ບັນດາເຈົ້າໜ້າທີ່ເຢເມນກ່າວວ່າ ຢ່າງໜ້ອຍປະຊາຊົນ 37
ຄົນເສຍຊີວິດໃນການສູ້ຣົບກັນຢ່າງໜັກໃນມື້ຄືນນີ້ໃນນະ
ຄອນຫລວງ Sana’a.
ການສູ້ລົບກັນໄດ້ດໍາເນີນໄປໃນຫລາຍເຂດ ໃນຂະນະທີ່ການ
ຢຸດຍິງທີ່ບໍ່ໝັ້ນຄົງ ປະກາດອອກມາໃຫ້ຊາບໃນວັນສຸກຜ່ານ
ມາໄດ້ພັງທະລາຍລົງນັ້ນ. ການສູ້ລົບກັນໃນນະຄອນຫລວງ
Sana’a ໄດ້ລະເບີດຂຶ້ນໃນເຊົ້າວັນອັງຄານວານນີ້ ຊຶ່ງສ່ວນ
ນຶ່ງຂອງກອງທັບທີ່ແຍກໂຕອອກຈາກຝ່າຍລັດຖະບານມາຈົງ
ຮັກພັກດີຕໍ່ Sheikh Sadeq al-Ahmar ທໍາການໂຈມຕີ
ຕຶກອາຄານຂອງລັດຖະບານຈໍານວນນຶ່ງ.
ພວກຊົນເຜົ່າຝ່າຍຄ້ານກ່າວວ່າ ເຂົາເຈົ້າໄດ້ເຂົ້າຄວບຄຸມກະຊວງພາຍໃນແລະສໍານັກງານໃຫຍ່ຂອງພັກລັດຖະບານປະທານາທິບໍດີ Ali Abdullah Saleh ທີ່ພວມປົກຄອງປະເທດໃນປັດຈຸບັນ ແຕ່ທາງລັດຖະບານປະຕິເສດຕໍ່ການກ່າວອ້າງຂອງພວກຝ່າຍຄ້ານທີ່ວ່າຕົນໄດ້ ເຂົ້າຄວບຄຸມສະຖານທີ່ດັ່ງກ່າວ.
ໃນຂະນະດຽວກັນ ການສູ້ລົບກັນຍັງດໍາເນີນສືບຕໍ່ມາໃນ 2 ຫົວເມືອງໃນພາກໃຕ້ຂອງປະເທດໃນວັນອັງຄານວານນີ້. ບັນດາເຈົ້າໜ້າທີ່ກ່າວວ່າ ພວກນັກຕໍ່ສູ້ຫົວຮຸນແຮງໄດ້ສັງຫານພວກທະຫານຂອງຝ່າຍລັດຖະບານຢ່າງໜ້ອຍ 5 ຄົນໃນການດັກສະກັດໂຈມຕີຢູ່ນອກເມືອງ Zinjibar ໃນພາກໃຕ້ຂອງປະເທດ ທີ່ພວກນັກຕໍ່ສູ້ມຸສລິມຫລາຍຮ້ອຍຄົນຍຶດເອົາ ໃນວັນອາທິດຜ່ານມານີ້.
ໃນເມືອງ Taiz ທີ່ຕົກຢູ່ໃນສະພາບຫຼໍ່ແຫຼມ ໃນພາກໃຕ້ຂອງປະເທດເຊ່ນກັນນັ້ນ ພວກກໍາລັງຮັກສາຄວາມປອດໄພໄດ້ຍິງປືນໃສ່ພວກປະທ້ວງຕໍ່ຕ້ານລັດຖະບານເຮັດໃຫ້ພວກປະທ້ວງ 4 ຄົນເສຍຊີວິດ. ມີປະຊາຊົນຢ່າງໜ້ອຍ 25 ຄົນແລ້ວໄດ້ເສຍຊີວິດໄປໃນຄວາມວຸ້ນວາຍທີ່ເກີດຂຶ້ນໃນເມືອງ Taiz ໃນລະຍະ 3 ມື້ຜ່ານມານີ້.
