ລິ້ງ ສຳຫລັບເຂົ້າຫາ

ພວກຄອບຄົວນັກສຶກສາຈາກເອເຊຍ ຢ້ຽມຢາມບ່ອນເກີດ ແຜ່ນດິນໄຫວ ທີ່ເມືອງ Christchurch

  • ສິງ ບູຣົມມະວົງ

ຊາກຫັກພັງຈາກແຜ່ນດິນໄຫວທີ່ເມືອງ Christchurch ນີວຊີແລນ ວັນທີ 25 ກຸມພາ 2011


















ພວກ​ຄອບຄົວ​ຂອງ​ບັນດາ​ນັກສຶກ​ສາ​ຮຽນ​ພາສາ​ຕ່າງປະ​ເທດ​ທີ່​ມີ​ຄວາມ​ໂສກ​ເສົ້າ​ຈາກ​ທົ່ວ​ເອ​ເຊຍ​ໄດ້​ໄປ​ເບິ່ງ​ຊາກ​ຂອງຕຶກອາຄານທີ່​ໄດ້ຫັກພັງ​ລົງມາທັບ​ຖົມ​ພວກ​ລູກ​ເຕົ້າຂອງ​ເຂົາ​ເຈົ້າ​ ຈາກ​ໄພ​ແຜ່ນດິນ​ໄຫວ​ທີ່​ເກີດຂຶ້ນ​ໃນ​ເມືອງ Christchurch ປະ​ເທດ​ນີວຊີ​ແລນ​ໃນ​ສັບປະດາ​ຜ່ານ​ມາ​ເປັນ​ຄັ້ງ​ທໍາ​ອິດ. ພວກ​ແຂກ​ຈາກ​ຕ່າງປະ​ເທດ​ປະມານ 250 ຄົນ​ແລະ​ພວກ​ຊາວ​ນີວຊີ​ແລນ​ຫລາຍ​ກວ່າ 100 ຄົນ​ໄດ້​ເດີນທາງ​ໄປ​ນໍາລົດ​ບັສຫລາຍ​ຄັນ​ໃນ​ວັນ​ພຸດ​ມື້​ນີ້ເພື່ອ​ໄປ​ເບິ່ງ​ຊາກ​ສະຫລັກ​ຫັກ​ພັງ​ຂອງຕຶກ​ອາຄານ​ຕ່າງໆ​ໃນ​ໃຈກາງ​ເມືອງ Christchurch ຮວມທັງ​ຕຶກ Canterbury TV ທີ່​ເປັນ​ບ່ອນ​ພັກ​ເຊົາ​ພວກ​ນັກ​ສຶກສາ​ຕ່າງປະ​ເທດ ​ທີ່ໄປ​ຮຽນ​ພາສາ​ຢູ່​ທີ່​ນັ້ນ.

ພວກ​ນັກ​ສຶກສາ​ຈໍານວນ​ຫລາຍ​ກວ່າ 60 ຄົນ​ຈາກ​ຍີ່ປຸ່ນ ຈີນ ຟີ​ລິບ​ປິນ ໄທ ​ແລະ​ຈາກ​ປະ​ເທດ​ອື່ນໆ​ຍັງ​ຊອກ​ຫາ​ບໍ່​ເຫັນ ​ແລະ​ເຊື່ອ​ກັນ​ວ່າ​ຊາກ​ສົບ​ຂອງ​ພວກ​ເຂົາ​ເຈົ້າ​ຍັງ​ຝັງ​ຢູ່​ກ້ອງເສດ​ຊາກສະຫລັກ​ຫັກ​ພັງນັ້ນ​ຢູ່. ທ່ານ Dave Cliff ຜູ້ບັນຊາການ​ຕໍາຫລວດ​ກ່າວ​ຕໍ່ບັນດາ​ນັກ​ຂ່າວ​ກ່ຽວ​ກັບ​ບັນຍາກາດ​ຂອງ​ການ​ຢ້ຽມຢາມ​ຄັ້ງ​ນີ້​ວ່າ ​ໂສກ​ເສົ້າ​ແລະ​ສະ​ເທືອ​ນຈິດສະ​ເທືອ​ນ​ໃຈ ​ແຕ່​ທ່ານກໍຄຶດ​ວ່າການ​ກະທໍາ​ເຊ່ນ​ນີ້​ຊ່ອຍ​ພວກ​ຄອບຄົວພວກນັກສຶກສາເຫັນ​ວ່າ​ແຜ່ນດິນ​ໄຫວ​ທີ່​ວ່າ​ນີ້ ໄດ້​ສ້າງ​ຄວາມ​ເສຍ​ຫາຍຫລື​ທໍາລາຍຮ້າຍແຮງຂະໜາດໃດ.

ໃນ​ແຫ່ງ​ອື່ນໆ​ຂອງ​ເມືອງ Christchurch ພວກ​ຊ່ອຍ​ກູ້​ໄພ​ໄດ້​ຕໍ່ສູ້​ກັບ​ລົມ​ແຮງ​ແລະ​ແລະ​ພາຍຸ​ຂີ້ຝຸ່ນ​ເພື່ອເກັບ​ກູ້​ຊາກ​ສົບ​ໄດ້​ຕື່ມ​ອີກ 5 ສົບ​ໃນ​ຄືນ​ຜ່ານ​ມາ​ແລະ​ວັນ​ພຸດ​ມື້​ນີ້ ຊຶ່ງ​ເຮັດ​ໃຫ້​ຈໍານວນ​ພວກ​ທີ່ມີ​ການ​ຢືນຢັນ​ວ່າ​ໄດ້​ເສຍ​ຊີວິດ​ຈາກ​ໄພ​ແຜ່ນດິນໄຫວເພີ່ມ​ຂຶ້ນ​ເປັນ 160 ຄົນ. ພວກ​ເຈົ້າ​ໜ້າ​ທີ່ກ່າວ​ວ່າ ​ເຂົາ​ເຈົ້າ​ບໍ່​ຄາດ​ວ່າ​ຈະ​ໄດ້​ພົບ​ເຫັນ​ພວກ​ທີ່ອາດ​ລອດ​ຊີວິດ​ມາ​ໄດ້​ຕື່ມ​ອີກ ​ແລະ​ເຊື່ອ​ວ່າຈໍານວນ​ຜູ້​ເສຍ​ຊີວິດ​ທັງ​ໝົດ​ ຈະຕົກ​ເປັນ​ປະມານ 240 ຄົນ.

XS
SM
MD
LG