ຮອງນາຍົກລັດຖະມົນຕີລາວຢືນຢັນວ່າ ຈະບໍ່ມີການຊົດເຊີຍໃຫ້ກັບປະຊາຊົນ ທີ່ໄດ້
ຮັບຜົນກະທົບຈາກໄພນ້ຳຖ້ວມຄັ້ງໃຫຍ່ທີ່ຖືກສົມທົບດ້ວຍການປ່ອຍນ້ຳອອກຈາກ
ເຂື່ອນເພື່ອປ້ອງກັນບໍ່ໃຫ້ເຂື່ອນແຕກ ຊົງຣິດ ໂພນເງິນ ມີລາຍງານຈາກບາງກອກ.
Your browser doesn’t support HTML5
ລາຍການເມືອງລາວໃນປັດຈຸບັນ: ຈະບໍ່ມີຄ່າຊົດເຊີຍໃດໆ ຕໍ່ພວກປະສົບໄພນ້ຳຖ້ວມ ຍ້ອນການປ່ອຍນ້ຳອອກຈາກເຂື່ອນ
ທ່ານສອນໄຊ ສີພັນດອນ ຮອງນາຍົກລັດຖະມົນຕີ ແລະປະທານຄະນະກຳມະການ
ສະເພາະກິດແກ້ໄຂໄພພິບັດ ລະດັບຊາດຖະແຫຼງວ່າ ການປ່ອຍນ້ຳອອກຈາກອ່າງ
ເກັບນ້ຳຂອງໂຄງການເຂື່ອນໄຟຟ້າຕ່າງໆ ໃນຊ່ວງເດືອນກໍລະກົດ ຫາ ກັນຍາ 2018
ຊຶ່ງເປັນໄລຍະທີ່ພາຍຸເຂດຮ້ອນ ໄດ້ພັດເຂົ້າມາໃນລາວນັ້ນ ຖືເປັນ ສ່ວນນຶ່ງຂອງ
ມາດຕະການຫຼຸດຜ່ອນຜົນກະທົບຈາກໄພນ້ຳຖ້ວມໃນລາວ ເພາະການປ່ອຍນ້ຳອອກ
ຈາກເຂື່ອນໄຟຟ້າດັ່ງກ່າວ ເປັນໄປເພື່ອປ້ອງກັນບໍ່ໃຫ້ເຂື່ອນແຕກນັ້ນເອງ ດັ່ງນັ້ນ ບັນດາ
ຜູ້ລົງທຶນ ໃນໂຄງການເຂື່ອນໄຟຟ້າຕ່າງໆ ທີ່ປ່ອຍນ້ຳອອກມາຈາກເຂື່ອນແລະລົງມາ
ເພີ້ມຕື່ມ ໃນເຂດທີ່ປະສົບໄພນ້ຳຖ້ວມຢູ່ແລ້ວ ບໍ່ຕ້ອງຮັບຜິດຊອບໃນການຈ່າຍຄ່າທົດ
ແທນການເສຍຫາຍໃຫ້ກັບປະຊາຊົນ ທີ່ໄດ້ຮັບຜົນກະທົບຈາກໄພນ້ຳຖ້ວມໃນຄັ້ງນີ້
ດັ່ງທີ່ ທ່ານສອນໄຊ ໃຫ້ການຢືນຢັນວ່າ“ອັນນີ້ຈະບໍ່ໄດ້ມີການທົດແທນ ເນື່ອງຈາກວ່າ
ການປ່ອຍດັ່ງກ່າວນີ້ ກະແມ່ນມັນຕ້ອງໄດ້ຮັບປະກັນຄວາມປອດໄພ ຖ້າວ່າເຂື່ອນ
ແຕກນີ້ ມັນສິຮ້າຍແຮງກວ່ານ້ຳຍຶ່ງນີ້ເນາະ ອັນນີ້ການປ່ອຍນີ້ ກະຍ້ອນວ່າປະລິມານ
ຝົນຕົກຫຼາຍ ມັນຈຳເປັນຕ້ອງໄດ້ປ່ອຍເພາະວ່ານອກຈາກນ້ຳງື່ມແລ້ວ ມັນກະມີນ້ຳງື່ມ
2 ເນາະ ມີນ້ຳງຽບ ນ້ຳຫຍັງຕ່າງໆທີ່ໄຫຼເຂົ້າໃນອ່າງດັ່ງກ່າວນັ້ນ ແຕ່ວ່າແນວໃດກໍຕາມ
ທາງຜູ້ພັດທະນາ ເຂົາກໍຈະນຳໃຊ້ເງິນທີ່ໄດ້ຈາກການຂາຍໄຟ ເພື່ອມາປະກອບສ່ວນ
ໃຫ້ລັດຖະບານຊື້ແນວພັນພືດ ແນວພັນສັດຕ່າງໆ ເພື່ອຈະສະໜອງໃຫ້ແກ່ປະຊາຊົນ.”
