກເປັນເວລາ 2 ປີ ຖານມີຄວາມຜິດໃນຂໍ້ຫາທຳການ ສໍ້ຣາດບັງຫລວງ.
