<!-- IMAGE -->
ເມື່ອວັນທີ່ 16 ມີຖຸນາເດືອນນີ້ ກະຊວງຕ່າງປະເທດສະຫະລັຖໄດ້ອອກລາຍງານວ່າດ້ວຍການລັກລອບຄ້າຂາຍມະນຸດປະຈຳປີ 2009.ລາຍງານສະບັບດັ່ງກ່າວ ຊື່ງປີນີ້ພິຈາລະນາເບິ່ງສະພາບການຢູ່ໃນ 175 ປະເທດ ແມ່ນ ສະແດງໃຫ້ເຫັນພາບລວມຢູ່ໃນທົ່ວໂລກຂອງບັນຫາການໃຊ້ຄົນເປັນຂ້າທາດໃນຍຸກສະມັຍໃໝ່ນີ້. ໃນການປະຕິບັດທີ່ສອດຄ່ອງກັບອະນຸສັນຍາຂອງສະຫະປະຊາຊາດ ວ່າດ້ວຍການປ້ອງກັນ ປາບປາມ ແລະລົງໂທດການລັບລອບຄ້າຂາຍມະນຸດ ກົດໝາຍຂອງອາເມລິກາຕີຄວາມໝາຍຂອງການລັບລອບຄ້າຂາຍມະນຸດ ວ່າເປັນການກໍ່ໃຫ້ເກີດການຄ້າປະເວນີ ຫລືໃຫ້ໄດ້ຮັບ ຫລືວ່າຮັກສາແຮງງານ ຫລືການບໍລິການຂອງຄົນຜູ້ນື່ງ ໂດຍການໃຊ້ກຳລັງ ໃຊ້ວິທີຫລອກລວງສໍ້ໂກງ ຫລືບັງຄັບຂູ່ເຂັນ ໂດຍມີວັດຖຸປະສົງເພື່ອເຮັດໃຫ້ຄົນຜູ້ນັ້ນຕົກຢູ່ໃນຖານະ ເປັນຄົນຮັບໃຊ້ ເປັນທາດຮັບໃຊ້ ເປັນຕົວປະກັນໜີ້ສິນ ຫລືເປັນຂ້າທາດໂດຍບໍ່ເຕັມໃຈ. ອົງການແຮງງານສາກົນປະເມີນວ່າ ໃນເວລານື່ງໆນັ້ນ ມີພວກຄົນຜູ້ໃຫຍ່ແລະເດັກນ້ອຍ ຈຳນວນ 12 ລ້ານ 3 ແສນຄົນຖືກບັງຄັບໃຫ້ເຮັດວຽກຄືກັນກັບ ເປັນຂ້າທາດຢູ່ໃນທົ່ວໂລກ ຊຶ່ງໃນຈຳນວນດັ່ງກ່າວນີ້ ມີນຶ່ງລ້ານສາມແສນເກົ້າໝື່ນຄົນທີ່ຕົກເປັນເຫຍື່ອ ຮັບໃຊ້ ບໍລິການທາງເພດ. 56 ເປີເຊັນຂອງພວກເຄາະຮ້າຍຖືກບັງຄັບໃຊ້ແຮງງານຢູ່ໃນທົ່ວໂລກ ແມ່ນເປັນແມ່ຍິງແລະເດັກສາວ.
ຜົນກະທົບຂອງການລັກລອບຄ້າຂາຍມະນຸດນີ້ແມ່ນເປັນຄວາມຫາຍະນະອັນໃຫຍ່ ຫລວງ ໂດຍທີ່ພວກເຄາະຮ້າຍທັງຫລາຍນັ້ນມັກຈະໄດ້ຮັບຄວາມເຈັບປວດທາງກາຍແລະໃຈ ຖືກຂົ່ມຂືນຊຳເລົາ ຖືກຂົ່ມຂູ່ຈະທຳຮ້າຍຮ່າງກາຍ ແກ່ທັງຕົນເອງ ແລະຄອບຄົວຂອງຕົນ ຫລືຮອດຖືກຂູ່ວ່າຈະເອົາຊີວິດກໍມີ. ແຕ່ຄວາມຫາຍະນະນີ້ ແມ່ນກວ້າງໄກ ກາຍບຸກຄົນທີ່ຕົກເປັນຜູ້ເຄາະຮ້າຍໄປອີກ ໝາຍຄວາມວ່າ ການລັບລອບຄ້າຂາຍມະນຸດ ຄືອາຊະຍາກຳທີ່ເອົາສິດທິ ແລະເສລີພາບຕ່າງໆຂອງມະນຸດໄປຈາກຜູ້ທີ່ເຄາະຮ້າຍຕົກເປັນເຫຍື່ອຂອງມັນ ເພີ່ມຄວາມສ່ຽງຕໍ່ສຸຂະພາບໃນທົ່ວໂລກ ເປັນເຊື້ອໄຟປ້ອນການເຕີບໂຕຂອງເຄືອຂ່າຍຂອງພວກອາຊະຍາກອນທີ່ມີການຈັດຕັ້ງກັນເປັນກ້ອນເປັນກຸ່ມ ແລະນອກນັ້ນແລ້ວ ກໍຍັງສາມາດທີ່ຈະຮັກສາລະດັບຄວາມຍາກຈົນໃຫ້ຍືນຍົງຖາວອນຕໍ່ໄປ ແລະໜ່ວງນ່ຽວຂັດ ຂວາງການພັທະນາຢູ່ໃນຫລາຍໆເຂດ.
