ການເມືອງອິຣ່ານ: ໂທລະພາບແຫ່ງຣັດຂອງອິຣ່ານລາຍງານວ່າ Ayatollah Ali Kha-menei ຜູ່ນຳສູງສຸດຂອງອິຣ່ານ ໄດ້ບອກທ່ານ Mir Hossein Mousawi ທ່ີໄດ້ປາໄຊໃນການເລືອກຕັ້ງປະທານາທິບໍດີນັ້ນ ໃຫ້ດຳເນີນການຮ້ອງຮຽນຂອງທ່ານ ກ່ຽວກັບການເລືອກຕັ້ງທ່ີເກີດເປັນບັນຫາໂຕ້ແຍ່ງກັນນັ້ນ ຜ່ານວິທີທາງກົດໝາຍ. ລາຍງານດັ່ງກ່າວນີ້ ມີຂຶ້ນ ຫລັງຈາກມີການປະທ້ວງຢູ່ຕາມຖນົນຫົນທາງ ເປັນເວລາ 2 ມື້ ຊຶ່ງບາງຄັ້ງ້ໄດ້ດຳເນີນໄປຢ່າງຮຸນແຮງ ໃນນະຄອນຫລວງເຕ່ຣ່ານ ຫລັງຈາກພວກເຈົ້າໜ້າທ່ີປະກາດວ່າ ປະທານາທິບໍດີມັກມຸດ ອະມາດີເນຈາດ ໄດ້ຮັບໄຊຊະນະຢ່າງຖ້ວມລົ້ນໃນການ ເລືອກຕັ້ງໃນວັນສຸກຜ່ານມານີ້. ປະທານາທິບໍດີອະມາດີເນຈາດເອງ ໄດ້ອອກມາກ່າວວ່າ ການເລືອກຕັ້ງໄດ້ດຳເນີນໄປຢ່າງເສຣີແລະຍຸຕິທັມ.
ອີສຣາແອນແລະປາເລສໄຕນ໌ : ສະຫະພາບຢູໂຣບແລະສະຫະຣັດກ່າວວ່າການສນັບສນຸນແບບມີເງື່ອນໄຂຂອງນາຍົກຣັຖມຸນຕີອີສຣາແອນ ຂໍ່ການສ້າງຕັ້ງຣັດປາເເລສໄຕນ໌ນັ້ນ ຖືວ່າເປັນບາດກ້າວສຳຄັນໄປສູູ່ສັນຕິພາບໃນພາກຕາເວັນອອກກາງ. ທ່ານເບັນຈາມິນ ເນຕັນຢາຮູ ນາຍົກຣັຖມຸນຕີອີສຣາແອນ ໄດ້ສນັບສນຸນເປົ້າໝາຍຂອງການສ້າງຕັ້ງປະເທດປາເເລສໄຕນ໌ ໂດຍຕັ້ງເງື່ອນໄຂທ່ີເຂັ້ມງວດຂຶ້ນເປັນເທື່ອທຳອິດ ໃນຄຳປາໄສກ່ຽວກັບນະໂຍບາຍຂອງທ່ານ ໃນວັນອາທິດວານນີ້. ທ່ານເນຕັນຢາຮູ ກ່າວວ່າ ທ່ານຈະຮັບເອົາປະເທດປາເເລສໄຕນ໌ ຕາບໃດທ່ີປະເທດດັ່ງກ່າວບໍ່ມີກຳລັງທະຫານ ແລະຮັບຮູ້ອີສຣາແອນໃນຖານະເປັນປະເທດນື່ງຂອງປະຊາ ຊົນຊາວຢີວ. ໂຄສົກຂອງທ່ານມັກມຸດ ອັບບັສ ປະທານາທິບໍດີປາແລສໄຕນ໌ປະນາມ ຄຳປາໄສຂອງທ່ານເນຕັນຢາຮູວ່າ ເປັນການລອບທຳລາຍຄວາມພະຍາ ຍາມເພື່ອສ້າງສັນຕິພາບ. ແຕ່ສະຫະພາບຢູໂຣບແລະສະຫະຣັດ ຕ່າງກໍເວົ້າວ່າ ການທີ່ທ່ານເນຕັນຢາຮູ ເວົ້າເຖິງການສ້າງຕັ້ງປະເທດປາເເລສໄຕນ໌ນັ້ນ ກໍຖືວ່າເປັນ ບາດກ້າວ ໄປຂ້າງໜ້າແລ້ວ.
