<!-- IMAGE -->
ທ່ານ ໂຣເບີທ ວູດ ຮັກສາການຊົ່ວຄາວຕາງໜ້າໂຄສົກກະຊວງຕ່າງປະເທດສະຫະຣັດ ກ່າວວ່າ ພວກເຮົາທັງໝົດໃນປະຊາຄົມໂລກແມ່ນມີຜົນປະໂຫຍດໃນການເຫັນແຫລມເກົາຫລີທີ່ປາສະຈາກໂຄງການນີວເຄລຍ ທ່ານ ສະຕີເວິນ ບອສເວີທ ຜູ້ແທນພິເສດຂອງສະຫະຣັຖສຳຫລັບນະໂຍບາຍເກົາຫລີເໜືອ ຫາກໍເສັດສີ້ນການຢ້ຽມຢາມຂົງເຂດເອເຊຍຕາເວັນອອກເມື່ອໝໍ່ໆມານີ້ ຫລັງຈາກໄດ້ທຳການປຶກສາຫາລືກັບບັນດາປະເທດ ພາຄີຂອງສະຫະຣັຖໃນການເຈລະຈາຫົກຝ່າຍນັ້ນ.
ການເຈລະຈາຫົກຝ່າຍຊຶ່ງປະກອບດ້ວຍ ຈີນ ຍີ່ປຸ່ນ ເກົາຫລີເໜືອ ຣັດເຊັຍເກົາຫລີໃຕ້ ແລະສະຫະຣັຖ ກໍຄືການເຈລະຈາທີ່ປະກອບດ້ວຍຫລາຍປະເທດ ທີ່ມີເປົ້າໝາຍເພື່ອທຳການລົບລ້າງໂຄງການນີວເຄລຍຕ່າງໆຂອງເກົາຫລີເໜືອ ການເຈລະຈາຫົກຝ່າຍດັ່ງ ກ່າວນີ້ຍັງບໍ່ມີຄວາມຄືບໜ້າຫຍັງເລີຍ ເນຶ່ອງຈາກຣັຖບານເກົາຫລີເໜືອໄດ້ປະຕິເສດບໍ່ຍອມຕົກລົງຮັບເອົາມາດຕາການພິສູດໂຄງການນີວເຄລຍຕ່າງໆຂອງຕົນ.
ຫລັງຈາກນັ້ນຕໍ່ມາ ເກົາຫລີເໜືອໄດ້ຂັບໄລ່ບັນດາພະນັກງານຂອງອົງການພະລັງງານປະຣະມະນູສາກົນ ແລະເຈົ້າໜ້າທ່ີສະຫະຣັຖ ທີ່ຕິດຕາມເບິ່ງການທັບມ້າງໂຄງການນິວເຄລຍຂອງເກົາຫລີເໜືອ ທ່ີໂຮງງານນີວເຄລຍຢົງບີອົງນັ້ນ ແລະປະກາດວ່າຕົນຕັ້ງໃຈທ່ີຈະຕ່າວປີ້ນການທັບມ້າງຕ່າງໆທີ່ໄດ້ປະຕິບັດເສັດສີ້ນໄປແລ້ວນັ້ນ ພ້ອມກັບຂູ່ວ່າ ຈະຮື້ຟື້ນກິດຈະກຳນີວເຄລຍ ຕ່າງໆທີ່ຢົງບີອົງ ຫລັງຈາກທີ່ສະພາຄວາມໝັ້ນຄົງອົງ ການສະຫະປະຊາຊາດໄດ້ປະນາມການທີ່ເກົາຫລີເໜືອໄດ້ຍິງລູກສອນໄຟ ແຕໂປ-ດອງ 2 ເມື່ອວັນທ່ີຫ້າເດືອນເມສາຜ່ານມາ ອັນເປັນການຝ່າຝືນຕໍ່ມະຕິຂອງສະພາຄວາມໝັ້ນຄົງ ສະບັບກ່ອນນີ້ທີ່ຫ້າມບໍ່ໃຫ້ເກົາຫລີເໜືອກະທຳເຊັ່ນນັ້ນ.
