ສະຖານະການໃນອັຟການີສຖານ: ຜູ້ວາງລະເບີດສະລະຊີບຄົນນຶ່ງໄດ້ຈຈູດຂະນວນວັດຖຸລະເບີດໃສ່ຝູງຊົນທີ່ປະກອບດ້ວຍເຈົ້າໜ້າທ່ີຣັຖບານ ໃນພາກຕາເວັນອອກຂອງອັຟການີສຖານ ຍັງຜົນເຮັດໃຫ້ຢ່າງນ້ອຍ 23 ຄົນເສັຍຊີວິດ ຮວມທັງຮອງຫົວໜ້າສືບຂ່າວລັບຂອງປະເທດນຳ. ການໂຈມຕີດັ່ງກ່າວເກີດຂຶ້ນໃນຕອນເຊົ້າວັນພຸດມື້ນີ້ ທ່ີໂບດແຫ່ງນຶ່ງໃນເມືອງ Mehtarlam ແຂວງ Laghman ໄກຈາກນະຄອນຫລວງຄາບູລ ໄປທາງກ້ຳຕາເວັນອອກ ປະມານ 100 ຫລັກກິໂລແມັດ. ທາງການສົງໄສວ່າ ທ່ານ Abdullah Laghmani ຮອງຫົວໜ້າຝ່າຍສືບລັບ ໄດ້ເປັນເປົ້າໝາຍຂອງການວາງລະເບີດໂຈມຕີຄັ້ງນີ້.ໂຄສົກກຸ່ມກະບົດຕາລີບານ ໄດ້ອອກມາອ້າງເອົາຄວາມຮັບຜິດຊອບວ່າ ພວກຕົນເປັນຜູ້ທຳການໂຈມຕີ.
ກ່ຽວກັບນັກຂ່າວອະເມຣິກັນທ່ີປ່ອຍອອກຈາກເກົາຫລີເໜືອ: ນັກຂ່າວອະເມຣິກັນ2 ຄົນທ່ີເຄີຍຖືກຂັງຄຸກໃນເກົາຫລີເໜືອໃນຂໍ້ຫາເຂົ້າເມືອງຢ່າງຜິດກົດໝາຍ ໄດ້ອອກມາເລົ່າເຖິງປະສົບປະການຂອງເຂົາເຈົ້າເປັນເທື່ອທຳອິດ ແລະເວົ້າວ່າພວກເຂົາເຈົ້າບໍ່ເຄີຍຕັ້ງໃຈໄວ້ເລີຍວ່າ ຈະຂ້າມແມ່ນ້ຳ Tumen ທ່ີກ້າມເປັນນ້ຳກ້ອນ ເຂົ້າໄປຍັງປະເທດຄອມມິວນິດເກົາຫລີເໜືອນັ້ນ.
ໃນຄຳຖະແຫລງຍາວໆທ່ີລົງໃນ Web site ຂອງສະຖານີໂທລະພາບ Current TV ນາງ Laura Ling ແລະນາງ Euna Lee ກ່າວວ່າ ເຂົາເຈົ້າໄດ້ຂ້າມແມ່ນ້ຳດັ່ງກ່າວ ຕາມນາຍທາງຂອງເຂົາເຈົ້າໄປດ້ວຍຄວາມລັ່ງເລໃຈ ແລະຢືນຢັນວ່າເຂົາເຈົ້າໄດ້ກັບຄືນມາຢູ່ໃນດິນແດນຂອງຈີນແລ້ວ ເວລາຖືກພວກໜ່ວຍາມຊາຍແດນຂອງເກົາຫລີເໜືອໄປຈັບເອົາ ໃນວັນທີ 17 ມີນາຜ່ານມານັ້ນ. ນາງ Lee ແລະນາງ Ling ກ່າວວ່າ ເຂົາເຈົ້າຖືກແກ່ລາກຢ່າງຮຸນແຮງຂ້າມນ້ຳກ້ອນ ໄປຍັງເກົາຫລີເໜືອແລະພາຍ່າງໄປຍັງຖານທັບແຫ່ງນຶ່ງຢູ່ໃກ້ໆນັ້ນ ແລະວ່າເຖິງແມ່ນ ຈະບໍ່ມີປ້າຍຫລືເຄື່ອງໝາຍໃດໆ ແບ່ງແຍກຊາຍແດນຈີນກັບເກົາຫລີເໜືອກໍຕາມ ແຕ່ເຂົາເຈົ້າກໍຮູ້ໂຕຢູ່ວ່າ ພວກເຂົາເຈົ້າກຳລັງເຄື່ອນເຂົ້າໄປຫາດ່ານຂ້າມຊາຍແດນ ເວລາເຂົາເຈົ້າຂ້າມແມ່ນ້ຳ Tumen ທ່ີເປັນນ້ຳກ້ອນນັ້ນ. ນາງ Lee ແລະນາງ Ling ກ່າວຕື່ມວ່າ ໃນລະຫວ່າງທ່ີຕິດຄຸກຢູ່ເປັນເວລາ 140 ມື້ນັ້ນ ເຂົາເຈົ້າໄດ້ຖືກຂັງແຍກກັນຢູ່ຄົນລະບ່ອນ ແລະຖືກສອບປາກຄຳຊ້ຳແລ້ວຊ້ຳອີກ.
