ນາຍົກລັດຖະມົນຕີຄົນຕໍ່ໄປຂອງປະເທດໄທ ທ່ານນາງ ຍິ່ງລັກ ຊິນນະວັດ ນອກຈາກ
ຈະເປັນນາຍົກລັດຖະມົນຕີຍິງຜູ້ທໍາອິດຂອງໄທ ແລ້ວກໍຍັງຖືກເບິ່ງເຫັນວ່າ ເປັນຫຸ່ນຫຼືຕົວແທນຂອງອະດີດນາຍົກລັດຖະມົນຕີ ທັກສິນ ຊິນນະວັດ ຜູ້ເປັນອ້າຍນັ້ນນໍາອີກ.
ທ່ານນາງ ຍິ່ງລັກ ນັກທຸລະກິດ ໄວ 44 ປີ ຍັງບໍ່ເຄີຍມີປະສົບການ ທາງການເມືອງ
ຫຼືຮັບໃຊ້ໃນຕໍາແໜ່ງໃດໃນຄະນະລັດຖະບານມາກ່ອນ. ແຕ່ວ່າຄືກັນກັບຜູ້ເປັນອ້າຍ
ນາງມີຄວາມສາມາດໃນການສື່ສານແລະເຂົ້າເຖິງປະຊາຊົນຜູ້ມີສິດເລືອກຕັ້ງໄດ້ດີ
ຢ່າງທີ່ນາຍົກລັດຖະມົນຕີ ອະພິສິດ ເວດຊາຊິວະ ບໍ່ສາມາດເຮັດໄດ້.
ເວລານີ້ ອະດີດນາຍົກລັດຖະມົນຕີທັກສິນ ຍັງລີ້ໄພຢູ່ໃນ Dubai ເພື່ອຫລົບໜີໂທດ
ຈໍາຄຸກ 2 ປີ ໃນຄະດີສໍ້ລາດບັງຫຼວງ ທີ່ທ່ານທັກສິນກ່າວວ່າ ມີສາເຫດທາງການເມືອງ
ຫຼາຍກວ່າ. ຜ່ານມາ ທ່ານທັກສິນເຄີຍເອີ້ນ ຍິ່ງລັກ ນ້ອງສາວຫລ້າວ່າ ເປັນຕົວແທນ
ຂອງທ່ານເພາະເໝືອນກັນກັບທ່ານຫລາຍ.
ທ່ານນາງ ຍິ່ງລັກ ໄດ້ປະຕິຍານວ່າຈະສືບຕໍ່ດໍາເນີນໂຄງການຕ່າງໆທີ່ສົ່ງ ເສີມເກື້ອ
ກຸນປະຊາຊົນຂອງຜູ້ເປັນອ້າຍ ແລະຈະປະສານເຊື່ອມໂຍງການແຕກແຍກທາງການ
ເມືອງໃນໄທຍ ທີ່ໄດ້ເກີດຂຶ້ນຫຼັງຈາກທີ່ໄດ້ມີການກໍ່ລັດຖະປະຫານ ໂຄ່ນລົ້ມທ່ານ
ທັກສິນອອກຈາກອໍານາດ ໃນປີ 2006 ນັ້ນ. ເປັນທີ່ຄາດໝາຍກັນອີກວ່ານາງຈະພະ
ຍາຍາມຫາທາງໃຫ້ມີການໃຫ້ອະໄພຍະໂທດແກ່ບັນດານັກໂທດທາງການເມືອງອີກ
ຊຶ່ງຈະເປັນການເປີດໂອກາດໃຫ້ອ້າຍຂອງນາງກໍຄືທ່ານທັກສິນນັ້ນກັບຄືນປະເທດໄດ້.
ຍິ່ງລັກ ກ່າວວ່າ ການນິລະໂທດກໍາ ນີ້ບໍ່ແມ່ນພຽງແຕ່ຈະຊ່ອຍເຫຼືອອ້າຍຂອງທ່ານ
ນາງເທົ່ານັ້ນ ແຕ່ຍັງເປັນການຊ່ວຍໃຫ້ຊາວໄທປອງດອງກັນ ລຸນຫລັງການແຕກແຍກ
ກັນທາງການເມືອງ ມານານຫຼາຍປີແລ້ວນັ້ນ.
