ປະທານາທິບໍດີຢູເຄຣນ ທ່ານ ໂວໂລດີເມຍ ເຊເລັນສກີ ໄດ້ໃຫ້ຄຳໝັ້ນສັນຍາໃນວັນອັງຄານວານນີ້ວ່າ ຈະຍຶດເອົາພື້ນທີ່ຕ່າງໆຂອງຢູເຄຣນ ທີ່ກອງກຳລັງ ຣັດເຊຍ ຍຶດຄອງຢູ່ໃນຂະນະນີ້ຄືນມາ.
“ຢູເຄຣນ ຈະຍຶດເອົາດິນແດນ ແລະປະຊາຊົນຂອງຕົນຄືນມາ,” ທ່ານ ເຊເລັນສກີ ໄດ້ກ່າວໃນຄຳປາໄສໃນຕອນກາງຄືນຂອງທ່ານ. “ພວກເຮົາຈະບໍ່ປະຖິ້ມໃຜໄວ້ຢູ່ກັບຜູ້ເຂົ້າຍຶດຄອງ. ພວກເຮົາ ກຳລັງໃຊ້ທຸກວິທີທາງເພື່ອຮັບປະ ກັນວ່າສົງຄາມນີ້ຈະສິ້ນສຸດລົງດ້ວຍຄວາມຜ່າຍແພ້ຂອງຜູ້ເຂົ້າຍຶດຄອງ.”
ທ່ານຍັງກ່າວຕື່ມວ່າ, ເຖິງແມ່ນວ່າຈະມີຄວາມສົງໄສຈາກຫຼາຍຄົນໃນໂລກ, ແຕ່ຢູເຄຣນໄດ້ສະແດງໃຫ້ເຫັນວ່າຕົນສາມາດເອົາຊະນະໄດ້, ເຖິງວ່າຈະປະສົບກັບຄວາມຫຍຸ້ງຍາກທັງໝົດ, ໂດຍສະເພາະແມ່ນຢູ່ໃນເຂດທະເລດຳ.”
ໃນຕອນເຊົ້າວັນອັງຄານວານນີ້ ກະຊວງປ້ອງກັນປະເທດຣັດເຊຍ ກ່າວວ່າ ຕົນໄດ້ທຳລາຍເຮືອຂອງຢູເຄຣນ 3 ລຳ ທາງພາກເໜືອຂອງທະເລດຳ.
ຣັດເຊຍຍັງກ່າວວ່າ ຕົນໄດ້ດຳເນີນການ "ການຕ້ານການກໍ່ການຮ້າຍ" ໃກ້ກັບທ່າກຳປັ່ນ ເຊວາສໂຕໂປລ (Sevastopol), ເຊິ່ງເປັນທີ່ຕັ້ງຂອງກຳປັ່ນທະເລດຳຂອງຕົນ.
ຢູເຄຣນ ກ່າວໃນວັນອັງຄານວານນີ້ວ່າ ການໂຈມຕີຂອງຣັດເຊຍໃນສອງພາກສ່ວນຂອງປະເທດໄດ້ເຮັດໃຫ້ຢ່າງນ້ອຍ 8 ຄົນໄດ້ຮັບບາດເຈັບ.
ໃນເຂດເຄີຊັນ (Kherson) ທາງພາກໃຕ້ຂອງຢູເຄຣນ, ການໂຈມຕີທາງອາກາດ ແລະປືນໃຫຍ່ຂອງຣັດເຊຍ ໄດ້ເຮັດໃຫ້ 4 ຄົນໄດ້ຮັບບາດເຈັບ ແລະເຮັດໃຫ້ເຮືອນຫລາຍຫລັງໄດ້ຮັບຄວາມເສຍຫາຍ, ລັດຖະມົນຕີກະຊວງພາຍໃນ ທ່ານອິກໍ ໄຄລເມັນໂກ (Igor Klymenko) ກ່າວໃນສື່ສັງຄົມ.
ທ່ານ ໄຄລເມັນໂກ (Klymenko) ຍັງກ່າວອີກວ່າ ການໂຈມຕີຂອງຣັດເຊຍ ຢູ່ໃນຂົງເຂດຄາກີບ (Kharkiv) ທາງພາກຕາເວັນອອກສຽງເໜືອຂອງຢູເຄຣນ ໄດ້ເຮັດໃຫ້ 4 ຄົນໄດ້ຮັບບາດເຈັບ.
ກອງທັບອາກາດຢູເຄຣນ ກ່າວວ່າ ການປ້ອງກັນປະເທດຂອງຕົນໄດ້ຍິງໂດຣນ 6 ລຳ ທີ່ຣັດເຊຍຍິງຂຶ້ນຈາກໄຄຣເມຍ (Crimea) ຕົກ.
