ຂ່າວກ່ຽວກັບອັຟການີສຖານ: ຜູ້ບັນຊາການທະຫານສູງສຸດຂອງສະຫະຣັດແລະຂອງກຸ່ມ NATO ໃນອັຟການີສຖານເຕືອນວ່າ ການປະກອບພາລະກິດໃນອັຟການີສຖານ
ມີໂອກາດທ່ີຈະປະສົມກັບຄວາມລົ້ມແຫລວໄດ້ ຖ້າບໍ່ມີການສົ່ງທະຫານໄປສົມທົບຕື່ມອີກພາຍໃນປີໜ້ານີ້. ໜັງສືພິມ
New York Time ແລະໜັງສືພິມ Washington Post
ໄດ້ພິມເຜີຍແຜ່ຫລາຍພາກສ່ວນຂອງການປະເມິນທາງລັບໂດຍນາຍພົນ Stanley McChrystal ໃນ Web siteຂອງເຂົາເຈົ້າໃນວັນຈັນມື້ນີ້ ຊຶ່ງນາຍພົນ McChrystal ຂຽນວ່າ ການບໍ່
ມີທະຫານພຽງພໍຈະສ່ຽງກັບສົງຄາມທ່ີຍືດຍາວແລະສິ້ນເປືອງ ຄ່າໃຊ້ຈ່າຍຫລາຍທ່ີອາດຈະຍັງຜົນເຮັດໃຫ້ປາໄຊໄດ້. ແຕ່ທ່ານ ກ່າວວ່າ ຄວາມສຳເຣັດໃນອັຟການີສຖານຍັງສາມາດບັນລຸໄດ້ຢູ່ຖ້າທາງ ກຳລັງຂອງຝ່າຍພັນທະມິດສາມາດຕ່າວປີ້ນໂອກາດບຸກຄືບໜ້າຂອງພວກກະບົດໄດ້. ປະທານາທິບໍດີບາຣັກ
ໂອບາມາພ້ອມດ້ວຍທີມຮັກສາຄວາມປອດໄພແຫ່ງຊາດຂອງທ່ານກຳລັງທົບທວນເບິ່ງລາຍງານຂອງນາຍ
ພົນ McChrystal ຢູ່ ຊຶ່ງທ່ານໄດ້ຍື່ນຕໍ່ທ່ານ Robert Gates ຣັຖມຸນຕີປ້ອງກັນປະເທດສະຫະຣັດ ໃນວັນທີ 30 ສິງຫາຜ່ານມານີ້.
ກ່ຽວກັບນະໂຍບາຍຂອງໂອບາມາ. ປະທານາທິບໍດີໂອບາມາກຳລັງພະຍາຍາມຕັດສິນໃຈວ່າ ຈະສົ່ງທະຫານສະຫະຣັດໄປເພ່ີມອີກຫລືບໍໃນອັຟການີສ ຖານນັ້ນ ແລະທ່ານ ກ່າວວ່າ ທ່ານຈະບໍ່ຕັດສິນໃຈເຣື່ອງສົງຄາມໃນ ອັຟການີສຖານໂດຍອິງໃສ່ເຣື່ອງການເມືອງໃນປັດຈຸບັນ ໃນຂະນະທ່ີທ່ານກຳລັງປະເຊີນກັບການຄັດຄ້ານຈາກປະຊາຊົນຫລາຍຂຶ້ນຢູ່ໃນສະຫະຣັດກ່ຽວກັບສົງຄາມໃນອັຟການີສຖານນີ້.
ໃນການໃຫ້ສັມພາດຕໍ່ໂທຣະພາບຫລາຍຊ່ອງຕິດຕໍ່ກັນຫລາຍບັ້ນທ່ີ
ອອກອາກາດໃນວັນອາທິດວານນີ້ ທ່ານໂອບາມາ ກ່າວວ່າ ທ່ານບໍ່
ມີກຳນົດເວລາຕາຍໂຕໃນການຖອນທະຫານສະຫະຣັດອອກຈາກ
ອັຟການີສຖານ ແຕ່ບໍ່ເຊື່ອວ່າສະຫະຣັດຈະທຳການຄອບຄອງຢູ່ທ່ີນັ້ນຕລອດໄປ.
