ຊາວເຢເມນ ພາກັນໄປປ່ອນບັດເລືອກຕັ້ງເອົາປະທານາທິບໍດີຄົນໃໝ່ ເພື່ອຮັບຕຳແໜ່ງ
ແທນທ່ານ Ali Abdullah Saleh ຫລັງຈາກທີ່ໄດ້ມີການລຸກຮືຂື້ນມາເປັນເວລານຶ່ງປີ
ບັງຂັບໃຫ້ທ່ານລາອອກຈາກໜ້າທີ່ນັ້ນ.
ການປ່ອນບັດໃນວັນອັງຄານມື້ນີ້ ແມ່ນຈຸດສຳຄັນສຸດຂອງຂໍ້ຕົກລົງ ທີ່ໄດ້ຮັບການໜຸນ
ຫລັງຈາກສະຫະລັດ ແລະໄກເກ່ຍໂດຍບັນດາປະເທດ ໃນເຂດອ່າວເປີເຊຍ ຊຶ່ງເປັນເພື່ອນ
ບ້ານຂອງເຢເມນ ເພື່ອໃຫ້ຮອງປະທານາທິບໍດີ Abed Rabbo Mansour Hadi ເຂົ້າ
ຮັບຕຳແໜ່ງແທນ ທ່ານ Saleh.
ທ່ານ Hadi ແມ່ນຄົນດຽວທໍ່ນັ້ນທີ່ໄດ້ຖືກເລືອກຢ່າງເປັນເອກກະສັນທັງ ຈາກພັກລັດ
ຖະບານທີ່ປົກຄອງປະເທດຢູ່ໃນເວລານີ້ຂອງປະທານາທິບໍດີ Saleh ແລະກຸ່ມແນວໂຮມ
ພັກຝ່າຍຄ້ານ.
ທ່ານ Saleh ຊຶ່ງໄດ້ລາອອກຈາກໜ້າທີ່ຫລັງຈາກທີ່ໄດ້ກໍາຕໍາແໜ່ງມາເປັນເວລາ 33 ປີ
ນັ້ນໄດ້ຮຽກຮ້ອງໃຫ້ປະຊາຊົນພາກັນໄປປ່ອນບັດຢ່າງຫລວງຫລາຍ. ທ່ານກ່າວໃນວັນຈັນ
ວານນີ້ວ່າ ການປ່ອນບັດແມ່ນໂອກາດທີ່ຈະນຳພາປະເທດຊາດ ໃຫ້ກ້າວໄປສູ່ສັນຕິພາບ
ແລະສະຖຽນລະພາບ.
ໜ່ວຍປ່ອນບັດໄດ້ເປີດຂື້ນໃນເວລາ 8:00 ໂມງເຊົ້າ ຕາມເວລາທ້ອງຖິ່ນແລະຜົນການປ່ອນ
ບັດນັບຄະແນນສຽງຈະໃຊ້ເວລາອີກຫລາຍວັນ ຈຶ່ງຈະເປັນທີ່ຮູ້ຈັກ.
ປະຊາຊົນຊາວເຢເມນຫຼາຍກວ່າ 10 ລ້ານຄົນ ເປັນຜູ້ມີສິດການປ່ອນບັດ ແຕ່ເນື່ອງຈາກວ່າ
ຜົນຂອງການປ່ອນບັດ ໄດ້ຮູ້ກ່ອນລ່ວງໜ້າແລ້ວ ຈຶ່ງມີຄວາມວິຕົກກັງວົນໃຈວ່າ ຈະມີຜູ້ໄປ
ປ່ອນບັດໃນຈຳນວນທີ່ໜ້ອຍລົງ ຊຶ່ງອາດຈະເປັນການບ່ອນທຳລາຍຕໍ່ສິດອຳນາດຂອງ
ທ່ານ Hadi.
