ທາງການລາວ ແລະ ໄທ ຍັງຄົງບໍ່ສາ ມາດພິສູດສັນຊາດຂອງບັນດາແຮງງານ ລາວທີ່ຈົດທະບຽນທຳງານຢູ່ໃນໄທຢ່າງ ຖືກຕ້ອງໄດ້ທັງໝົດ ໃນຂະນະທີ່ທາງການໄທນັ້ນ ກໍໄດ້ກຳນົດໃຫ້ແຮງງານ ລາວທຸກຄົນ ຕ້ອງແຈ້ງຈົດທະບຽນອີກຄັ້ງໃໝ່ ພາຍໃນທ້າຍເດືອນນີ້ ຊຶ່ງກໍຈະເປັນໂອກາດສຸດທ້າຍຂອງການແຈ້ງຈົດ ທະບຽນເພື່ອຂໍອານຸຍາດທຳງານຢູ່ໃນໄທ ແລ້ວ.
ທ່ານ ໄພທຸນ ແກ້ວທອງ ລັດຖະມົນຕີວ່າການກະຊວງແຮງງານຂອງໄທ ໄດ້ຖະແຫລງຢືນ ຢັນວ່າ ບັນດາແຮງງານຈາກລາວ, ພະມ້າ ແລະ ກຳປູເຈຍ ທຸກຄົນ ທີ່ທຳງານຢູ່ໃນປະເທດໄທ ຈະຕ້ອງແຈ້ງຈົດທະບຽນ ເພື່ອຂໍອະນຸຍາດທຳງານຢ່າງຖືກຕ້ອງຢູ່ໃນປະເທດໄທຕໍ່ໄປພາຍໃນວັນທີ 31 ກໍລະກົດນີ້ ເປັນຢ່າງຊ້າ. ຖ້າຫາກວ່າ ກາຍກຳນົດການດັ່ງກ່າວແລ້ວນັ້ນ ກໍຈະເຮັດໃຫ້ແຮງງານຈາກທັງສາມປະເທດດັ່ງກ່າວ ບໍ່ມີສິດທີ່ຈະທຳງານຢູ່ໃນປະເທດໄທໄດ້ອີກຕໍ່ໄປ ແລະ ກໍຈະຖືກສົ່ງກັບຄືນໄປປະເທດທີ່ເປັນພູມລຳເນົາໃນທັນທີ ເມື່ອຖືກທາງການໄທຈັບກຸມຕົວໄດ້.
ໃນປະຈຸບັນນີ້ ທາງການກະຊວງແຮງງານຂອງໄທປະເມີນວ່າ ມີແຮງງານລາວ, ພະມ້າ ແລະ ກຳປູເຈຍ ຈຳນວນ ລວມກັນຫລາຍກວ່າ ສອງລ້ານຄົນ ທີ່ທຳງານຢູ່ໃນປະເທດໄທ ທັງທີ່ຜິດກົດ ໝາຍ ແລະ ຖືກຕ້ອງຕາມກົດໝາຍ ຊຶ່ງການເປີດໂອກາດໃຫ້ແຮງງານຈາກລາວ, ພະມ້າ ແລະ ກຳປູເຈຍຕ້ອງຈົດແຈ້ງທະບຽນດັ່ງກ່າວນີ້ ກໍຖືວ່າເປັນມາດຕະການສ່ວນໜຶ່ງ ທີ່ຈະຮັບປະກັນໃຫ້ກັບການຄຸ້ມຄອງສິດທິ ແລະ ສະຫວັດດີການດ້ານຕ່າງໆ ຕາມກົດໝາຍຢ່າງຄົບຖ້ວນ. ກັບທັງຍັງຈະເປັນການຮັບປະກັນດ້ວຍວ່າ ແຮງງານເຫລົ່ານີ້ ຈະບໍ່ຕົກໄປເປັນເຍື່ອຂອງການຂະບວນຄ້າມະນຸດ ຂ້າມຊາດຢູ່ໃນໄທອີກດ້ວຍ.
ນອກຈາກນີ້ ເພື່ອເປັນການປະຕິບັດຕາມ ຂໍ້ຕົກລົງວ່າດ້ວຍການພັດທະນາການຈ້າງງານ ທີ່ທາງການໄທໄດ້ລົງນາມຮ່ວມກັນກັບທາງການລາວ, ພະມ້າ ແລະ ກຳປູເຈຍ ນັບຕັ້ງແຕ່ປີ 2003 ເປັນຕົ້ນມາແລ້ວນັ້ນ ກໍຍັງໄດ້ເປັນຜົນເຮັດໃຫ້ທາງການ ໄທຕ້ອງຮ່ວມມືກັບທາງການລາວ, ພະມ້າ ແລະ ກຳປູເຈຍ ດຳເນີນການພິສູດສັນຊາດຂອງແຮງງານ ລວມໄປເຖິງ ການອອກໜັງສືເດີນທາງ ຫລື ພາດສພອດ ໃຫ້ກັບແຮງງານທຸກຄົນທີ່ເປັນພົນລະເມືອງຂອງລາວ, ພະມ້າ ແລະ ກຳປູເຈຍ ອີກດ້ວຍ.
