ຄາດກັນວ່າ ປະທານາທິບໍດີຢູເຄຣນ ທ່ານໂວໂລດີເມຍ ເຊເລັນສກີ ຈະເດີນທາງມານະຄອນຫຼວງວໍຊິງຕັນ ໃນອາທິດໜ້າ ຂະນະທີ່ລັດຖະສະພາສະຫະລັດ ຍັງສືບຕໍ່ຖົກຖຽງກັນເລື້ອງເງິນອີກ 21 ຕື້ໂດລາ ເພື່ອຊ່ວຍເຫຼືອຢູເຄຣນສະໜັບ ສະໜູນ ການຕໍ່ສູ້ຕ້ານ ຣັດເຊຍ.
ສະມາຊິກສະພາສະຫະລັດ ໄດ້ມີຄວາມແຕກແຍກກັນຫລາຍຂຶ້ນກ່ຽວກັບວ່າຈະໃຫ້ການຊ່ວຍເຫລືອແກ່ຢູເຄຣນຕື່ມຫລືບໍ່ ໃນຂະນະທີ່ການຕໍ່ສູ້ຕ້ານການຮຸກຮານຂອງຣັດເຊຍ ຍັງດຳເນີນຕໍ່ໄປ. ປະທານາທິບໍດີ ໂຈ ໄບເດັນ ກໍາລັງຊອກຫາການຊ່ວຍເຫຼືອທາງດ້ານການທະຫານ ມູນຄ່າ 13 ຕື້ໂດລາ ແລະ 8 ຕື້ໂດລາໃນການຊ່ວຍເຫຼືອດ້ານມະນຸດສະທໍາ. ແຕ່ບັນດາສະມາຊິກສະພາຂອງພັກຣີພັບບລິກັນບາງຄົນ ບໍ່ເຫັນດີກັບການສົ່ງການຊ່ວຍເຫຼືອເພີ່ມຕື່ມ ໃຫ້ຢູເຄຣນ.
ຄາດວ່າ ທ່ານເຊເລັນສກີ ຈະພົບປະກັບທ່ານໄບເດັນ ໃນອາທິດໜ້າ ທີ່ທຳນຽບຂາວ ຫລັງກອງປະຊຸມສະມັດຊາໃຫຍ່ ສະຫະປະຊາຊາດ ທີ່ນະຄອນນິວຢອກ.
ເຖິງແມ່ນວ່າການໂຈມຕີຕອບໂຕ້ຄືນຂອງຢູເຄຣນຕໍ່ການຮຸກຮານຂອງຣັດເຊຍ ຈະຊ້າກວ່າທີ່ຄາດການໄວ້, ທ່ານເຊເລັນສກີ ໃນວັນພະຫັດວານນີ້ ໄດ້ສະເຫຼີມ ສະຫຼອງສິ່ງທີ່ທ່ານອະທິບາຍວ່າ ເປັນການທໍາລາຍ ລະບົບປ້ອງກັນໄພທາງອາ ກາດຂອງຣັດເຊຍໃນແຫຼມ ໄຄຣເມຍ ໂດຍຢູເຄຣນ.