ກ່ຽວກັບອັຟການີສຖານ: ທະຫານນາໆຊາດໃນອັຟການີສຖານມີຜູ້ບັນຊາການໃໝ່ ສຳລັບນຳພາເຂົາເຈົ້າໃນການຕໍ່ສູ້ກັບການກະບົດ ທ່ີຮຸນແຮງຂຶ້ນນັບມື້ຂອງກຸ່ມຕາລີ ບັນ. ນາຍພົນ Stanley McChrystal ໄດ້ເຣີ່ມດຳຣົງຕຳແໜ່ງເປັນຜູ້ບັນຊາການສູງສຸດຂອງກຳລັງສະຫະຣັດແລະຂອງກຸ່ມເນໂຕໃນອັຟການີສຖານຢ່າງເປັນທາງການແລ້ວ ຫລັງຈາກຮ່ວມພິທີມອບຕຳແໜ່ງນ້ອຍໆ ທ່ີຈັດຂຶ້ນໃນວັນຈັນມື້ນີ້ຢູ່ນະຄອນຫລວງຄາບູລ. ນາຍພົນ McChrystal ໄດ້ກ່າວເນັ້ນຄຳໝັ້ນສັນຍາຂອງທ່ານ ທ່ີຈະຕໍ່ສູ້ພວກຫົວຮຸນແຮງ ໂດຍຈະເພ່ງເລັງໃສ່ການເຮັດໃຫ້ການຕາຍຂອງພົນລະເຮືອນ ຫລຸດນ້ອຍລົງ ຊື່ງທ່ານເອີ້ນປະຊາຊົນອັຟການີສຖານວ່າ ເປັນຈຸດລວມຂອງການປະກອບພາລະກິດຂອງທ່ານ. ແຕ່ທ່ານໄດ້ກ່າວເຕືອນພວກຫົວຮຸນ ແຮງໃນວັນຈັນມື້ນີ້ວ່າ ເຖິງແມ່ນພວກທະຫານນາໆຊາດຈະປະຕິບັດ ງານໄປດ້ວຍຄວາມລະມັດລະວັງກໍຕາມ ແຕ່ເຂົາເຈົ້າກໍຈະຮັບມືກັບ ພວກສັດຕູຢ່າງບໍ່ມີຄວາມຢ້ານກົວໃດໆ. ໃນວັນອາທິດວານນີ້ ຜູ້ບັນຊາການຄົນໃໝ່ໄດ້ທຳການພົບປະຄັ້ງທຳອິດຂອງທ່ານ ກັບປະທານາທິບໍດີ Hamid Karzai ແຫ່ງອັຟການີສຖານ ຢູ່ນະຄອນຫລວງຄາບູລ.