ທັງນີ້ ໂດຍເຂື່ອນໄຟຟ້າທີ່ໄດ້ທຳການປ່ອຍນ້ຳອອກຈາກອ່າງໂຕ່ງລົງມາເພີ້ມຕື່ມ
ໃນເຂດປະສົບໄພນ້ຳຖ້ວມ ໃນຊ່ວງເດືອນກໍລະກົດ-ກັນຍາ ທີ່ຜ່ານມາ ປະກອບ
ດ້ວຍເຂື່ອນນ້ຳງື່ມ 1, 2 ແລະ 5 ເຂື່ອນນ້ຳໄຜ່, ເຂື່ອນນ້ຳຊອງ ແລະເຂື່ອນນ້ຳລີກ
ສ່ວນເຂື່ອນນ້ຳເທີນ 2 ໄດ້ຫຍຸດການເດີນເຄື່ອງຈັກຜະລິດໄຟຟ້າ 5 ໜ່ວຍຈາກທັງໝົດ
6 ໜ່ວຍ ເພື່ອຊ່ອຍຫຼຸດຜ່ອນຜົນການກະທົບຈາກໄພນ້ຳຖ້ວມ ໃນຊ່ວງດັ່ງກ່າວ.
ທັງນີ້ ໄພນ້ຳຖ້ວມຄັ້ງໃຫຍ່ໄດ້ກວມເອົາພື້ນທີ່ໃນເຂດ 2,409 ໝູ່ບ້ານ 115 ເມືອງ
17 ແຂວງ ແລະນະຄອນວຽງຈັນ ໂດຍສົ່ງຜົນກະທົບຕໍ່ປະຊາຊົນລາວ 639,437 ຄົນ
ຫຼື 131,507 ຄອບຄົວ ທັງຍັງເຮັດໃຫ້ມີຜູ້ເສຍຊີວິດ 55 ຄົນ ບາດເຈັບ 2 ຄົນ ສູນຫາຍ
65 ຄົນ ແລະ 16,709 ຄົນ ບໍ່ມີທີ່ຢູ່ອາໄສ ເພາະເຮືອນທີ່ນ້ຳພັດ ເສຍຫາຍຢ່າງສິ້ນເຊີງ
ສ່ວນນາປີເສຍຫາຍໄປ 90,600 ກວ່າເຮັກຕາ ຫຼື 12 ເປີເຊັນ ຂອງນາປີ ທີ່ປັກດຳໄດ້
ທັງໝົດ ໂດຍຍັງບໍ່ຮວມເຖິງເຂົ້າໄຮ່ ແລະພື້ນທີ່ປູກພືດຕ່າງໆ ທີ່ເສຍຫາຍໄປກວ່າ
15,000 ເຮັກຕາ ຄອງຊົນລະປະທານ 778 ແຫ່ງ ໜອງປາ 5,387 ແຫ່ງ ງົວ-ຄວາຍ-
ໝູ-ແບ້ ຫຼາຍກວ່າ 23,000 ຕົວແລະສັດປີກ 70,000 ກວ່າຕົວ ໂດຍສະເພາະ
ເຂດເມືອງທຸລະຄົມ ແຂວງວຽງຈັນ ທີ່ຢູ່ໃຕ້ເຂື່ອນນ້ຳງື່ມ 1 ນັ້ນ ກໍນັບເປັນເຂດນຶ່ງທີ່ໄດ້