ແຜ່ນດິນໄຫວທ່ີອິນໂດເນເຊັຍ: ທາງການອິນໂດເນເຊັຍ ກ່າວວ່າ ປະຊາຊົນຢ່າງນ້ອຍ 12 ຄົນເສັຍຊີວິດ ຫລັງຈາກໄດ້ເກີດແຜ່ນດິນໄຫວຢ່າງແຮງ ຢູ່ນອກຝັ່ງທະເລຂອງປະເທດ ໃນວັນພຸດມື້ນີ້. ແຜ່ນດິນໄຫວໄດ້ເກີດຂຶ້ນຢູ່ໃຕ້ນ້ຳ ເລິກລົງໄປ 49 ຫລັກກິໂລແມັດ ນອກຝັ່ງທະເລຂອງເກາະໃຫຍ່ Java ແລະຢູ່ຫ່າງຈາກນະຄອນຫລວງ Jakarta ໄປທາງທິດຕາເວັນອອກສຽງໃຕ້ປະມານ 200 ຫລັກກິໂລແມັດ. ໃນເບື້ອງຕົ້ນ ຫ້ອງການສຳຫລວດທໍຣະນີຂອງສະຫະຣັດ ປະເມີນວ່າ ແຜ່ນດິນໄຫວຄັ້ງນີ້ ມີຄວາມແຮງ 7.4 ຕາມເຄື່ອງວັນແທກແຜ່ນດິນໄຫວ Richter ແຕ່ບັດນີ້ ໄດ້ຫລຸດລົງມາເປັນ 7.0 ແລະສູນກາງ Pacific Tsunami ຂອງສະຫະຣັດທ່ີເກາະຮາວາຍ ທີ່ຕິດຕາມເບິ່ງໄພຊຶນາມິ ໃນເຂດມະຫາສະມຸດປາຊີຟິກ ກໍໄດ້ອອກ ຄຳເຕືອນກ່ຽວກັບ Tsunami ແຕ່ເວລານີ້ ໄດ້ຍົກເລີກໄປແລ້ວ. ແຜ່ນດິນໄຫວດັ່ງກ່າວໄດ້ເຮັດໃຫ້ ຕຶກອາຄານຫລາຍລັງ ໃນນະຄອນ ຫລວງ Jakarta ສັ່ນສະເທືອນ ເຮັດໃຫ້ພວກພນັກງານ ແຕກຕື່ນຕົກໃຈ ແລະພາກັນແລ່ນອອກໄປຍັງຖນົນຫົນທາງສາຍຕ່າງໆ.
