ລັດຖະບານລາວ ຈະອະນຸຍາດໃຫ້ພົນລະ ເມືອງລາວ ແລະ ພາກ ເອກະຊົນໃນລາວ ສາມາດທີ່ຈະ ຈັດຕັ້ງ ອົງການທີ່ບໍ່ຂຶ້ນກັບລັດ ຖະບານຢູ່ໃນລາວໄດ້ ຢ່າງອິດສະລະ ນັບຈາກ ທ້າຍປີນີ້ເປັນຕົ້ນໄປ ໂດຍການ ອະນຸຍາດ ດັ່ງກ່າວ ກໍຍັງຈະເປັນຜົນເຮັດໃຫ້ອົງການ ຕ່າງປະເທດ ແລະ ຄົນລາວໃນຕ່າງປະເທດ ສາມາດປະກອບ ສ່ວນໃຫ້ການຊ່ວຍ ເຫລືອ ແກ່ອົງການໃນລາວໄດ້ ໂດຍກົງອີກ ດ້ວຍ.
ທ່ານ ອຳພາ ສີມມະສອນ ຮອງຫົວໜ້າກົມພັດທະນາອົງການປົກຄອງຂອງລັດຖະບານລາວ ໄດ້ຖະແຫຼງຢືນຢັນວ່າ ທ່ານ ບົວສອນ ບຸບຜາວັນ ນາຍົກລັດຖະມົນຕີໄດ້ລົງນາມ ໃນດໍາລັດວ່າດ້ວຍການອະນຸຍາດໃຫ້ພົນລະເມືອງລາວ ແລະ ເອກກະຊົນລາວໃຫ້ ສາມາດທີ່ຈະຈັດຕັ້ງອົງການທີ່ບໍ່ຂຶ້ນກັບລັດຖະບານໃນລາວໄດ້ຢ່າງເປັນທາງການແລ້ວເມືອ ວັນທີ່ 29 ເມສາທີ່ຜ່ານມາໂດຍຈະມີຜົນບັງຄັບໃຊ້ ຢ່າງເປັນທາງການພາຍໃນ 180 ວັນ ຫຼັງຈາກການລົງນາມດັ່ງກ່າວ ນັ້ນກໍຄືນັບຈາກ ເດືອນ ພະຈິກ ປີນີ້ເປັນຕົ້ນໄປ ໂດຍຄວາມສຳຄັນຂອງດຳລັດດັ່ງກ່າວນີ້ກໍຄື ຈະເປັນຜົນເຮັດໃຫ້ພົນລະເມືອງລາວແຕ່ 2 ຄົນຂຶ້ນໄປ ສາມາດທີ່ຈະຂໍອານຸຍາດຈົດທະບຽນເພື່ອຈັດຕັ້ງອົງການທີ່ບໍ່ຂຶ້ນຕໍ່ລັດຖະບານ ຫຼື ບັນດາ ສະມາຄົມຕ່າງໆ ໄດ້ຢ່າງອິດສະລະຢູ່ໃນທົ່ວປະເທດລາວຊຶ່ງກໍຈະເປັນໄປຕາມບົດບັນຍັດໃນລັດຖະມະນູນມາດຕາທີ່ 44 ທີ່ໄດ້ໃຫ້ສິດທິເສລີພາບແກ່ພົນລະເມືອງລາວໃນການຈັດຕັ້ງອົງການຂຶ້ນມາເພື່ອດໍາເນີນກິດຈະກໍາໃດນຶ່ງໄດ້ຕາມວັດຖຸປະສົງ ແລະ ເປົ້າໝາຍທີ່ກໍາໜົດໄວ້ໃນການຈົດທະບຽນການຈັດຕັ້ງ ດັ່ງກ່າວ ໂດຍຈະຕ້ອງເປັນກິດຈະກຳທີ່ບໍ່ສົ່ງຜົນກະທົບຕໍ່ ຄວາມສະງົບຮຽບຮ້ອຍພາຍໃນ ແລະ ຄວາມໜັ້ນຄົງ ແຫ່ງຊາດຂອງປະເທດລາວໄດ້ແຕ່ຢ່າງໃດ. ດັ່ງທີ່ເຈົ້າໜ້າທີ່ຂັ້ນສູງໃນອົງການທີ່ບໍ່ຂຶ້ນກັບລັດຖະບານຂອງຕ່າງປະເທດໃນລາວ ຊຶ່ງກໍເປັນຄົນລາວຄົນນຶ່ງນັ້ນ ໄດ້ໃຫ້ທັດສະນະວ່າ:
ເມື່ອມີໂອກາດຕັ້ງອົງກອນແບບນີ້ ຂ້າພະເຈົ້າຄຶດວ່າມັນເປັນໂອ ກາດດີທີ່ວ່າປະຊາ ຊົນລາວທີ່ຢູ່ ທາງນອກທີ່ວ່າ ຄຶດຢາກຊ່ວຍບ້ານເກີດເມືອງນອນ ຫລືເຂດບ້ານຂອງຕົນກໍໄດ້. ລະບັດນີ້ ມັນຈະສະບາຍເນ໋າະ ມີອຸປະກອນປະ ຈຳບ້ານຂອງໂຕ, ເມືອງ ຂອງໂຕ ຫຼືວ່າ ແຂວງຂອງໂຕຫັ້ນ ກໍພົວພັນໂດຍກົງເລີຍ ສົ່ງເງິນທີ່ຜ່ານອົງກອນຫັ້ນ ກໍບອກເຂົາເຈົ້າວ່າ ຢາກໃຫ້ຊ່ວຍໂຕນີ້ຢູ່ບ້ານນັ້ນເດີ້ ໃຫ້ສ້າງໂຮງຮຽນບໍ ຫຼື ໂຮງໝໍບໍ ສ້າງນ້ຳສະອາດ ບໍຈັ່ງຊີ້ ນ໋ະ. ຄຶດວ່າມັນ ມັນກໍຈະສະດວກຫຼາຍ ຂຶ້ນ. ໂຕນີ້ສຳຄັນ ຫຼາຍ ໃຫ້ພົວພັນລະຫວ່າງປະຊາຊົນກັບປະຊາຊົນໄດ້ສະບາຍຂຶ້ນ ໂດຍບໍ່ໄດ້ຜ່ານລັດຖະບານກາງ ເປັນປະຕູໃໝ່ທີ່ຄວນຊິນຳໃຊ້.
