ເຢເມນສັ່ງໃຫ້ຄຸ້ມຄອງ ພວກເດີນຂະບວນປະທ້ວງ

ປະທານາທິບໍດີເຢເມນ ທ່ານ Ali Abdullah Saleh
ຮຽກຮ້ອງໃຫ້ກຳລັງຮັກສາຄວາມສະຫງົບ ໃຫ້ຄວາມ
ຄຸ້ມຄອງແກ່ພວກເດີນຂະບວນປະທ້ວງ ທີ່ຮຽກຮ້ອງ
ໃຫ້ທ່ານລາອອກນັ້ນ.

ອົງການຂ່າວ Saba ຂອງທາງການເຢເມນໄດ້ພິມເຜີຍ
ແຜ່ຖະແຫຼງການສະບັບນຶ່ງ ທີ່ເວົ້າວ່າ ທ່ານ Saleh
ໄດ້ມີຄຳສັ່ງໃຫ້ກຳລັງຮັກສາຄວາມສະຫງົບ ປ້ອງກັນບໍ່
ໃຫ້ມີການປະທະກັນ ລະຫວ່າງພວກປະທ້ວງ ທີ່ນິຍົມ
ແລະຕໍ່ຕ້ານລັດຖະບານ.

ນອກນັ້ນແລ້ວ ທ່ານຍັງໄດ້ຮຽກຮ້ອງໃຫ້ທັງສອງຝ່າຍເອົາມາດຕະການລະມັດລະວັງຕໍ່ຕ້ານ
ພວກທີ່ອາດຈະພະຍາຍາມແຊກຊຶມເຂົ້າໄປໃນຖັນແຖວຂອງພວກປະທ້ວງແລະຍຸແຍ່ໃຫ້ເກີດ
ຄວາມຮຸນແຮງ.

ໃນມື້ວານນີ້ ພວກປະທ້ວງຕໍ່ຕ້ານລັດຖະບານຫຼາຍພັນຄົນໄດ້ໄປໂຮມຊຸມນຸມກັນທີ່ຈະຕຸລັດ
ແຫ່ງນຶ່ງ ໃນນະຄອນຫຼວງ Sana’a.

ມີຜູ້ເສຍຊີວິດແລ້ວຢ່າງນ້ອຍ 12 ຄົນ ໃນຄວາມຮຸນແຮງ ຈາກການເດີນຂະບວນປະທ້ວງທີ່
ໄດ້ເລີ້ມຕົ້ນມາໃນເດືອນນີ້ຢູ່ເຢເມນນັ້ນ.