ທ່ານນາງຮິລແລຣີ ຄລິນຕັນ ລັຖມຸນຕຣີຕ່າງປະເທດສະຫະຣັຖ ກ່າວໃນຖ້ອຍຖະແລງແນະນຳລາຍງານຂອງກະຊວງຕ່າງປະເທດໃນປີນີ້ ວ່າ ລັຖບານໂອບາມາ ມອງເຫັນການປາບປາມການລັບລອບຄ້າຂາຍມະນຸດ ວ່າເປັນພາກສ່ວນນື່ງທີ່ສຳຄັນທີ່ສຸດຂອງນະໂຍບາຍຕ່າງປະເທດຂອງພວກເຮົາ ຊຶ່ງທ່ານນາງຮິລແລຣີກ່າວຕໍ່ໄປວ່າ:
“ພ້ອມກັບຣາຍງານນີ້, ພວກເຮົາຫວັງວ່າມັນຈະເປັນດວງໄຟຊ່ອງປະກາຍອັນແຮງ ກ້າໃຫ້ເຫັນເຖິງຂນາດແລະວົງກ້ວາງຂອງການໃຊ້ແຮງງານຫຼືການຄ້າມະນຸດ ກໍຄື ຂ້າທາດຂອງສມັຍໃຫມ່ ຊຶ່ງທາງຣັຖບານທຸກປະເທດຈະ ສາມາດມອງເຫັນເຖິງຂັ້ນ ຕອນການປະຕິບັດງານວ່າມີຄວາມກ້າວຫນ້າສ່ຳໃດແລະພ້ອມດຽວກັນນັ້ນມີສ່ວນ ເພີ່ມຕື່ມທີ່ຍັງມີຄວາມຈຳເປັນຈະຕ້ອງໃຫ້ທຳ. ການຄ້າປະເວນີນີ້ແມ່ນເຕີບ ໂຕງອກງາມໃນເງົາມືດ ແລະງ່າຍໃນ ການບົດບັງຊຶ່ງອາດຈະຖືກມອງຂ້າມ ແລະເບິ່ງບໍ່ເຫັນ, ຄ້າຍກັບວ່າເປັນເຣື່ອງທີ່ເກີດກັບແຕ່ຄົນອື່ນແລະບ່ອນອື່ນ ຊຶ່ງບໍ່ ແມ່ນເຣື່ອງເຮົາ ແຕ່ມັນບໍ່ເປັນແບບນັ້ນ. ການຄ້າມະນຸດນີ້ແມ່ນເປັນການກະທຳ ທີ່ຜິດກົດຫມາຍທີ່ກ່ຽວຂ້ອງ ກັບທຸກໆປະເທດໃນໂລກ ຊຶ່ງມັນຮວມໄປເຖິງ ປະເທດເຮົາເອງນຳ.”
ທ່ານນາງ ຮິລແລຣີ ຄລິນຕັນ ກ່າວໃນຈົດໝາຍທີ່ເປັນບົດນຳຂອງລາຍງານ ວ່າດ້ວຍການຄ້າຂາຍມະນຸດ ສະບັບປີ 2009 ນີ້ວ່າ “ການເຮັດໃຫ້ ການຄ້າມະນຸດຢູ່ໃນທົ່ວໂລກຍຸດຕິລົງນັ້ນ ແມ່ນເປັນບູລິມະສຸດອັນນຶ່ງຂອງສະຫະລັຖ ທີ່ສອດຄ່ອງກັນກັບຄຸນຄ່າຂອງຊາວອາເມລິກັນ ທີ່ໃຫ້ຄວາມສຳຄັນພິເສດແກ່ສິດທິມະນຸດ ປະຊາທິປະໄຕ ແລະການປົກຄອງ ດ້ວຍຕົວບົດກົດໝາຍ ຊຶ່ງຂ້າພະເຈົ້າໝັ້ນໃຈວ່າ ພວກເຮົາທັງໝົດຮວມກັນ ສາມາດທີ່ຈະສ້າງຄວາມແຕກຕ່າງຂື້ນມາໄດ້ ຢູ່ໃນທົ່ວໂລກໃຫ້ແກ່ທຸກໆຊີວິດ ທີ່ຖືກຖອດຖອນເສລີພາບຂອງພວກເຂົາເຈົ້າໄປນັ້ນ.