ດັ່ງທີ່ທ່ານສະຕີເວິນ ບອສເວີທ ທູດພິເສດຂອງສະຫະຣັຖກ່ຽວກັບເກົາຫລີເໜືອ ໄດ້ຖະແຫລງຕໍ່ນັກຂ່າວເມື່ອວັນທີ່ 12 ເດືອນພຶດສະພາຜ່ານມານີ້ຢູ່ນະຄອນຫລວງໂຕກຽວ ກໍແມ່ນວ່າ “ພວກເຮົາແມ່ນມີຄວາມໝັ້ນໝາຍຕໍ່ການສົນທະກາໂອ້ລົມກັນ ແລະມີຄວາມປາຖະນາທີ່ຈະກັບຄືນສູ່ໂຕະເຈລະ ຈາກັນໂດຍໄວທີ່ສຸດເທົ່າທີ່ພວກເຮົາສາມາດຈະເຮັດໄດ້ ແຕ່ວ່າເລື່ອງນີ້ມັນ ບໍ່ແມ່ນການຕັດສິນໃຈ ທີ່ຂື້ນຢູ່ກັບພວກເຮົາແຕ່ຝ່າຍດຽວເທົ່ານັ້ນ ແຕ່ມັນຂື້ນຢູ່ກັບສາທາລະນະຣັຖປະຊາທິປະໃຕປະຊາຊົນເກົາຫລີ ຫລືເກົາຫລີ ເໜືອນັ້ນນຳ.
ທ່ານບອສເວີທ ກ່າວວ່າ “ການສົນທະນາໂອ້ລົມກັນໂດຍກົງ ລະວ່າງ ສະຫະຣັຖແລະເກົາຫລີເໜືອນັ້ນ ແມ່ນມີທາງເປັນໄປໄດ້ຫລາຍ ຊຶ່ງທ່ານໄດ້ໃຫ້ຂໍ້ສັງເກດຕໍ່ໄປວ່າ ມັນຈະຕ້ອງເປັນໄປພາຍໃຕ້ໂຄງຮ່າງຂອງຂັ້ນຕອນ ການເຈລະຈາຫົກຝ່າຍ ທີ່ໄດ້ມີການຕິດຕໍ່ກັນໂດຍກົງເລື້ອຍໆຢູ່ແລ້ວ ລະວ່າງພວກສະມາຊິກອື່ນໆຂອງກຸ່ມເຈລະຈາຫົກຝ່າຍກັບເກົາຫລີເໜືອນັ້ນ
ທ່ານນາງ ຮິລເລີຣີ ຄລິນຕັນ ຣັຖມຸນຕຣີຕ່າງປະເທດສະຫະຣັຖກ່າວວ່າ ເກົາຫລີເໜືອຈະເປັນຜູ້ໄດ້ຮັບຜົນປະໂຍດຢ່າງຫລວງຫລາຍ ຈາກການເຂົ້າ ພົວພັນນຳກັບການເຈລະຈາຫົກຝ່າຍນັ້ນ ຊຶ່ງທ່ານນາງຄລິນຕັນ ກ່າວຕໍ່ໄປວ່າ ຖ້າວ່າເກົາຫລີເໜືອຫາກກຽມພ້ອມຢ່າງແທ້ຈິງ ທີ່ຈະລົບລ້າງໂຄງການນີວເຄລຍຕ່າງໆຂອງຕົນຢ່າງສີ້ນເຊີງ ແລະຢ່າງພິສູດໄດ້ແລ້ວ ຣັຖບານ ຂອງທ່ານໂອບາມາ ກໍພ້ອມທີ່ຈະຈັດຕັ້ງ ຄວາມສຳພັນແບບເປັນປົກກະຕິກັນລະວ່າງທັງສອງປະເທດ ສັບປ່ຽນສັນຍາສະງົບເສິກທີ່ມີມາເປັນເວລາ ຍາວນານໃນແຫລມເກົາຫລີນັ້ນ ດ້ວຍສົນທິສັນຍາສັນຕິພາບທີ່ຖາວອນ ແລະພ້ອມກັບ ຈະສະນອງການຊ່ວຍເຫລືອທີ່ຈຳເປັນດ້ານພະລັງງານແລະຄວາມຕ້ອງການອື່ນໆໃນດ້ານເສດຖະກິດນັ້ນໃຫ້ແກ່ປະຊາຊົນເກົາຫລີເໜືອ.