ປະທານາທິບໍດີຢູເຄຣນ ທ່ານໂວໂລດີເມຍ ເຊເລັນສກີ ກ່າວໃນວັນຈັນມື້ນີ້ວ່າ ຟີລິບປິນ ຈະເຂົ້າຮ່ວມກອງປະຊຸມສັນຕິພາບທີ່ຈະຖືກຈັດຂຶ້ນໂດຍສະວິດເຊີແລນ ໃນເດືອນນີ້, ແລະທ່ານກໍໄດ້ຂອບໃຈ ຟີລິບປິນ ທີ່ໃຫ້ການສະໜັບສະໜູນແກ່ປະເທດຂອງຕົນ.
ຫຼັງຈາກປະທານາທິບໍດີຟີລິບປິນ ທ່ານເຟີດີນານ ມາໂກສ ຈູເນ່ຍ ເປັນເຈົ້າພາບ ຈັດການຫາລືຢູ່ທຳນຽບປະທານາທິບໍດີ, ທ່ານ ເຊເລັນສກີ ກ່າວໃນສື່ສັງຄົມ X ວ່າ ຢູເຄຣນ ມີແຜນທີ່ຈະເປີດສະຖານທູດຢູ່ນະຄອນຫຼວງມະນິລາພາຍໃນປີນີ້.
ທ່ານ ເຊເລັນສກີ ກ່າວວ່າ “ຂ້າພະເຈົ້າຂໍສະແດງຄວາມຂອບໃຈຕໍ່ ຟີລິບປິນ ທີ່ໄດ້ໃຫ້ການສະໜັບສະໜູນເອກະລາດອະທິປະໄຕ ແລະຜືນແຜ່ນດິນຂອງຢູເຄຣນ ສຳລັບຈຸດຢືນທີ່ແຈ່ມແຈ້ງກ່ຽວກັບການຮຸກຮານປະເທດພວກເຮົາຂອງ ຣັດເຊຍ, ແລະ ສໍາລັບການສະຫນັບສະຫນູນມະຕິສຳຄັນຕ່າງໆຂອງອົງການສະຫະປະຊາຊາດ.
ຜູ້ນຳຂອງຢູເຄຣນ ໄດ້ເດີນທາງໄປສິງກະໂປໃນວັນອາທິດວານນີ້ ແລະກ່າວຕໍ່ກອງປະຊຸມດ້ານຄວາມໝັ້ນຄົງວ່າ ຈີນກໍາລັງພະຍາຍາມຊ່ວຍເຫຼືອຣັດເຊຍເພື່ອຂັດຂວາງກອງປະຊຸມສັນຕິພາບທີ່ຈະຈັດຂຶ້ນໃນລະຫວ່າງວັນທີ 15 ຫາ 16 ມິຖຸນາ, ໂດຍຈີນກໍາລັງດໍາເນີນການກົດດັນບັນດາຜູ້ນຳຂອງປະເທດຕ່າງໆເພື່ອບໍ່ໃຫ້ເຂົ້າຮ່ວມກອງປະຊຸມດັ່ງກ່າວ.
ຈີນ ໄດ້ຮຽກຮ້ອງໃຫ້ຈັດກອງປະຊຸມສັນຕິພາບດ້ວຍການເຂົ້າຮ່ວມຢ່າງສະເໝີພາບຂອງທຸກຝ່າຍ, ເຊິ່ງລວມມີ ຣັດເຊຍ ທີ່ບໍ່ໄດ້ຮັບການເຊື້ອເຊີນ. ຣັດເຊຍ ຍັງໄດ້ຮ້ອງແຜນການສັນຕິພາບຂອງ ທ່ານ ເຊເລັນສກີ ທີ່ກໍາລັງຮຽກຮ້ອງໃຫ້ ຣັດເຊຍ ຖອນໂຕອອກຈາກດິນແດນຢູເຄຣນວ່າ ບໍ່ມີໂອກາດທີ່ຈະປະສົບຄວາມສຳເລັດ.
ເຖິງແມ່ນຈະມີການປະກາດເຖິງຄວາມເປັນກາງ, ແຕ່ການຄ້າຂອງ ຈີນ ກັບ ຣັດເຊຍ ແມ່ນມີການເຕີບໃຫຍ່ຂະຫຍາຍໂຕຂຶ້ນ, ເຊິ່ງໄດ້ສົ່ງຜົນເຮັດໃຫ້ ມົສກູ ສາມາດແກ້ໄຂມາດຕະການລົງໂທດທາງເສດຖະກິດຂອງບັນດາປະເທດຕາເວັນຕົກໄດ້.
ຟໍຣັມສະແດງຄວາມຄິດເຫັນ