ຢູເຄຣນກ່າວໃນວັນພຸດມື້ນີ້ວ່າ ກອງກຳລັງຂອງຣັດເຊຍ ໄດ້ໂຈມຕີປະເທດຕົນໃນຕອນກາງຄືນທີ່ຜ່ານມາ ດ້ວຍລູກສອນໄຟນຳວິຖີ 3 ລູກ ແລະເຮືອບິນບໍ່ມີຄົນຂັບ ຊາເຮດ (Shehed) ອີກ 4 ລຳ.
ກອງທັບອາກາດຢູເຄຣນລາຍງານວ່າ ພວກເຂົາເຈົ້າໄດ້ທຳລາຍເຮືອບິນບໍ່ມີຄົນຂັບທັງໝົດ 4 ລຳ ໂດຍການສະກັດກັ້ນທີ່ເກີດຂຶ້ນຢູ່ໃນເຂດ ຄາເມລນິສກີ (Khmelnytskyi), ໄຊໂຕເມຍ (Zhytomyr), ຄິໂຣໂວຣາດ (Kirovohrad) ແລະ ເຊິຣ໌ຄາຊີ (Cherkasy).
ທ່ານອັນດຣີ ເຣໂຄວິຈ໌ (Andriy Raykovych), ຜູ້ປົກຄອງພາກພື້ນ ຄິໂຣໂວຣາດ ກ່າວວ່າ ໄດ້ເກີດໄຟໄໝ້ຂະໜາດນ້ອຍຂຶ້ນ ຈາກການໂຈມຕີດັ່ງກ່າວ, ແຕ່ບໍ່ມີລາຍງານຂອງຜູ້ທີ່ໄດ້ຮັບບາດເຈັບ.
ກອງທັບອາກາດກ່າວວ່າ ລູກສອນໄຟໄດ້ແນເປົ້າໝາຍໃສ່ຂົງເຂດ ດອນເນດສ໌ ທີ່ຕັ້ງຢູ່ທາງພາກຕາເວັນອອກຂອງຢູເຄຣນ. ແຕ່ບໍ່ມີລາຍງານກ່ຽວກັບຄວາມເສຍຫາຍຕ່າງໆໃນທັນທີ.
ປະທານາທິບໍດີຢູເຄຣນ ທ່ານໂວໂລດີເມຍ ເຊເລັນສກີ, ໃນວັນອັງຄານວານນີ້ ໄດ້ລົງນາມໃນຮ່າງກົດໝາຍທີ່ຈະຫຼຸດອາຍຸຂອງການເຂົ້າຮັບໜ້າທີ່ທາງທະຫານລົງ ຈາກ 27 ປີ ມາເປັນ 25 ປີ.
ຮ່າງກົດໝາຍດັ່ງກ່າວ ໄດ້ເພີ້ມຈຳນວນພົນລະເຮືອນທີ່ກອງທັບຢູເຄຣນສາມາດລະດົມເຂົ້າໃນການສູ້ລົບໄດ້, ເຊິ່ງເປັນບາງສິ່ງທີ່ກອງທັບໄດ້ຮຽກຮ້ອງໃຫ້ລັດຖະບານດຳເນີນມາດຕະການມາເປັນເວລາຫຼາຍເດືອນແລ້ວ.
ຮ່າງກົດໝາຍສະບັບນີ້ ມີຂຶ້ນໃນຂະນະທີ່ປະເທດນີ້ ປະສົບກັບການສູນເສຍທາງທະຫານມາຫຼາຍກວ່າ 2 ປີ ລຸນຫຼັງຖືກຮຸກຮານໂດຍ ຣັດເຊຍ.
ທ່ານ ເຊເລັນສກີ ໄດ້ເຊັນລົງນາມໃນຮ່າງກົດໝາຍດັ່ງກ່າວປະມານນຶ່ງປີ ຫລັງຈາກໄດ້ຮັບການຮັບຮອງເອົາຈາກລັດຖະສະພາຢູເຄຣນ.
ຟໍຣັມສະແດງຄວາມຄິດເຫັນ