ບັນດາເຈົ້າໜ້າທີ່ເຢເມັນກ່າວວ່າ ພວກຊົນເຜົ່າທີ່ຕໍ່ຕ້ານລັດຖະບານ ໄດ້ທໍາການໂຈມຕີ
ກອງທະຫານທີ່ຈົ່ງຮັກພັກດີຕໍ່ປະທານາທິບໍດີ Ali Abdullah Saleh ໂດຍໄດ້ສັງຫານ
ຜູ້ບັນຊາການແລະຈັບທະຫານໄປ 30 ຄົນ.
ກະຊວງປ້ອງກັນປະເທດກ່າວໃນຄໍາຖະແຫລງສະບັບນຶ່ງວ່າ ການໂຈມຕີໃນວັນຈັນມື້ນີ້
ຕໍ່ຖານທັບແຫ່ງນຶ່ງຢູ່ທາງທິດເໜືອຂອງນະຄອນຫລວງຊານານັ້ນ ໄດ້ສັງຫານທ່ານ
Ali el-Kaleibi ຜູ້ບັນຊາການຄົນນຶ່ງຂອງໜ່ວຍພິທັກສາທາລະນະລັດ ຫົວກະທິນັ້ນ
ແລະພວກຊົນເຜົ່າ 4 ຄົນ ຖືກຂ້າຕາຍໃນການຕໍ່ສູ້ກັນ.
ໃນວັນອາທິດວານນີ້ ປະທານາທິບໍດີ ຊາເລ ກ່າວວ່າ ທ່ານຢາກໃຫ້ມີການໂອນອໍານາດ
ຢ່າງສັນຕິ ໂດຍຜ່ານການເລືອກຕັ້ງ.
ທ່ານ ຊາເລ ກ່າວໃນການຖະແຫຼງອອກທາງໂທລະພາບໃນວັນອາທິດວານນີ້ວ່າ ທ່ານ
ມີຄວາມໝາຍໝັ້ນທີ່ຈະຈັດຕັ້ງປະຕິບັດແຜນການລິເລິ່ມກ່ຽວກັບການມອບໂອນອໍານາດ
ທີ່ສະພາຮ່ວມມືເຂດອ່າວເປີເຊຍ ຫລື GCC ໄດ້ຮ່າງຂຶ້ນນັ້ນ ແຕ່ບໍ່ໄດ້ໃຫ້ຄໍາໝັ້ນສັນຍາ
ວ່າທ່ານຈະລົງຈາກຕໍາແໜ່ງ. ແຜນການຂອງ GCC ທີ່ໄດ້ຄ້າງຄາມາເປັນເວລານານນັ້ນ
ກໍານົດໃຫ້ປະທານາທິບໍດີ Saleh ມອບອໍານາດ ໃຫ້ຜູ້ຮອງຂອງທ່ານ.
ການປະກົດຕົວທາງໂທລະພາບໃນມື້ວານນີ້ ແມ່ນເປັນຄັ້ງທໍາອິດຂອງທ່ານຊາເລ ນັບຕັ້ງ
ແຕ່ທ່ານໄດ້ກັບຄືນສູ່ເມືອງຫຼວງຊານາ ໃນວັນສຸກແລ້ວນີ້ ຫຼັງຈາກທີ່ໄດ້ໄປພັກຟື້ນຢູ່ໃນ
ປະເທດເພື່ອນບ້ານ Saudi Arabia ເປັນເວລາ 3 ເດືອນ ຈາກການພະຍາຍາມລອບ
ສັງຫານທ່ານເມື່ອເດືອນມີຖຸນາ.
ທ່ານຊາເລກ່າວວ່າ ການເລືອກຕັ້ງນັ້ນແມ່ນຕ້ອງຮວມເອົາການເລືອກຕັ້ງປະທານາທິບໍດີ,
ສະພາ ແລະການເລືອກຕັ້ງໃນເຂດທ້ອງຖິ່ນນໍາ. ພ້ອມດຽວກັນ ທ່ານໄດ້ກ່າວຕິຕຽນ
ພວກຄັດຄ້ານທ່ານວ່າ ຊຸກຍູ້ໃຫ້ມີກໍ່ຄວາມປັ່ນປ່ວນວຸ້ນວາຍ. ທ່ານຍັງເວົ້າອີກວ່າ ກົດ
ໝາຍບ້ານເມືອງແມ່ນອະນຸຍາດໃຫ້ມີການປະທ້ວງແບບສັນຕິ, ແຕ່ບໍ່ອະນຸຍາດໃຫ້ມີ
ການປຸ້ນຈີ້ ລັກຂະໂມຍ ແລະທໍາລາຍລ້າງຜານຊັບສິນຂອງປະເທດ.
ທາງກະສັດ Abdullah ແຫ່ງ Saudi Arabia ນັ້ນ ໄດ້ຊົງກ່າວວ່າ ແຜນການລິ່ເລີ້ມ
ຂອງສະພາຮ່ວມມືເຂດອ່າວເປີເຊຍ ແມ່ນວີິທີດຽວທີ່ຈະແກ້ໄຂວິກິດການນີ້ໄດ້ ແລະພະ
ອົງຊົງຮຽກຮ້ອງໃຫ້ທຸກພັກຝ່າຍໃນເຢເມັນ ຈົ່ງຍັບຍັ້ງຊັ່ງ ໃຈເພື່ອປ້ອງກັນບໍ່ໃຫ້ມີການ
ກໍ່ຄວາມຮຸນແຮງ ແລະເຂັ່ນຂ້າກັນຕື່ມອີກ.
