ອະດີດປະທານາທິບໍດີ ທ່ານ ດໍໂນລ ທຣໍາ ໄດ້ຮັບອາການບາດເຈັບຢູ່ຫົວໃນວັນເສົາມື້ນີ້ (ຕາມເວລາຢູ່ໃນທ້ອງຖິ່ນ) ແຕ່ “ບໍ່ມີຫຍັງຮຸນແຮງ” ອີງຕາມການໂຄສະນາຂອງທ່ານ ລຸນຫຼັງທີ່ທ່ານຖືກຍິງໃສ່ໂດຍກົງຢູ່ສະຖານທີ່ຊຸມນຸມໂຄສະນາສຽງໃນລັດເພັນຊີລວາເນຍ.
ໃນຖະແຫຼງການສະບັບນຶ່ງ, ການໂຄສະນາຂອງ ທ່ານ ທຣໍາ ກ່າວວ່າ ຜູ້ລົງສະໝັກປະທານາທິບໍດີຂອງພັກຣີພັບບລີກັນ ໄດ້ຮັບການປິ່ນປົວຢູ່ສະຖານທີ່ການແພດທ້ອງຖິ່ນ. ທ່ານ ທຣໍາ ໄດ້ເດີນທາງໄປເມືອງບັດເລີ (Butler) ເຊິ່ງຕັ້ງຢູ່ໃນລັດທີ່ຍັງມີການແຂ່ງຂັນ ເພື່ອຈັດການໂຮມຊຸມນຸມ.
ໂຄສົກ ທ່ານ ສຕີເວັນ ເຊິງ (Steven Cheung) ກ່າວໃນຖະແຫຼງການສະບັນນຶ່ງວ່າ “ປະທານາທິບໍດີ ທຣໍາ ຂອບໃຈບັນດາເຈົ້າໜ້າທີ່ຕໍາຫຼວດ ແລະບັນດາຜູ້ຮັບຜິດຊອບຕໍ່ເຫດການທໍາອິດ ສໍາລັບການປະຕິບັດງານຢ່າງໄວວາຂອງພວກເຂົາເຈົ້າໃນລະຫວ່າງເຫດການທີ່ໂຫດຮ້າຍນີ້,” ແລະກ່າວຕື່ມວ່າ ທ່ານ ສະບາຍດີ ແລະໄດ້ຮັບການກວດກາຢູ່ສະຖານທີ່ທາງການແພດທ້ອງຖິ່ນແລ້ວ.”
ຝູງຊົນ ພາກັນໄດ້ຍິນສຽງແຕກນ້ອຍໆ ທີ່ມີລັກສະນະຄ້າຍຄືກັນກັບການຍິງປືນນ້ອຍ ກ່ອນທີ່ອະດີດປະທານາທິບໍດີຈະເອົາມືໄປຈັບດ້ານຂ້າງຂອງໜ້າ ແລະໄດ້ໝູບລົງ. ທ່ານຖືກຫຸ້ມລ້ອມໂດຍໜ່ວຍຮັກສາຄວາມປອດໄພຂອງທ່ານຢ່າງລະອຽດໃນທັນທີ ແລະສາມາດໄດ້ຍິນສຽງທີ່ວ່າ “ໃຫ້ຂ້ອຍເອົາເກີບຂອງຂ້ອຍກ່ອນ,” ກ່ອນທີ່ທ່ານຈະຢືນຂຶ້ນ, ພ້ອມດ້ວຍບັນດາຜູ້ຮັກສາຄວາມປອດໄພຫຸ້ມອ້ອມຮອບທ່ານຢ່າງແໜ້ນໜາ.
ຜູ້ລົງສະໝັກປະທານາທິບໍດີຈາກພັກຣີພັບບລິກັນ ອະດີດປະທານາທິບໍດີ ດໍໂນລ ທຣໍາ ໄດ້ຮັບການຫຸ້ມອ້ອມໂດຍເຈົ້າໜ້າທີ່ຮັກສາຄວາມປອດໄພຂອງທ່ານ ໃນຂະນະທີ່ທ່ານ ຖືກນໍາໂຕເຂົ້າລົດ ຢູ່ທີ່ບ່ອນໂຮມຊຸມນຸມໂຄສະນາຫາສຽງ, ວັນທີ 13 ກໍລະກົດ 2024, ໃນເມືອງ ບັດເລີ, ລັດເພັນຊີລວາເນຍ.
ຫຼັງຈາກນັ້ນ, “ຖ້າກ່ອນ” ແລ້ວທ່ານ ທຣໍາກໍໄດ້ກ່າວຊໍ້າແລ້ວຊໍ້າອີກວ່າ ເລືອດອອກຈາກຫູເບື້ອງຂວາຂອງທ່ານ, ຈາກນັ້ນ ທ່ານໄດ້ຍົກກຳປັ້ນເບື້ອງຂວາຂຶ້ນ ແລະເຮັດທ່າທາງດ້ວຍຄວາມໂກດແຄ້ນໄປໃສ່ບໍລິເວນຈຸດໃຈກາງໃນໄລຍະໄກ ແລະເວົ້າຄໍາທີ່ເປັນພະຍາງດຽວຊໍ້າແລ້ວຊໍ້າອີກສາມຄັ້ງວ່າ “ສູ້, ສູ້, ສູ້.”
ໂຄສົກຂອງອົງການສືບລັບ ທ່ານ ແອນໂທນີ ກູກລີເອລມີ (Anthony Guglielmi) ໄດ້ອອກຖະແຫຼງການສະບັນນຶ່ງໃນສື່ສັງຄົມ X, ເຊິ່ງໃນເມື່ອກ່ອນແມ່ນ Twitter ວ່າ “ອົງການສືບລັບ ກໍາລັງດໍາເນີນມາດຕະການປ້ອງກັນ, ແລະອະດີດປະທານາທິບໍດີແມ່ນຢູ່ໃນຄວາມປອດໄພ. ເຫດການດັ່ງກ່າວນີ້ ແມ່ນຢູ່ພາຍໃຕ້ການສືບສວນສອບສວນຂອງອົງການສືບລັບ ແລະຈະມີການເປີດເຜີຍຂໍ້ມູນເພີ້ມເຕີມ ຖ້າມີລາຍລະອຽດຕື່ມອີກ.”