ໃນລາຍການຊີວິດຊາວລາວຂອງ ວີໂອເອ ປະຈຳວັນພະຫັດມື້ນີ້ ເຮົາຈະພາທ່ານຟັງການໂອ້ລົມກັບຄົນຝຣັ່ງເຊື້ອສາຍລາວຢູ່ໃນເຂດນະຄອນຫລວງປາຣີ ກ່ຽວກັບວິກິດການລັດຖະບານຝຣັ່ງໄດ້ສະເໜີໃຫ້ຄົນພາກັນເຮັດວຽກຈົນຮອດ 64 ປີ ແທນທີ່ຈະເປັນ 62 ປີ ດັ່ງທີ່ເຄີຍປະຕິບັດກັນມາ. ຂໍ້ສະເໜີດັ່ງກ່າວໄດ້ກໍ່ໃຫ້ເກີດມີການປະທ້ວງ ຢູ່ໃນນະຄອນຫລວງປາຣີ ມາເປັນເວລາຫຼາຍອາທິດ ຕິດຕາມດ້ວຍການນັດຢຸດງານຄັ້ງໃຫຍ່. ກິ່ງສະຫວັນ ມີຄວາມເຫັນຂອງຊຸມຊົນລາວ ມາສະເໜີທ່ານ ໃນອັນດັບຕໍ່ໄປ.
Your browser doesn’t support HTML5
ເຊີນຟັງລາຍການຊີວິດຊາວລາວ
ຮິດຄອງປະເພນີ ລະບົບຊີວິດການເປັນຢູ່ຂອງປະຊາຄົມຝຣັ່ງ ເຫັນວ່າມີຄວາມສະໜຸກສະໜານ ຫລາຍກວ່າປະຊາກອນ ຂອງຫລາຍປະເທດໃນໂລກ. ເຂົາເຈົ້າພາກັນຢູ່ດີກິນດີ ມີເວລາພັກຜ່ອນ ຕ້ອງໄປພັກປະຈຳປີ ມີລະບົບການປິ່ນປົວທີ່ດີ ໂດຍສະເພາະເຮັດວຽກມີກຳໜົດເວລາ ທີ່ຢູ່ພາຍໃຕ້ກົດໜາຍ ແລະເປັນບູລິມະສິດ. ເພາະສະນັ້ນປະຊາຊົນຝຣັ່ງມີຄວາມລື້ງເຄີຍກັບການໃຊ້ຊີວິດອັນລາບລື້ນນີ້ມາຕະຫລອດ ຊຶ່ງບໍ່ເໝືອນກັນກັບປະຊາກອນຂອງປະເທດອື່ນໆ ທີ່ພາກັນເຮັດວຽກຕາມໃຈຊອບ ແລະບໍ່ມີກຳນົດເວລາ.
ໃນສາມອາທິດທີ່ຜ່ານມານີ້ ລັດຖະບານປະທານາທິບໍດີຝຣັ່ງ ທ່ານເອັມມານຸຍແອລ ມາກຣົງ ໄດ້ສະເໜີໃຫ້ເພີ້ມອາຍຸການເຮັດວຽກຈາກ 62 ປີ ຂຶ້ນເປັນ 64 ປີ ເພາະວ່າລັດຖະບານ ຂາດເຂີນງົບປະມານ ທີ່ຈະນຳເອົາເງິນຜູ້ເຮັດວຽກໄປຈ່າຍຄ່າເບ້ຍລ້ຽງແກ່ຜູ້ອະວຸໂສທີ່ໄປບຳນານ. ຂໍ້ສະເໜີດັ່ງກ່າວໄດ້ກໍ່ໃຫ້ເກີດການປະທ້ວງຢູ່ໃນນະຄອນຫລວງປາຣີ ມີການນັດຢຸດງານເຮັດໃຫ້ການສັນຈອນທາງລົດໄຟໃຕ້ດິນ ແລະການເກັບມ້ຽນຂີ້ເຫຍື້ອໄດ້ຮັບຜົນກະທົບໄປຕາມໆກັນ. ຕົກມາເຖິງປັດຈຸບັນນີ້ ຍັງມີການຕໍ່ລອງກັນຢູ່ ວີໂອເອ ໄດ້ຖືໂອກາດນີ້ ຖາມບັນດາຄົນຝຣັ່ງເຊື້ອສາຍລາວວ່າເຂົາເຈົ້າມີຄວາມຮູ້ສຶກຢ່າງໃດກ່ຽວກັບເລື້ອງນີ້.