ສຳລັບແຮງງານລາວທີ່ແຈ້ງຈົດທະບຽນທຳງານຢູ່ໃນໄທຢ່າງຖືກຕ້ອງຕາມກົດໝາຍ ຊຶ່ງມີຈຳນວນເກືອບ 80.000 ຄົນ ໃນປະຈຸບັນ ກໍປາກົດວ່າ ໄດ້ຜ່ານການພິສູດສັນຊາດລາວແລ້ວ ຈຳນວນ 50.000 ກວ່າ ຄົນ ແລະ ເຖິງແມ່ນວ່າ ຈະຍັງຄົງເຫລືອແຮງງານລາວອີກຫລາຍກວ່າ 20.000 ຄົນ ທີ່ຍັງບໍ່ໄດ້ຜ່ານການພິສູດສັນຊາດກໍຕາມ ຫາກແຕ່ທາງການລາວ ແລະ ໄທ ກໍໄດ້ຕົກລົງທີ່ຈະຮ່ວມມືກັນດຳເນີນການດັ່ງກ່າວຕໍ່ໄປ ລວມທັງຍັງຈະຮ່ວມມືກັນປ້ອງກັນ ແລະ ປາບປາມການ ຄ້າມະນຸດຂ້າມຊາດອີກດ້ວຍ.
ແຕ່ຢ່າງໃດກໍຕາມ ສຳລັບທາງດ້ານ ອົງກອນຄຸ້ມຄອງແຮງງານຕ່າງດ້າວ ຈາກ ລາວ, ພະ ມ້າ ແລະ ກຳປູເຈຍ ໃນປະເທດໄທ ຊຶ່ງເປັນອົງການທີ່ບໍ່ຂຶ້ນກັບລັດຖະບານໃນໄທນັ້ນ ກໍໄດ້ ປະເມີນວ່າ ມີແຮງງານ ລາວ, ພະມ້າ ແລະ ກຳປູເຈຍຢູ່ໃນໄທຫລາຍກວ່າ 4ລ້ານຄົນໃນປັດ ຈຸບັນນີ້. ໂດຍໃນຈຳນວນດັ່ງກ່າວກໍປາກົດວ່າ ໄດ້ແຈ້ງຈົດທະບຽນທຳງານຢ່າງຖືກຕ້ອງພຽງແຕ່ 700.000 ກວ່າຄົນ ເທົ່ານັ້ນ ຊຶ່ງກໍໝາຍຄວາມວ່າ ຍັງເຫລືອອີກຫລາຍກວ່າ 3ລ້ານຄົນ ທີ່ເປັນແຮງງານລັກລອບທຳງານໂດຍຜິດກົດໝາຍ ແລະ ກໍມີຄວາມສ່ຽງຢ່າງສູງທີ່ຈະຕ້ອງຕົກໄປເປັນເຫຍື່ອຂອງຂະບວນການຄ້າມະນຸດຂ້າມຊາດຢູ່ໃນປະເທດໄທ.
ສຳລັບໃນສ່ວນຂອງແຮງງານລາວນັ້ນ ອົງການຄຸ້ມຄອງແຮງງານດັ່ງກ່າວ ກໍໄດ້ປະມານການວ່າ ມີຢູ່ຫລາຍກວ່າ 4ແສນຄົນ ແລະ ກໍມີແນວໂນ້ມ ທີ່ຈະເພີ້ມຫລາຍຂຶ້ນນັບມື້ ເນື່ອງຈາກວ່າຢູ່ໃນປະເທດລາວ ມີຕຳແຫນ່ງງານຮອງຮັບ ບໍ່ພຽງພໍກັບທັງຍັງ ມີ ຄ່າຈ້າງຕ່ຳຫລາຍເມື່ອທຽບໃສ່ກັບລະ ດັບຄ່າຄອງຊີບຢູ່ໃນລາວທີ່ເພີ້ມສູງຂຶ້ນ ຢ່າງຕໍ່ເນື່ອງ. ເພາະສະນັ້ນ ຈຶ່ງເຮັດໃຫ້ແຮງງານ ລາວ ໄດ້ພາກັນຫລັ່ງໄຫລມາລັກລອບທຳງານ ຢູ່ໃນໄທເພີ້ມຫລາຍຂຶ້ນນັບມື້, ໂດຍມີບັນດາ ນາຍໜ້າຄ້າແຮງງານ ທັງທີ່ຢູ່ໃນລາວ ແລະ ໄທ ຄອຍຮັບ ແລະ ສົ່ງ ລວມໄປເຖິງການຈັດຫາງານໃຫ້ທຳເພື່ອແລກປ່ຽນກັບຄ່ານາຍໜ້າ ໃນ ອັດຕາ 5.000ບາດ ຕໍ່ແຮງງານລາວໜຶ່ງຄົນນັ້ນເອງ.
ຊົງຣິດ ໂພນເງິນ ລາຍງານມາຈາກບາງກອກ ໃນວັນທີ 21 ກໍລະກົດ 2009