ພວກເຫັນເຫດການໃນເຢເມນ ໄດ້ແຈ້ງໃຫ້ຊາບວ່າມີການຍິງກັນໃນ ນະຄອນຫລວງ Sana’a ເຖິງແມ່ນມີຂໍ້ຕົກລົງຢຸດຍິງທີ່ມີວັດຖຸປະສົງເພື່ອຢຸດການປະທະກັນມາໄດ້ຫລາຍມື້ ທີ່ເຮັດໃຫ້ຜູ້ຄົນເສຍຊີວິດໄປຫລາຍກວ່າ 70 ຄົນແລະບາດເຈັບອີກຫລາຍຮ້ອຍຄົນກໍຕາມ.
ໄດ້ຍິນສຽງປືນດັງຂຶ້ນຫລາຍຄັ້ງໃນວັນພຸດມື້ນີ້ຢູ່ໃນເຂດນຶ່ງໃກ້ໆກັບ ບ້ານພັກຂອງຮອງປະທານາທິບໍດີ Abed Rabbo Mansour Hadi ທີ່ເປັນຜູ້ເຈລະຈາການຢຸດຍິງກັນໃນແລງວັນອັງຄານວານນີ້. ບໍ່ມີລາຍງານແຈ້ງໃຫ້ຊາບກ່ຽວກັບການບາດເຈັບແລະລົ້ມຕາຍໃນເວລານີ້.
ທັງຝ່າຍກໍາລັງລັດຖະບານແລະທະຫານຝ່າຍຄ້ານຕ່າງກໍໃຫ້ຄໍາໝັ້ນສັນຍາວ່າຈະປະຕິບັດຕາມຂໍ້ຢຸດຍິງກັນນັ້ນ. ພວກທະຫານຝ່າຍຄ້ານທີ່ມີຄວາມຈົງຮັກພັກດີຕໍ່ທ່ານ Ali Mohsen al-Ahmar ນາຍພົນສູງສຸດທີ່ໂຕນໜີຈາກຝ່າຍລັດຖະບານໄປຮ່ວມກັບຝ່າຍຄ້ານໃນເດືອນມີນາຜ່ານມານັ້ນ.
ປະຊາຊົນຢ່າງໜ້ອຍ 23 ຄົນໄດ້ເສຍຊີວິດໃນວັນອັງຄານມື້ວານນີ້ ກ່ອນການຢຸດຍິງກັນຈະມີຜົນບັງຄັບໃຊ້. ການປະທະກັນຫລາຍບັ້ນໄດ້ບັງຄັບໃຫ້ພວກພົນລະເຮືອນຫລາຍພັນຄົນຕ້ອງຫລົບໜີຈາກນະຄອນ ຫລວງ Sana’a ເພື່ອຫາບ່ອນທີ່ປອດໄພໃນຂົງເຂດຊົນນະບົດຕ່າງໆນັ້ນ.
ໃນວັນອັງຄານວານນີ້ ສະຫະລັດໄດ້ປະນາມຄວາມຮຸນແຮງທີ່ເກີດຂຶ້ນ ແລະຮຽກຮ້ອງໃຫ້ທຸກພັກຝ່າຍໃຊ້ຄວາມຍັບຍັ້ງ.
