ທີ່ Scotland : ສະພາຂອງ Scotland ໄດ້ຮຽກປະຊຸມສຸກເສີນຂຶ້ນໃນວັນຈັນມື້ນີ້ ເພື່ອ ທຳການສອບສວນກໍລະນີການຕັດສິນໃຈປ່ອຍໂຕຜູ້ວາງລະເບີດເຮືອບິນ Pan AM ທີ່ໃກ້ຈະຕາຍ ບົນພື້ນຖານຂອງຄວາມເມດຕາສົງສານນັ້ນ. ທາງສະພາຢາກທຳການສອບຖາມທ່ານ Kenny McAskill ຣັຖມຸນຕີ ກະຊວງຍຸຕິທັມ ກ່ຽວກັບຄຳຕັດສິນໃຈຂອງທ່ານ ໃນການປ່ອຍໂຕນາຍ Abdel Baset al-Megrahi ຊຶ່ງເປັນຄົນດຽວທ່ີຖືກສານຕັດສິນວ່າມີ ຄວາມຜິດໃນຂໍ້ຫາວາງລະເບີດໃສ່ຖ້ຽວບິນເລກທີ 103 ຂອງສາຍການ ບິນ Pan Am ໃນປີ 1988 ທ່ີໄດ້ເຮັດໃຫ້ຜູ້ໂດຍສານພ້ອມທັງລູກເຮືອ 270 ຄົນເສັຍຊີວິດໄປນັ້ນ. ພວກພັກຝ່າຍຄ້ານພາກັນວາງແຜນ ທີ່ຈະລົງມະຕິບໍ່ໄວ້ວາງໃຈຣັຖບານກ່ຽວກັບການຕັດສິນໃຈດັ່ງກ່າວ ຊື່ງມີທາງເປັນໄປໄດ້ວ່າ ອາດຈະພາໃຫ້ມີການຊັບຊ້ອນຄນະຣັຖບານຢ່າງສີ້ນເຊີງ. ໄດ້ມີການຕຳໜິຕິຕຽນຢ່າງໃຫຍ່ ຕໍ່ການປ່ອຍໂຕນາຍ Megrahi ໃນ ອາທິດແລ້ວນີ້. ປະທານາທິບໍດີບາຣັກໂອບາມາ ຣັຖມຸນຕີການຕ່າງປະເທດ Hillary Clinton ພ້ອມທັງຫົວໜ້າຫ້ອງການສັນຕິບານ FBI ຂອງສະຫະຣັດ ຕ່າງກໍໄດ້ສະແດງຄວາມບໍ່ພໍໃຈຢ່າງແຮງອອກມາ. ນອກນັ້ນ ຍັງມີການຂົ່ມຂູ່ຈາກພົນລະເມືອງສະຫະຣັດ ທ່ີຈະ boycott ຫລືຄັດຄ້ານ ບໍ່ຊຶ້ນສິນຄ້າ ແລະການບໍລິການຕ່າງໆຂອງ Scotland ເຊັ່ນກັນ. ນາຍ Megrahi ໄດ້ເດີນທາງກັບຄືນສູ່ລີເບັຍໃນວັນພະຫັດອາທິດແລ້ວນີ້ ໂດຍໄດ້ຮັບການຕ້ອນຮັບແບບວິຣະບຸຣຸດ. ກ່າວກັນວ່າ ຜູ້ກ່ຽວວາງ ແຜນຈະຂຽນປຶ້ມຫົວນຶ່ງ ທ່ີຈະເລົ່າໝົດທຸກສິ່ງທຸກຢ່າງ ໂດຍຈະເປີດເຜີຍຂໍ້ມູນໃໝ່ໆ ກ່ຽວກັບການໂຈມຕີຂອງພວກກໍ່ການຮ້າຍ ທ່ີມີຜູ້ຄົນ ເສັຍຊີວິດຫລາຍທ່ີສຸດ ໃນອັງກິດນັ້ນ.