ກ່ຽວກັບຜູ້ຕ້ອງສົງໄສກໍ່ການຮ້າຍໃນສະຫະຣັດ:
ຜູ້ຊາຍອັຟການີສຖານ 3 ຄົນກຳນົດຈະໄປປາກົດໂຕຕໍ່ສານຣັຖບານກາງສະຫະຣັດໃນວັນຈັນມື້ນີ້ເພື່ອປະເຊີນກັບຂໍ້ກ່າວຫາຖານໃຫ້ການຜິດພາດຕໍ່ເຈົ້າໜ້າທ່ີໃນການສືບສວນຕໍ່ຕ້ານການກໍ່ການຮ້າຍຂອງສະຫະ
ຣັດ ນັ້ນ. ພວກຜູ້ຊາຍ 3 ຄົນທ່ີຖືກຈັບກຸມໃນວັນເສົາຜ່ານມາ ສາມາດປະເຊີນກັບການລົງໂທດຈຳຄຸກ
ເຖິງ 8 ປີໄດ້ ຖ້າສານຕັດສິນວ່າພວກຜູ້ກ່ຽວມີຄວາມຜິດແທ້ນັ້ນ. ນາຍ Najibullah Zazi ຊຶ່ງເປັນອົບ
ພະຍົບຕັ້ງຖິ່ນຖານຢູ່ໃນສະຫະຣັດແລະພໍ່ຂອງລາວທ່ີເປັນພົນລະເມືອງສະຫະຣັດ ຈະໄປປາກົດໂຕຕໍ່ສານທ່ີນະຄອນ Denver ຣັດ Colorado ໃນພາກຕາເວັນຕົກຂອງສະຫະຣັດ ແລະຜູ້ຊາຍຄົນທີສາມຄືນາຍ Ahmad Wais Afzali ຈະໄປປາກົດຕໍ່ສານທ່ີນະຄອນນີວຢອກ ແລະນາຍ Afzali ກໍເປັນອົບພະຍົບທ່ີຖືກຕ້ອງຕາມກົດໝາຍແລະຢູ່ໃນສະຫະຣັດໄດ້ຢ່າງຖາວອນນັ້ນ. ທ່ານ Raymond Kelly
ຫົວໜ້າຕຳຫລວດທ່ີນະຄອນນີວຢອກ ເຊື່ອວ່າ ນາຍ Zaziໄດ້ຕົວະເຈົ້າໜ້າທ່ີເວລາລາວປະຕິເສດວ່່າລາວບໍ່
ຮູ້ເຣື່ອງຫຍັງກ່ຽວກັບໜັງສືແນະນຳກ່ຽວກັບວິທີເຮັດລະເບີດທ່ີເຈົ້າໜ້າ ທ່ີສືບລັບຣັຖບານກາງພົບເຫັນຢູ່ໃນ ລົດຂອງລາວນັ້ນ.
ກ່ຽວກັບເງິນຕາຕ່າງປະເທດຂອງອິຣ່ານ: ສື່ມວນຊົນທາງການອິຣ່ານກ່າວວ່າ ອິຣ່ານຈະປ່ຽນເງິນຕາສຳຮອງຕ່າງປະເທດຂອງຕົນຈາກເງິນດອນລາສະຫະຣັດໄປເປັນເງິນຢູໂຣ. ລາຍງານກ່າວວ່າ ປະທານາທິບໍດີ Mahmoud Ahmadinejad ໄດ້ສັ່ງໃຫ້ທຳການປ່ຽນແປງດັ່ງກ່າວຫລັງຈາກການຕັດສິນໃຈ ໂດຍຄນະກັມມະການກຳກັບເງິນຕາສຳຮອງ ຕ່າງປະເທດຂອງປະເທດ. ອິຣ່ານໄດ້ປ່ຽນຈາກການຮັບເງິນດອນລາສະຫະຣັດໄປເປັນເງິນຢູໂຣແລ້ວໃນການຂາຍນ້ຳມັນຂອງຕົນ ອັນເປັນແຫລ່ງລາຍໄດ້ຈາກຕ່າງປະເທດນັ້ນ. ອິຣ່ານໄດ້ເອົາບາດກ້າວ ຫລາຍຢ່າງມາແລ້ວ ເພື່ອຕີໂຕຫ່າງຈາກລະບົບທະນາຄານສະຫະຣັດໃນຂະນະ ທ່ີຣັຖບານກຸງວໍຊິງຕັນທຳການເຄື່ອນໄຫວໂດດດ່ຽວທາງດ້ານເສດຖະກິດຕໍ່ຣັຖບານກຸງເຕຮິຣ່ານເນື່ອງຈາກ
ໂຄງການນີວເຄລັຍຂອງອິຣ່ານທ່ີເປັນບັນຫາໂຕ້ແຍ່ງກັນນັ້ນ.