ທ່ານສົມບັດ ບູຣົມ ອາຍຸ 57 ປີ ນັກວິສະວະກອນ ເຮັດວຽກໃຫ້ແກ່ບໍລິສັດເອກກະຊົນ ຢູ່ເຂດເບຣີຕາຍ ພາກເໜືອຂອງປະເທດຝຣັ່ງ ທ່ານຍັງຈະຕ້ອງເຮັດວຽກໄປຕໍ່ອີກຫລາຍປີ ແລະເຫັນພ້ອມກັບການຕໍ່ອາຍຸການເຮັດວຽກຈົນຮອດອາຍຸ 64 ປີ ຊຶ່ງທ່ານໄດ້ໃຫ້ຄວາມຄິດເຫັນຕໍ່ ວີໂອເອ ດັ່ງນີ້:
Your browser doesn’t support HTML5
ເຊີນຟັງ ທ່ານສົມບັດ ບູຣົມ
ຍານາງມະລີວອນ ບຸດສະຫວັດ ອາຍຸ 68 ປີ ບໍານານແລ້ວ ແຕ່ຍັງເຮັດວຽກບໍ່ເຕັມເວລາໃຫ້ແກ່ໂຮງຮຽນຫລວງ. ຍານາງມະລີວອນ ໄດ້ໃຫ້ທັດສະນະສ່ວນໂຕສູ່ ວີໂອເອ ຟັງດັ່ງນີ້:
Your browser doesn’t support HTML5
ເຊີນຟັງ ຍານາງມະລີວອນ ປຸດສະວັດ
ດຣ. ອະຣິຍະ ປະຖັມມະວົງ ໜາຍໝໍປົວແຂ້ວ ອາຍຸ 58 ປີ ຍັງຈະເຮັດວຽກຕື່ມໄປອີກຫລາຍປີ ເພາະທ່ານເລີ້ມເຮັດວຽກຊ້າ. ທ່ານກ່າວວ່າຈະເຮັດວຽກຕໍ່ໄປຈົນກາຍອາຍຸບໍານານ ເພາວ່າທ່ານເຮັດວຽກໃຫ້ແກ່ຕົນເອງ ແລະບໍ່ຂຶ້ນກັບລັດຖະບານ ຊຶ່ງທ່ານໄດ້ກ່າວຕໍ່ ວີໂອເອ ສູ່ຟັງດັ່ງນີ້:
Your browser doesn’t support HTML5
ເຊີນຟັງ ດຣ. ອະຣິຍະ ປະຖັມມະວົງ
ບັນດາຜູ້ທີ່ເຮັດວຽກໃຫ້ແກ່ລັດຖະບານ ຕ້ອງອອກບໍານານຕາມກຳນົດການຄື 62 ປີ. ສຳລັບບັນດາບໍລິສັດເອກກະຊົນແລ້ວ ແມ່ນຂຶ້ນຢູ່ກັບການຈັດຕັ້ງ ແຕ່ສ່ວນໃຫຍ່ຂອງປະຊາຊົນຝຣັ່ງ ເຂົາເຈົ້າບໍ່ເຫັນພ້ອມກັບການເຮັດວຽກຈົນຮອດ 64 ປີ ແລະຍັງທຳການປະທ້ວງ ແລະຕໍ່ລອງກັນຢູ່ປັດຈຸບັນ.