ກ່ຽວກັບນີວເຄລັຍເກົາຫລີເໜືອ: ຮອງປະທານາທິບໍດີສະຫະຣັດ ທ່ານ Joe Biden ກ່າວວ່າ ຣັຖບານກຸງວໍຊິງຕັນ ມີຄວາມໝາຍໝັ້ນທ່ີຈະປະຕິບັດການລົງໂທດທ່ີເຂັ້ມງວດ ຂຶ້ນຂອງສະຫະປະຊາຊາດຕໍ່ເກົາຫລີເໜືອນັ້ນ ເຖິງແມ່ນມີຄຳແຖລງທີ່ ເປັນການທ້າທາຍມາຈາກກຸງພຽງຢ້າງກໍຕາມ. ໃນໂອກາດໃຫ້ສຳພາດຂ່າວທາງໂທລະພາບສະຫະຣັດ ໃນວັນອາທິດວານນີ້ ທ່ານ Biden ກ່າວວ່າ ເກົາຫລີເໜືອເປັນກຳລັງທ່ີທຳລາຍສະ ຖຽນລະພາບຢູ່ໃນເອເຊັຍ ແລະວ່າພວກອາວຸດນີວເຄລັຍແລະລູກສອນໄຟຂອງກຸງພຽງຢ້າງ ທີ່ກຳລັງຂຍາຍກ້ວາງອອກໄປນັ້ນ ແມ່ນເປັນໄພຂົ່ມຂູ່ທີ່ຮ້າຍແຮງຕໍ່ໂລກທັງໝົດ.
ເກົາຫລີເໜືອກ່າວວ່າ ການລົງໂທດຄັ້ງໃໝ່ຂອງສະຫະປະຊາຊາດຈະບໍ່ເຮັດໃຫ້ໂຄງການຜລິດນີວເຄລັຍຂອງຕົນຊັກຊ້າລົງ. ໃນວັນເສົາແລ້ວນີ້ ກຸງພຽງຢ້າງກ່າວວ່າ ຕົນຈະຫັນປ່ຽນທາດ plutonium ທ່ີຍັງເຫລືອ ຂອງຕົນໃຫ້ເປັນອາວຸດ ແລະເຣີ່ມຫລອມທາດຢູຣານຽມຄືນໃໝ່ເພື່ອ ຜລິດອາວຸດນີວເຄລັຍ ຕື່ມອີກ.
ເກົາຫລີໃຕ້ແລະມຽນມ້າ: ກຸ່ມປົກປ້ອງສິດທິມະນຸດ 2 ກຸ່ມເປີດເຜີຍລາຍງານສະບັບນຶ່ງໃນວັນຈັນ ມື້ນີ້ ກ່າວຫາເກົາຫລີໃຕ້ວ່າ ບໍ່ໄດ້ກຳກັບເບິ່ງນຳພວກບໍລິສັດຂອງຕົນໃນການລະເມີດສິດທິມະນຸດຕ່າງໆ ທ່ີພົວພັນກັບການພັດທະນາບໍ່ແກສ ທັມມະຊາດໃນມຽນມ້ານັ້ນ. ລາຍງານຂອງອົງການປ້ອງກັນສິດທິມະນຸດ EarthRights ສາກົນ ແລະອົງການ Shwe Gas Movement ໃຫ້ລາຍລະອຽວກ່ຽວກັບວິທີການທ່ີຣັຖບານກຸງໂຊນ ປະຕິເສດຕໍ່ການຈົ່ມວ່າແລະຮ້ອງຮຽນຂອງ ສອງກຸ່ມນີ້ ແລະຂອງຜູ້ຟ້ອງຮ້ອງຮ່ວມກັນອີກ 9 ຄົນ ຊື່ງຮວມທັງ 2 ອົງການແຮງງານໃຫຍ່ທ່ີສຸດຂອງເກົາຫລີໃຕ້ ທ່ີໄດ້ຍ່ືນເອກກະສານ ຮ້ອງຮຽນຂອງເຂົາເຈົ້າໃນເດືອນຕຸລາ ປີແລ້ວນີ້. ເອກກະສານດັ່ງກ່າວ ໄດ້ເລົ່າເຖິງການລະເມີດສິດຕ່າງໆທ່ີພົວພັນກັບໂຄງການ Shwe Gas ຊຶ່ງເປັນໂຄງການພັດທະນາອາຍແກສທັມມະ ຊາດທີ່ໃຫຍ່ທ່ີສຸດໃນມຽນມ້າ ພາຍໃຕ້ການນຳພາຂອງບໍລິສັດ Dae-woo International ຂອງເກົາຫລີໃຕ້.