ການຍິງປືນໃຫຍ່ແລະປືນກົນໂຈມຕີຢ່າງໜັກ ໄດ້ສັ່ນສະເທືອນະຄອນຫລວງ Sana’a ຂອງ
Yemen ໃນຂະນະທີ່ຄວາມຮຸນແຮງຮ້າຍກາດສຸດ ໃນການລຸກຮືຂຶ້ນມາເປັນເວລາ 7 ເດືອນ
ຕໍ່ຕ້ານປະທານາທິບໍດີ Ali Abdullah Saleh ຍັງດຳເນີນຢູ່ຕໍ່ມາ ເປັນມື້ທີສາມ.
ບັນດາເຈົ້າໜ້າທີ່ການແພດກ່າວວ່າ ການສູ້ລົບກັນໃນວັນອັງຄານມື້ນີ້ລະຫວ່າງພວກກໍາລັງ
ຮັກສາຄວາມປອດໄພຂອງລັດຖະບານແລະພວກປະທ້ວງ ໄດ້ສັງຫານປະຊາຊົນໄປຢ່າງ
ໜ້ອຍ 2 ຄົນແລະບາດເຈັບຕື່ມອີກຫລາຍຄົນ. ພວກທີ່ເຫັນເຫດການກ່າວວ່າ ລູກປືນໃຫຍ່
ໄດ້ຕົກລົງໃສ່ຈັດຕຸລັດເພື່ອການປ່ຽນແປງ ບ່ອນທີ່ພວກປະທ້ວງໄດ້ພາກັນມາຕັ້ງຄ້າຍຢູ່ຊົ່ວ
ຄາວ ຮຽກຮ້ອງໃຫ້ປະທານາທິບໍດີ Saleh ລາອອກຈາກຕໍາແໜ່ງນັ້ນ.
ການປະທະກັນໄດ້ມີຂຶ້ນນຶ່ງມື້ຫລັງຈາກພວກທະຫານນິຍົມທ່ານ Saleh ຍິງປະຊາຊົນຕາຍ
ຢ່າງໜ້ອຍ 31 ຄົນໃນນະຄອນຫລວງ Sana’a.
ກໍາລັງຂອງລັດຖະບານໄດ້ສັງຫານປະຊາຊົນຢ່າງໜ້ອຍ 59 ຄົນແລະບາດເຈັບຕື່ມອີກ 650
ຄົນ ນັບແຕ່ວັນອາທິດຜ່ານມານີ້ ເວລາພວກກໍາລັງທີ່ຈົງຮັກພັກດີຕໍ່ລັດຖະບານເປີດສາກຍິງ
ໃສ່ພວກປະທ້ວງນິຍົມ ປະຊາທິປະໄຕຫລາຍໝື່ນຄົນນັ້ນ.
ທີ່ເມືອງ Taiz ໃນພາກໃຕ້ຂອງເຢເມນ ມີປະຊາຊົນອີກ 4 ຄົນເສຍຊີວິດແລະໄດ້ຮັບບາດ
ເຈັບຕື່ມອີກ 40 ຄົນໃນການປະທະກັນໃນວັນຈັນວານນີ້.
ການປາບປາມພວກປະທ້ວງຢ່າງນອງເລືອດໄດ້ກໍ່ໃຫ້ເກີດການຍິງຕໍ່ສູ້ກັນຢ່າງດຸເດືອດລະ
ຫວ່າງພວກທະຫານທີ່ນິຍົມທ່ານ Saleh ແລະພວກກໍາລັງທີ່ຈົງຮັກພັກດີຕໍ່ນາຍພົນ
Ali Mohsen al-Ahmar ທີ່ ໂຕນໜີຈາກຝ່າຍລັດຖະບານໄປເຂົ້າຮ່ວມກັບຝ່າຍຄ້ານ
ເມື່ອຫລາຍເດືອນຜ່ານມານັ້ນ. ນັບແຕ່ນັ້ນມາ ນະຄອນ Sana’a ໄດ້ຖືກແບ່ງແຍກກັນ
ລະຫວ່າງພວກທະຫານທີ່ນິຍົມນາຍພົນ Ahmar ທີ່ໂຕນໜີ ແລະພວກກໍາລັງທີ່ຈົງຮັກພັກ
ດີຕໍ່ທ່ານ Saleh ນັ້ນ.
ທ່ານພັນກິມູນ ເລຂາທິການໃຫຍ່ສະຫະປະຊາຊາດໄດ້ປະນາມຢ່າງແຂງແຮງຕໍ່ການໃຊ້ກໍາ
ລັງເກີນຂອບເຂດໂດຍກໍາລັງຮັກສາຄວາມປອດໄພຂອງຝ່າຍລັດຖະບານ ແລະທ່ານໄດ້
ຮຽກຮ້ອງໃຫ້ໃຊ້ຄວາມຍັບຍັ້ງ.