ການປະທ້ວງທີ່ໄທ: ທາງການໄທໄດ້ອະນຸຍາດໃຫ້ພວກປະທ້ວງໄປໂຮມຊຸມນຸມກັນທ່ີບໍລິວັດແຫ່ງນຶ່ງທ່ີເປັນບັນຫາຂັດແຍ່ງກັນໃນເຂດຊາຍແດນທ່ີຕິດກັບກຳປູເຈັຍ 1 ມື້ຫລັງຈາກເກີດການປະທະກັນຢ່າງຮຸນແຮງຊຶ່ງເຮັດໃຫ້ປະຊາຊົນ 20 ຄົນໄດ້ຮັບບາດເຈັບນັ້ນ. ພວກນິຍົມຊາດໄທ
ໄດ້ພາກັນໄປໂຮມຊຸມນຸມກັນໃນວັນອາທິດວານນີ້ຢູ່ໃກ້ໆກັບວັດຂເມນແຫ່ງນຶ່ງທ່ີສ້າງຂຶ້ນໃນສັດຕວັດ ທີ11 ທ່ີໄດ້ເປັນຈຸດໃຈກາງຂອງຄວາມເຄັ່ງຕຶງລະຫວ່າງໄທແລະກຳປູເຈັຍໃນປີຜ່ານມາ. ພວກປະທ້ວງຈາກກຸ່ມພັນ ທະມິດປະຊາຊົນເພື່ອປະຊາທິປະໄຕ ທ່ີຮູ້ກັນວ່າພວກເສື້ອເຫລືອງ ໄດ້ຮຽກຮ້ອງໃຫ້ຣັຖບານໄທຮັບປະກັນອະທິປະໄຕຂອງໄທເໜືອເຂດດັ່ງກ່າວ. ການຊຸມນຸມປະທ້ວງຢ່າງສັນຕິນີ້ມີຂຶ້ນ ຫລັງຈາກການປະທ້ວງທ່ີມີຂຶ້ນ ໃນວັນເສົາຜ່ານມານີ້ ຊຶ່ງໄດ້ກາຍເປັນເຫດການຮຸນແຮງ ເວລາພວກເສື້ອເຫລືອງປະມານ 5 ພັນຄົນປະທະກັບພວກປະຊາຊົນແລະຕຳຫລວດໃນທ້ອງຖິ່ນ. ສານນາໆຊາດໄດ້ຕັດສິນໃຫ້ກຳປູເຈັຍເປັນຜູ້ຄວບຄຸມບໍລິເວນເຂົາ ພຣະວິຫານໃນປີ1962 ແຕ່ທ່ີດິນບາງແຫ່ງຢູ່ໃກ້ກັບຂົງເຂດຍັງເປັນບັນຫາຂັດແຍ່ງກັນຢູ່. ພວກປະທ້ວງເສື້ອເຫລືອງຢາກໃຫ້ຣັຖບານຊຸກຍູ້ກຳລັງຂອງກຳປູເຈັຍອອກຈາກເຂດເຂົາພຣະວິຫານນັ້ນ.