ໃນປະຈຸບັນນີ້ມີອົງການທີ່ບໍ່ຂຶ້ນກັບລັດຖະບານຈາກຕ່າງປະເທດຢູ່ໃນລາວມີຫຼາຍຢູ່ 100 ອົງການ ຫາກວ່າບໍ່ມີສະຖານະທີ່ເປັນອົງການທີ່ບໍ່ຂຶ້ນກັບລັດຖະບານໃນລາວຢ່າງໃດ ເນື່ອງຈາກວ່າ ທີ່ຜ່ານມາຍັງບໍ່ມີກົດໝາຍຮອງຮັບຈຶ່ງເຮັດໃຫ້ອົງການເຫລົ່ານີ້ ມີສະຖານະເປັນພຽງແຕ່ອົງການຕ່າງຊາດ ທີ່ໄດ້ຮັບອານຸຍາດຈາກລັດຖະບານ ລາວໃຫ້ສາມາດດຳເນີນ ກິດຈະກຳ ແລະ ບັນດາໂຄງການຕ່າງໆໃນລັກສະນະຂອງການຮ່ວມມືກັບໜ່ວຍ ງານ ຂອງລັດຖະບານລາວໄດ້ ເທົ່ານັ້ນຊຶ່ງກໍໝາຍຄວາມວ່າ ການດຳເນີນກິດຈະກຳ ແລະໂຄງການຕ່າງໆຈະສິ້ນສຸດ ລົງເມື່ອຄົບກຳໜົດເວລາທີ່ໄດ້ຮັບອານຸຍາດຈາກລັດຖະບານລາວແລ້ວເອງ ແລະໃຫຍ່ກວ່າອົງການເຫລົ່ານີ້ຍັງຕ້ອງການທີ່ຈະດຳເນີນກິດຈະກຳແລະ ໂຄງການຕ່າງໆ ຢູ່ໃນລາວຕໍ່ໄປນັ້ນຈໍາເປັນຕ້ອງຂໍອະນຸຍາດຈາກລັດຖະ ບານລາວອີກເທື່ອໃໝ່. ແຕ່ຢ່າງໃດກໍຕາມ ນັບຈາກປີນີ້ເປັນຕົ້ນໄປ ອົງການຕ່າງປະເທດເຫລົ່ານີ້ ກໍ່ສາມາດທີ່ ຈະມືກັບບັນດາອົງການ ຫຼື ສະມາຄົມຕ່າງໆ ຂອງພົນລະເມືອງລາວ ແລະ ພາກເອກກະຊົນລາວໄດ້ໂດຍກົງ ຖ້າຫາກວ່າເປັນອົງການ ຫຼື ສະມາຄົມທີ່ພົນລະເມືອງລາວ ແລະ ເອກກະຊົນລາວໄດ້ຂໍອານຸຍາດ ຈັດຕ້ັງຂຶ້ນມາຢ່າງຖືກຕ້ອງຕາມດຳລັດຂອງນາຍົກລັດຖະມົນຕີສະບັບດັ່ງກ່າວແລ້ວຢ່າງຄົບຖ້ວນນັ້ນເອງ. ຫາກແຕ່ວ່າ ກໍຍັງບໍ່ມີຄວາມຊັດເຈນວ່າ ຖ້າຫາກເປັນການຈັດຕັ້ງອົງການທາງດ້ານສາດສະໜານັ້ນ ຈະສາມາດຈັດຕັ້ງຂຶ້ນມາ ຕາມດຳລັດສະບັບດັງກ່າວນີ້ໄດ້ ຫຼື ບໍ່.
ຊົງຣິດ ໂພນເງິນ ລາຍງານຈາກບາງກອກ ໃນວັນທີ 20 ພຶດສະພາ 2009