ໃນຕອນແລງຂອງເດືອນກຸມພາຜ່ານມາ, ທະຫານລັດຖະບານມຽນມາກຸ່ມນຶ່ງ ໄດ້ຈັບໂຕ ທ້າວ ຍານ ໂມຮຳມັດ (Jan Mohammad) (ເຊິ່ງບໍ່ແມ່ນຊື່ແທ້ຂອງລາວ) ຈາກເມືອງ ມ່ອງດໍ (Maungdaw) ຂອງມຽນມາ. ເມື່ອພວກເຂົາ ໄດ້ພາຊາຍຊາວໂຣຮິງຢາ ອາຍຸ 24 ປີຄົນນີ້ ໄປທີ່ຄ້າຍທະຫານທີ່ຢູ່ໃກ້ໆແຫ່ງນຶ່ງ, ລາວຮູ້ແລ້ວວ່າ ລາວໄດ້ຖືກບັງຄັບໃຫ້ເຂົ້າເປັນທະຫານໂດຍກອງທັບມຽນມາ.
"ພວກທະຫານຂອງລັດຖະບານທະຫານມຽນມາ ບໍ່ໄດ້ເວົ້າຫຍັງຫຼາຍ. ພວກເຂົາພຽງແຕ່ເວົ້າວ່າ, ‘ມາກັບພວກເຮົາ’. ພວກເຂົາຊີ້ປືນມາທີ່ຂ້ອຍໂດຍກົງ. ຂ້ອຍຢ້ານ ເມື່ອຂ້ອຍເຫັນວ່າ ປືນຊີ້ມາທີ່ຂ້ອຍ,” ທ້າວຍານ ໂມຮຳມັດ ກ່າວໃນການໃຫ້ສໍາພາດກັບກຸ່ມປົກປ້ອງສິດທິມະນຸດ Fortify Rights ຫຼັງຈາກທີ່ລາວ ໄດ້ຫລົບຫນີອອກຈາກຄ້າຍຝຶກຊ້ອມທະຫານຂອງລັດຖະບານທະຫານ.
ລາວເວົ້າມາຈາກບັງກລາແດັສ, ບ່ອນທີ່ລາວເວົ້າວ່າລາວໄດ້ຫລົບໜີໄປແລ້ວ 10 ມື້ ຫລັງຈາກການບັງຄັງໃຫ້ຝຶກຊ້ອມທາງທະຫານໄດ້ເລີ້ມຕົ້ນຂຶ້ນ, ອີງຕາມລາຍງານຂອງກຸ່ມສິດທິມະນຸດ ທີ່ຍັງບໍ່ທັນໄດ້ຖືກພິມເຜີຍແຜ່ ແລະໄດ້ເລົ່າເລື້ອງນີ້ໃຫ້ວີໂອເອຟັງ ແຕ່ພຽງຜູ້ດຽວ.
ທ້າວ ຍານ ໂມຮຳມັດ (Jan Mohammad) ກ່າວວ່າ "[ໃນລະຫວ່າງການຝຶກຊ້ອມທະຫານ], ພວກເຮົາຕ້ອງຮຽນຮູ້ວິທີຄານດ້ວຍສອກຂອງພວກເຮົາ ແລະວິທີຖືປືນເປັນແຖວ, ມັນແມ່ນສ່ວນນຶ່ງ ຂອງການຝຶກຊ້ອມທະຫານ. … ຂ້ອຍບໍ່ຢາກເປັນທະຫານ. ພວກເຂົາ [ທະຫານມຽນມາ] ໄດ້ຂົ່ມເຫັງພວກເຮົາ. … ເປັນຫຍັງຂ້ອຍຈຶ່ງຕ້ອງສະໜັບສະໜູນພວກເຂົາ ບັດນີ້?”
ທ້າວ ຍານ ໂມຮຳມັດ (Jan Mohammad) ບໍ່ແມ່ນຊາວໂຣຮິງຢາຄົນດຽວ ທີ່ຖືກລັກພາຕົວໄປ ແລະຖືກບັງຄັບໃຫ້ຕໍ່ສູ້ກັບ ໂດຍຂັດກັບຄວາມຕັ້ງໃຈຂອງລາວ.
ຟໍຣັມສະແດງຄວາມຄິດເຫັນ