ເຢເມນ ສະເຫລີມສະຫລອງວັນຄົບຮອບ 22 ປີຂອງການເຕົ້າໂຮມກັນໃນມື້ນີ້ ນຶ່ງມື້
ຫລັງຈາກ ທີ່ຄົນວາງລະເບີດສະລະຊີບ ໄດ້ສັງຫານທະຫານຢ່າງໜ້ອຍ 96 ຄົນ
ແລະເຮັດໃຫ້ຮັບບາດເຈັບອີກ 200 ກວ່າຄົນ ໃນລະຫວ່າງການຝຶກຊ້ອມເດີນສວນ
ສະໝາມ ເພື່ອສະຫລອງວັນເອກກະລາດນັ້ນ.
ການສວນສະໜາມໃນມື້ນີ້ ໄດ້ມີຂຶ້ນໃນລະດັບນ້ອຍກວ່າ ຊຶ່ງໄດ້ຍ້າຍໄປເຮັດຢູ່ເດີ່ນ
ໂຮງຮຽນກອງທັບອາກາດ ໃນເມືອງຫລວງ Sana’a.
ປະທານາທິບໍດີ ເຢເມນ ທ່ານ Abed Robbo Mansour Hadi ໄດ້ຊົມການສະຫລອງ
ຢູ່ເບື້ອງຫລັງກະຈົກກັນລູກປືນ.
ມີຄົນຈໍານວນນ້ອຍ ທີ່ພາກັນອອກມານອກບ້ານເຮືອນ ເພາະຢ້ານມີການໂຈມຕີອີກ.
ກຸ່ມກໍ່ການຮ້າຍ Al-Qaida ໄດ້ອ້າງເອົາຄວາມຮັບຜິດຊອບ ຕໍ່ການໂຈມຕີສະລະຊີບ
ໃນວັນຈັນວານນີ້ ແລະກ່າວວ່າ ການໂຈມຕີແມ່ນເປັນການແກ້ແຄ້ນຕໍ່ອັນທີ່ພວກເຂົາ
ເອີ້ນວ່າ ການທໍາສົງຄາມທີ່ໄດ້ຮັບການໜູນຫລັງຈາກສະຫະລັດອາເມຣິກາ ຕໍ່ຕ້ານ
ບັນດາຜູ້ສະໜັບສະໜຸນພວກເຂົາ.
ເຈົ້າໜ້າທີ່ເຢເມນກ່າວວ່າ ຄົນຮ້າຍທີ່ສົງໃສວ່າເປັນທະຫານນອກຮີດຄົນນຶ່ງໄດ້ບີບ
ຂະນວນລະເບີດຂຶ້ນ ໃນຂະນະທີ່ພວກທະຫານຫລາຍຮ້ອຍຄົນ ພາກັນລຽນແຖວ
ເພື່ອເຝິກຊ້ອມການເດີນສວນສະໜາມຂອງທະຫານ ເພືີ່ອສະຫລອງການໂຮມ
ເຂົ້າກັນ ລະຫວ່າງພາກໃຕ້ກັບພາກເໜືອຂອງເຢເມນນັ້ນ.
ລັດຖະມົນຕີປ້ອງກັນປະເທດ ແລະຫົວໜ້າກອງເສນາທິການ ທັງສອງທ່ານກໍຢູ່ທີ່
ບ່ອນເຝິກຊ້ອມນັ້ນນໍາ ແຕ່ບໍ່ໄດ້ຮັບບາດເຈັບ. ກູ່ມກໍ່ການຮ້າຍ Al-Qaida ທີ່ແຫລມ
ອາເຣເບຍ ກ່າວວ່າ ລັດຖະມົນຕີປ້ອງກັນປະເທດ ແມ່ນເປັນເປົ້າໝາຍຂອງການວາງ
ລະເບີດຄັ້ງນີ້ ແລະເຕືອນວ່າ ຈະມີການໂຈມຕີຕື່ມອີກ ຖ້າຫາກວ່າລັດຖະບານບໍ່ຢຸດ
ເຊົາທໍາການໂຈມຕີພວກເຂົາ.