ຮັບຜົນກະທົບຢ່າງໜັກໜ່ວງ ທີ່ສຸດ ດັ່ງທີ່ປະຊາຊົນທີ່ບ້ານຫາດສວນ ໄດ້ໃຫ້ການ
ຢືນຢັນວ່າ “ເຂື່ອນປ່ອຍນ້ຳມາກະຖືວ່າ ເຕັມຮ້ອຍແຫຼະ 232 ຫຼັງຄາເຮືອນຖ້ວມ
ໝົດເລີຍເພາະວ່າ ທາງເຂື່ອນນ້ຳລີກຮັ້ນ ປ່ອຍລົງມາຕື່ມ ບໍ່ມີທາງລະບາຍ ລໍຖ້າ
ແຕ່ນ້ຳງື່ມ ນ້ຳງື່ມຫຼຸດລົງ ກະແມ່ນຖືວ່າແຫ້ງ ນ້ຳງື່ມບໍ່ຫຼຸດ ກະແມ່ນຢູ່ຈັ່ງຊີ້ແຫຼະ
ຄັນສິເວົ້າແລ້ວກະບັນຫາໂຕທີ່ຂາດ ສ່ວນຫຼາຍ ກໍແມ່ນນ້ຳ ເລື້ອງຢູ່ເລື້ອງກິນ.”
ທາງດ້ານເຈົ້າໜ້າທີ່ ຂອງອົງການອາຫານແລະການກະເສດແຫ່ງສະຫະປະຊາຊາດ
(FAO) ທີ່ມີສຳນັກງານຢູ່ບາງກອກ ປະເທດໄທ ກໍເປີດເຜີຍວ່າ FAO ໄດ້ປະເມີນ
ເບື້ອງຕົ້ນວ່າ ໄພນ້ຳຖ້ວມຄັ້ງໃຫຍ່ທີ່ເກີດຂຶ້ນໃນທົ່ວປະເທດລາວ ເຮັດໃຫ້ເກີດການ
ເສຍຫາຍ ຫຼາຍກວ່າ 1,800 ຕື້ກີບ ໃນນີ້ພາກກະສິກຳ ເສຍຫາຍ 1,260 ຕື້ກີບ
ແລະການທີ່ຈະຮັບປະກັນໃຫ້ໄດ້ວ່າ ປະຊາຊົນລາວ ຈະບໍ່ຂາດສະບຽງອາຫານ
ໃນປີ 2019 ກໍຍັງຈະຕ້ອງຊຸກຍູ້ການປູກພືດລະດູແລ້ງໃຫ້ໄດ້ ໃນພື້ນທີ່ 185,000
ເຮັກຕາອີກດ້ວຍ.
ນອກຈາກນັ້ນ ໄພນ້ຳຖ້ວມຄັ້ງໃຫຍ່ໃນລາວ ຍັງເຮັດໃຫ້ຖະນົນເສຍຫາຍ 644 ເສັ້ນ
ຂົວ 49 ແຫ່ງ ເສົາໄຟຟ້າ 915 ຕົ້ນ ອາຄານຮຽນ 300 ກວ່າຫຼັງ ໂຮງໝໍ 2 ແຫ່ງ ສຸກ
ສາລາ 35 ແຫ່ງ ແຫຼ່ງນ້ຳບາດານ 5,910 ແຫ່ງ ນ້ຳສ້າງ 7,138 ແຫ່ງ ແລະວິດຖ່າຍ
22,962 ຫຼັງ.