ອົງການການຄ້າໂລກ ຫຼື WTO ໄດ້ລົງຄວາມເຫັນວ່າ ສະຫະລັດ
ແມ່ນຜິດພາດທີ່ຈະເກັບພາສີເພື່ອເປັນການລົງໂທດຕໍ່ສິນຄ້າຈີນ ໃນຂອບເຂດທີ່ກວ້າງຂວາງ ໃນການຕັດສິນ ທີ່ອາດຈະເປັນຜົນ
ກະທົບໃນລະຍະຍາວ.
ຄະນະກໍາມະການ ຂອງອົງການໆຄ້າໂລກ ໄດ້ລົງຕັດສິນ ໃນວັນ
ຈັນວານນີ້ວ່າ ການເກັບພາສີຕໍ່ສິນຄ້າຈີນ ທີ່ນຳເຂົ້າມາໃນສະຫະ
ລັດ ຮວມທັງແຜ່ນຮັບແສງຕາເວັນ ເຫຼັກແລະຜະລິດຕະພັນອື່ນໆ
ນັ້ນ ແມ່ນບໍ່ສອດຄ່ອງກັບກົດລະບຽບຂອງນາໆຊາດ.
ວໍຊິງຕັນໄດ້ໂຕ້ຖຽງວ່າ ການເກັບພາສີເຫຼົ່ານີ້ແມ່ນເໝາະສົມ ເພື່ອ
ຮັບມືກັບການໃຫ້ເງິນເກື້ອກູນອຸດໜຸນ ຂອງລັດຖະບານ ແກ່ບັນດາບໍລິສັດຈີນ ຊຶ່ງຫລັງ
ຈາກນັ້ນກໍສາມາດທຸ້ມສິນຄ້າຕ່າງໆ ເຂົ້າມາໃນສະຫະລັດໃນລາຄາທີ່ຕໍ່າກວ່າຕະຫຼາດ
ຕາມທີ່ມີການກ່າວຫານັ້ນ.
ປັກກິ່ງຊຶ່ງໄດ້ຍືນຄຳຟ້ອງຮ້ອງໃນປີ 2012 ໂຕ້ຖຽງວ່າ ການເກັບພາສີດັ່ງກ່າວ ສະແດງໃຫ້
ເຫັນວ່າ ສະຫະລັດໃຫ້ການປົກປ້ອງຄຸ້ມຄອງທີ່ຜິດກົດໝາຍຕໍ່ຜູ້ຜ ລິດອາເມຣິກັນ. ຄຳຟ້ອງ
ຮ້ອງນີ້ແມ່ນກວມເອົາສິນຄ້າຈີນໃນມູນຄ່າຫຼາຍກວ່າ 7 ພັນ 2 ລ້ານໂດລາ ໃນແຕ່ລະປີ.
ຍັງບໍ່ເປັນທີ່ແຈ້ງຂາວເທື່ອວ່າ ສະຫະລັດ ຈະຂໍອຸທອນຕໍ່ການຕັດສິນດັ່ງກ່າວນີ້ຫລືບໍ່. ຜູ້ຕາງ
ໜ້າການຄ້າສະຫະລັດ ທ່ານ Mark Foreman ກ່າວວ່າ ລັດຖະ ບານ ກຳລັງ “ຊັ່ງຊາຢ່າງລະມັດລະວັງ ເບິ່ງທາງເລືອກຂອງຕົນ” ແຕ່ຈະສືບຕໍ່ ເອົາມາດຕະການແກ້ໄຂ “ຢ່າງແຮງ
ແລະມີປະສິດທິຜົນ” ຕໍ່ການໃຫ້ເງິນອຸດໜຸນ ແບບບໍ່ທ່ຽງທຳ.
ກະຊວງການຄ້າຈີນ ໄດ້ສະແດງຄວາມຍິນດີຕໍ່ການຕັດສິນ ແລະຮຽກຮ້ອງໃຫ້ ສະຫະລັດ
“ແກ້ໄຂຄວາມຜິດພາດຂອງຕົນ” ເພື່ອ “ຄໍ້າປະກັນບັນຍາກາດ ໃນການແຂ່ງຂັນທີ່ທ່ຽງທໍາ.” ແຕ່ກະຊວງການຄ້າຈີນຍັງກ່າວວ່າ ຕົນມີຄວາມເສຍໃຈທີ່ຄະນະກຳມະການໆຄ້າໂລກ ໄດ້ປະຕິເສດຕໍ່ຂໍ້ໂຕ້ຖຽງຂອງປັກກິ່ງ ຈຳນວນນຶ່ງ.
