ບັນດາມະຫາອໍານາດຂອງໂລກ ແລະມະຫາອໍານາດທ້ອງຖິ່ນ ເຕົ້າໂຮມກັນໃນວັນ
ເສົາມື້ນີ້ ເພື່ອເຂົ້າຮ່ວມກອງປະຊຸມ ທີ່ຮຽກຮ້ອງໃຫ້ມີຂຶ້ນໂດຍທູດສັນຕິພາບພິເສດ
ນາໆຊາດ ທ່ານ Kofi Annan ທີ່ຕ້ອງການ ຢາກໄດ້ການຕົກລົງກ່ຽວກັບແນວຄິດ
ໃໝ່ ເພື່ອຮັບມືກັບບັນຫາຂັດແຍ້ງໃນຊີເຣຍ.
ໃນຂະນະທີ່ທ່ານເດີນທາງໄປຮອດກອງປະຊຸມທີ່ນະຄອນເຈນີວາ ລັດຖະມົນຕີການ
ຕ່າງປະເທດອັງກິດທ່ານ Willam Hague ໄດ້ຮຽກຮ້ອງໃຫ້ຣັດເຊຍແລະ ຈີນ ຈົ່ງ
ເຫັນພ້ອມກັບບັນດາມະຫາອໍານາດຕາເວັນຕົກ ກ່ຽວກັບແຜນການໂອນ ອຳນາດ
ທາງການເມືອງໃນຊີເຣຍ ທ່ານກ່າວວ່າ ເຖິງແມ່ນວ່າ ມັນຈະບໍ່ເປັນທີ່ງ່າຍດາຍເລີຍ.
ນອກນັ້ນ ທ່ານ Hague ຍັງກ່າວວ່າ ຊີເຣຍທີ່ມີສະຖຽນລະພາບໝັ້ນຄົງໃນອະນາ
ຄົດແມ່ນໝາຍເຖິງ ປະທານາທິບໍດີ Bashar al-Assad ຕ້ອງຍອມສະຫຼະອໍານາດ.
ຣັດເຊຍ ຊຶ່ງເປັນພັນທະມິດອັນຍາວນານຂອງຊີເຣຍ ກ່າວວ່າ ການແກ້ໄຂໃດໆກໍ
ຕາມຕໍ່ວິກິດການດັ່ງກ່າວ ຕ້ອງໄດ້ຕັດສິນໃຈ ໂດຍປະຊາຊົນຊາວຊີເຣຍເອງ. ຈີນ
ແມ່ນເອົາທ່າທີທີ່ຄ້າຍຄືກັນນີ້.
ໃນວັນສຸກວານນີ້ລັດຖະມົນຕີການຕ່າງປະເທດຣັດເຊຍທ່ານ Sergei Lavrov ແລະ
ລັດຖະມົນຕີການຕ່າງປະເທດສະຫະລັດ ທ່ານນາງ Hillary Clinton ບໍ່ ສາມາດຕົກ
ລົງກັນໄດ້ ກ່ຽວກັບວ່າ ຈະຮັບມືແບບໃດກັບຄວາມຮຸນແຮງທີ່ເພີ່ມ ທະວີຂຶ້ນໃນຊີເຣຍ.
ແຕ່ທ່ານ Lavrov ໄດ້ກ່າວຫລັງຈາກກອງປະຊຸມທີ່ນະຄອນ St Petersburg ວ່າຍັງ
ມີໂອກາດຢູ່ທີ່ບັນດາມະຫາອໍານາດຂອງໂລກ ຈະສາມາດຊອກຫາຈຸດ ຢືນຮ່ວມກັນ
ກ່ຽວກັບຊີເຣຍ ຢູ່ໃນກອງປະຊຸມວັນເສົາມື້ນີ້. ທ່ານກ່າວວ່າ ທ່ານມີຄວາມຮູ້ສຶກໃນ
ການປ່ຽນແປງທ່າທີຂອງທ່ານນາງ Clinton ກ່ຽວກັບວິກິດການໃນຊີເຣຍ.
ທ່ານ Annan ໄດ້ຮຽກຮ້ອງໃຫ້ມີການສ້າງຕັ້ງລັດຖະບານສາມັກຄີຊາດ ຊຶ່ງຈະບໍ່ໃຫ້
ພວກທີ່ຈະເປັນໄພອັນຕະລາຍຕໍ່ສະຖຽນລະພາບໃນຊີເຣຍ ເຂົ້າຮ່ວມ. ແຜນຂອງທ່ານ
ບໍ່ໄດ້ເວົ້າຢ່າງຈະແຈ້ງວ່າ ປະທານາທິບໍດີ Assad ຕ້ອງສະຫຼະອໍາ ນາດຫຼືບໍ່.