ກ່ຽວກັບໄຟປ່າທີ່ປະເທດ Greece: ພວກດັບເພີງໃນປະເທດ Greece ຍັງສືບຕໍ່ ຕໍ່ສູ້ກັບໄຟປ່າອີກໃນມື້ນີ້ ຢູ່ນອກກຸງ Athens ໂດຍໃຊ້ພວກເຮືອບິນທັມມະດາແລະເຮືອບິນເຮລີຄອບເຕີ ຖິ້ມຖົງນ້ຳລົງໃສ່ແປວໄຟ ທ່ີກຳລັງລຸກລາມໄໝ້ໄປຢູ່ນັ້ນ. ການປະຕິບັດງານດັ່ງກ່າວໄດ້ເຣີ່ມຂຶ້ນຄືນ ໃນຕອນເຊົ້າມືດວັນຈັນມື້ນີ້ ໂດຍມີພນັກງານມອດໄຟຫລາຍກວ່າ 2 ພັນຄົນ ຊ່ວຍກັນເຮັດວຽກ ເພື່ອປ້ອງກັນບໍ່ໃຫ້ໄຟລາມໄປໄໝ້ພວກບ້ານເຮືອນ ຢູ່ໃນເຂດພາກຕາເວັນອອກສຽງເໜືອຂອງນະຄອນຫລວງນັ້ນ. ບັນດາເຈົ້າໜ້າທ່ີກ່າວວ່າ ໄຟຍັງສືບຕໍ່ລາມໄປສູ່ພວກປະຊາຄົມຕ່າງໆຢູ່ ເຖິງແມ່ນເຂົາເຈົ້າໄດ້ເຮັດວຽກຢ່າງຂຸ້ນຂ້ຽວ ເພື່ອມອດໄຟໄໝ້ໃນລະຫວ່າງທ່ີລົມໄດ້ເຊົາພັດແຮງໄປຊົ່ວໄລຍະນື່ງກໍຕາມ. ຄາດວ່າລົມຈະພັດແຮງຂຶ້ນອີກ ໃນຕອນ ສວາຍມື້ນີ້. ພວກປະຊາຊນຊາວ Greece ຫລາຍພັນຄົນ ໄດ້ພາກັນນອນຄ້າງຄືນວັນອາທິດວານນີ້ຢູ່ນອກບ້ານເຮືອນຂອງເຂົາເຈົ້າ ຫລັງຈາກອົບພະຍົບ ໜີອອກຈາກບໍລິເວນໄຟໄໝ້ນັ້ນແລ້ວ. ໄຟໄໝ້ໄດ້ເຣີ່ມຂຶ້ນໃນວັນສຸກຜ່ານມາ ແລະໄດ້ລາມໄປທົ່ວບໍລິເວນກວ້າງ 50 ຫລັກກິໂລແມັດ.
ຂ່າວກ່ຽວກັບ ອົງການສືບລັບ CIA: ໜັງສືພິມໃຫຍ່ສະບັບນຶ່ງໃນສະຫະຣັດລາຍງານວ່າ ກະຊວງຍຸຕິທັມຂອງສະຫະຣັດກຳລັງສະເໜີແນະໃຫ້ດຳເນີນຄະດີບາງກໍລະນີ ທ່ີມີການກ່າວຫາວ່າ ພນັກງານສອບສວນຂອງອົງການ CIA ໄດ້ລະເມີດສິດທິ ຂອງພວກນັກໂທດນັ້ນ. ໜັງສືພິມ New York Times ອ້າງ
ແຫລ່ງຂ່າວທ່ີບໍ່ບອກຊື່ ວ່າຫ້ອງການວ່າດ້ວຍຄວາມຮັບຜິດຊອບດ້ານອາຊີບ ຫລື Office of Professional Responsibility ໄດ້ໃຫ້ຄຳສະເໜີແນະດັ່ງກ່າວ ຕໍ່ທ່ານ Eric Holder ຣັຖມຸນຕີກະຊວງຍຸຕິທັມຂອງສະຫະຣັດ ແລະເວລານີ້ ທ່ານ Holder ກໍກຳລັງຊັ່ງຊາພິຈາຣະນາວ່າ ຈະແຕ່ງຕັ້ງໄອຍະການຂຶ້ນຫລືບໍ ເພື່ອທຳການສືບສວນກ່ຽວກັບວິທີການປະຕິບັດການສອບປາກຄຳຂອງພນັກງານ CIA ໃນສໄມຣັຖບານອະດີດປະທານາທິບໍດີ George W. Bush ນັ້ນ ຊື່ງການເຄື່ອນໄຫວທ່ີວ່ານີ້ ສາມາດເຜີຍແບ ພວກພນັກງານແລະພວກສັນຍາຈ້າງຂອງອົງ ການ CIA ໃຫ້ຖືກດຳເນີນຄະດີອາຍາໄດ້ ໃນຂໍ້ຫາຖານປະຕິບັດຢ່າງບໍ່ຖືກຕ້ອງຕໍ່ພວກຜູ້ຕ້ອງສົງໄສເປັນຜູ້ກໍ່ການຮ້າຍນັ້ນ.
ແຕ່ປະທານາທິບໍດີບາຣົກ ໂອບາມາ ເຄີຍກ່າວວ່າທ່ານຢາກປ່ອຍເຣື່ອງ ນີ້ໃຫ້ເປັນອະດີດໄປ ເພື່ອຫລີກລ່ຽງບໍ່ຢາກໃຫ້ລາຍການຂອງຣັຖບານຂອງທ່ານ ຈົມຢູ່ໃນການຂັດແຍ່ງຜິດຖຽງກັນ ກ່ຽວກັບບັນຫາຕ່າງໆໃນອະດີດນັ້ນ.
