ເຈົ້າໜ້າທີ່ເຢເມນກ່າວວ່າ ກໍາລັງທະຫານຂອງລັດຖະບານຍຶດໄດ້ທີ່ໝັ້ນສອງແຫ່ງຂອງ
ກຸ່ມອາລຄາອີດາຢູ່ໃນພາກໃຕ້ຂອງປະເທດ ຫຼັງຈາກການບຸກໂຈມຕີເປັນເວລາເດືອນ
ນຶ່ງຕໍ່ກຸ່ມຫົວຮຸນແຮງນີ້ ຊຶ່ງໄດ້ເຂົ້າຍຶດຄອງພື້ນທີ່ດັ່ງກ່າວໄດ້ເມື່ອນຶ່ງປີກວ່າໆຜ່ານມານັ້ນ.
ເຈົ້າໜ້າທີ່ກ່າວເມື່ອວັນອັງຄານວານນີ້ວ່າ ກອງທັບເຢເມນ ແລະບັນດາພັນທະມິດຊົນ
ເຜົ່າຂອງພວກເຂົາເຈົ້າ ໄດ້ຍຶດຄອງໂດຍເຕັມ ເມືອງ Zanjibar ເມືອງຫຼວງຂອງແຂວງ
Abyan ແລະເມືອງ Jaar ທີ່ຕັ້ງຫ່າງ ອອກໄປທາງທິດເໜືອນັ້ນ. ພວກເຂົາເຈົ້າກ່າວອີກວ່າ
ກໍາລັງທະຫານຂອງລັດຖະບານຍັງໄດ້ເປີດທາງຫຼວງສາຍສຳຄັນຄືນໃໝ່ທີ່ເນັ່ງຈາກແຂວງ
Abyan ໄປຫາເມືອງທ່າເຮືອ Aden ທາງພາກໃຕ້ຂອງປະເທດ.
ເຈົ້າໜ້າທີ່ເຢເມນເວົ້າວ່າ ກໍາລັງທະຫານໄດ້ຂັບລົດບຸກເຂົ້າໄປໃນເມືອງ Jaar ເມື່ອຕອນ
ເຊົ້າວັນອັງຄານ ຫຼັງຈາກການສູ້ລົບກັນບັ້ນນຶ່ງ ທີ່ໄດ້ສັງ ຫານພວກຫົວຮຸນແຮງ 20 ຄົນ
ແລະທະຫານອີກສີ່ຄົນ. ພວກຊາວເມືອງພາກັນສະຫຼອງການມາເຖິງເມືອງດັ່ງກ່າວຂອງ
ທະຫານໂດຍການຍິງປືນຂຶ້ນຟ້າ. ໃນບໍ່ເທົ່າໃດຊົ່ວໂມງຕໍ່ມາ ເຈົ້າໜ້າທີ່ກ່າວວ່າ ກໍາລັງ
ທະຫານສາມາດກໍເຂົ້າຍຶດເອົາເມືອງ Zinjibar ຄືນໄດ້ໂດຍສົມບູນ.
ກຸ່ມຫົວຮຸນແຮງອາລຄາອີດາ ໄດ້ຍຶດເອົາເຂດຕ່າງໆຂອງແຂວງ Abyan ເມື່ອປີຜ່ານມາ
ໃນຂະນະທີ່ລັດຖະບານກຳລັງສົນລະວົນຢູ່ນຳການຮັບມືກັບ ການລຸກຮືເພື່ອປະຊາທິ
ປະໄຕຕໍ່ຕ້ານປະທານາທິບໍດີ Ali Abdullah Saleh ໃນເວລານັ້ນ. ທ່ານ Abed Rabbo
Mansour Hadi ຜູ້ສືບຕໍ່າແໜ່ງແທນທ່ານ Saleh ໄດ້ສົ່ງກໍາລັງທະຫານທີ່ໜຸນຫຼັງໂດຍ
ສະຫະ ລັດນັ້ນ ເຂົ້າບຸກໂຈມຕີຍຶດເອົາເຂດເຫຼົ່ານັ້ນຄືນໄດ້ ໃນເດືອນຜ່ານມາ.