ທີ່ກຳປູເຈັຍ : ສານອາຊຍາກັມສົງຄາມຂອງກຳປູເຈັຍ ທ່ີໄດ້ຮັບການໜຸນຫລັງຈາກ ສະຫະປະຊາຊາດ ປະກາດໃຫ້ຮູ້ໃນວັນພຸດມື້ນີ້ວ່າ ຕົນຈະອະນຸຍາດ ໃຫ້ມີການໄຂການສືບສວນສອບສວນຕື່ມອີກ ກ່ຽວກັບພວກອະດີດຜູ້ນຳຂະເໝັນແດງນັ້ນ. ທ່ານ Lars Olsen ໂຄສົກສານອາຊຍາກັມສະຫະປະຊາຊາດກ່າວວ່າ ໄອຍະການນາໆຊາດໃນສານດັ່ງກ່າວ ຈະໄດ້ຮັບອະນຸມັດໃຫ້ທຳການສເນີແນະ ກ່ຽວກັບການສອບສວນໃນດ້ານຕຸລາການຕື່ມອີກ. ບາດແລ້ວ ອິງຕາມການສືບສວນສອບສວນຕື່ມນີ້ ທາງສານຈະເປັນຜູ້ຕັດສິນໃຈວ່າ ຄວນຈະດຳເນີນຄະດີຜູ້ຕ້ອງສົງໄສຄົນໃດຕືມອີກຫລືບໍ? ຊື່ງການເຄື່ອນໄຫວທ່ີວ່ານີ້ ນາຍົກຣັຖມຸນຕີ Hun Sen ແຫ່ງກຳປູເຈັຍໄດ້ຄັດຄ້ານຢ່າງແຂງແຮງ. ທ່ານຮຸນເຊນ ເຄີຍກ່າວຊ້ຳແລ້ວຊ້ຳອີກວ່າ ການດຳເນີນຄະດີຄວນຈະຈຳກັດໃສ່ແຕ່ພວກຜູ້ຕ້ອງຫາ 5 ຄົນທ່ີໄດ້ຖືກກ່າວຫາແລ້ວນັ້ນ ແລະວ່າການເປີດຄະດີຕື່ມອີກ ອາດສາມາດກະຕຸ້ນ ໃຫ້ເກີດສົງຄາມກາງເມືອງຂຶ້ນອີກໄດ້ ແລະທ່ານຈະຢຸດການປະກອບ ສ່ວນຂອງສະຫະປະຊາຊາດ ໃນການດຳເນີນຄະດີເຫລົ່ານີ້ ຖ້າຈຳນວນຜູ້ຕ້ອງຫາ ມີເພີ່ມຂຶ້ນ.
ທີ່ປະເທດ Chile: ຜູ້ພິພາກສາສານທ່ານນຶ່ງໄດ້ສັ່ງໃຫ້ທຳການຈັບກຸມອະດີດເຈົ້າໜ້າທ່ີຮັກສາຄວາມສງົບ 129 ຄົນ ໃນຂໍ້ຫາລະເມີດສິດທິມະນຸດໃນລະຫວ່າງ ການປົກຄອງປະເທດຂອງອະດີດຈອມຜະເດັດການທະຫານ Augusto Pinochet ເປັນເວລາ 17 ປີນັ້ນ. ຜູ້ພິພາກສາVictor Montiglioໄດ້ອອກໝາຍຈັບໃນວັນອັງຄານວານນີ້ ສຳລັບພວກຈຳເລີຍເຫລົ່ານີ້ ທ່ີຮວມທັງສະມາຊິກຫລາຍຄົນຂອງກອງທັບອາກາດແລະຕຳຫລວດ. ພວກຈຳເລີຍທັງໝົດນີ້ເປັນອະດີດ ສາຍລັບ ໃນຜແນກສືບລັບ DINA ຂອງນາຍພົນ PinoChet ທ່ີໄດ້ຖືກສົງໄສວ່າ ປົກປິດຂ່າວ ກ່ຽວກັບການຫາຍສາບສູນໄປຂອງພວກນັກການເມືອງຝ່າຍຄ້ານນັ້ນ.
ໝາຍຈັບທ່ີວ່ານີ້ແມ່ນພົວພັນກັບການປຸກລະດົມຕໍ່ຕ້ານພວກຝ່າຍຄ້ານທ່ີນິຍົມຊ້າຍ ຂອງຣັຖບານທະຫານໃນ Chileແລະປະເທດອື່ນໆໃນເຂດອະເມຣິກາໃຕ້ ໃນຊຸມປີ1970 ນັ້ນ ແລະພົວພັນກັບການຫາຍສາບສູນໄປຂອງສະມາຊິກພັກຄອມມີວນິດຫລາຍຄົນ ຈາກທີ່ໝັ້ນຂອງເຂົາເຈົ້າ ຢູ່ຖນົນ Conferencia ໃນປີ 1976 ນັ້ນ.