ທີ່ອັຟການີສຖານ: ອົງການ NATO ກ່າວວ່າ ທະຫານຂອງຕົນ 2 ຄົນເສັຍຊີວິດໃນພາກໃຕ້ຂອງອັຟການີສຖານໃນຕອນແລງວັນອາທິດວານນີ້ ໃນມື້ດຽວກັນກັບທີ່ນາຍທະຫານຂັ້ນສູງສຸດຂອງສະຫະຣັດ ກ່າວວ່າ ສະຖານະການໃນອັຟການິສຖານ ກຳລັງຮ້າຍແຮງຫລາຍແລະເຊື່ອມໂຊມລົງນັບມື້. ໃນການໃຫ້ສັມພາດຂ່າວ ທາງໂທຣະພາບກັບອົງການຂ່າວ CNN ພົນເຮືອເອກ Mike Mullen ປະທານຫົວໜ້າເສນາທິການຮ່ວມຂອງກອງທັບສະຫະຣັດ ກ່າວວ່າ ພວກກະບົດຕາລີບັນໄດ້ມີຍຸດທະວິທີທ່ີທັນສໄມ ຂຶ້ນກວ່າເກົ່າ. ໃນການໃຫ້ສັມພາກບັນນື່ງອີກຕ່າງຫາກ ພົນເອກ Mullen ກ່າວວ່າ ທ່ານມີຄວາມເປັນຫ່ວງ ວ່າຈະສູນເສັຍການສນັບສນຸນຈາກປະຊາຊົນອະເມຣິກັນ ສຳລັບສົງຄາມໃນອັຟການີສຖານນັ້ນ. ທ່ານກ່າວຕື່ມວ່າ ກອງທັບສະຫະຣັດ ເພ່ງເລັງໃສ່ການປ້ອງກັນບໍ່ໃຫ້ພວກກໍ່ການຮ້າຍທຳ ການໂຈມຕີອີກຄັ້ງໃໝ່ໃນແຜ່ນດິນຂອງສະຫະຣັດ ແລະຍຸດທະສາດທີ່ ທາງກອງທັບດຳເນີນຢູ່ໃນປັດຈຸບັນ ໃນອັຟການີສຖານນັ້ນ ກໍມີເຈດຕະນາເພື່ອທຳລາຍແລະປາບພວກເຄືອຂ່າຍ al-Qaida ໃຫ້ຜ່າຍແພ້ ພ້ອມທັງກຸ່ມຕາລີບັນແລະພວກພັນທະມິດຫົວຮຸນແຮງຈັດຂອງເຂົາ.
ກ່ຽວກັບນີວເຄລັຍຂອງເກົາຫລີເໜືອ: ນັກການທູດຂັ້ນອາວຸໂສຂອງສະຫະຣັດທ່ານນຶ່ງກ່າວວ່າ ຣັຖບານກຸງວໍຊິງຕັນກຳລັງຮ່ວມມືຢ່າງໃກ້ຊິດກັບເກົາຫລີໃຕ້ ເພື່ອໃຫ້ໜັ້ນໃຈວ່າ ການລົງໂທດຂອງສະຫະປະຊາຊາດຕໍ່ເກົາຫລີເໜືອນັ້ນ ໄດ້ຮັບການປະຕິບັດຕາມ. ທູດພິເສດຂອງສະຫະຣັດ ທ່ານ Philip Goldberg ກ່າວໃນວັນຈັນມື້ນີ້ວ່າ ການຮື້ຟື້ນລາຍການທ່ອງທ່ຽວຂອງເກົາຫລີໃຕ້ ໄປຍັງເກົາຫລີເໜືອ ແລະການຂະຫຍາຍເຂດອຸດສາຫະກຳຮ່ວມອອກໄປນັ້ນ ຄົງຈະບໍ່ແຊກແຊງການປະຕິບັດມາດຕາການລົງໂທດຂອງສະຫະປະຊາຊາດ ຕໍ່ເກົາຫລີເໜືອ ແຕ່ຢ່າງໃດ. ຫລັງຈາກການປະຊຸມກັນຫລາຍຄັ້ງກັບບັບນດາເຈົ້າໜ້າທ່ີເກົາຫລີໃຕ້ໃນວັນຈັນມື້ນີ້ທ່ີກຸງໂຊນ ທ່ານ Goldberg ກ່າວວ່າ ສະຫະຣັດຈະທຳ ຄວາມກົດດັນຕໍ່ເກົາຫລີເໜືອ ຕໍ່ໄປ ເພື່ອໃຫ້ຢຸດໂຄງການຜລິດອາວຸດນີວເຄລັຍນັ້ນ. ທ່ານ Goldberg ໄດ້ທຳການຢ້ຽມຢາມສິງກະໂປແລະໄທມາແລ້ວ ແລະມີກຳນົດຈະເດີນທາງຕໍ່ໄປຍັງກຸງໂຕກຽວ ຫລັງຈາກ ຢຸດແວ່ທ່ີກຸງໂຊນແລ້ວ ຊື່ງເປັນພາກສ່ວນນຶ່ງໃນການເຄື່ອນໄຫວຢ້ຽມຢາມຂົງເຂດນັ້ນ.