ບັນດາຜູ້ນຳໂລກພາກັນສະແດງຄວາມເສົ້າສະຫລົດໃຈຕໍ່ປະຊາຊົນໄທ ໃນຂະນະທີ່ເຂົາເຈົ້າພາກັນໂສກເສົ້າກັບການສິ້ນພະຊົນຂອງ ກະສັດພູມີພົນ ອະດຸນຍະເດດ ຜູ້ທີ່ໄດ້ປົກ ຄອງປະເທດມາໄດ້ 70 ປີ.
ເລຂາທິການໃຫຍ່່ສະຫະປະຊາຊາດ ທ່ານ Ban ki-Moon ໄດ້ສະແດງຄວາມເສົ້າສະ ຫລົດໃຈຂອງທ່ານ “ຢ່າງເລິກເຊິ່ງ” ຕໍ່ພະລາດຊະວົງ, ລັດຖະບານ ແລະປະຊາຊົນໄທ ໃນວັນພະຫັດວານນີ້ເພື່ອຮັບຮູ້ຄວາມເສຍສະລະຂອງກະສັດ ແລະການເຕົ້າໂຮມປະເທດຊາດ.
ຖະແຫລງການຈາກໂຄສົກຂອງທ່ານກ່າວວ່າ “ເລຂາທິການໃຫຍ່ ຫວັງວ່າປະເທດໄທຈະສືບຕໍ່ໃຫ້ກຽດມູນເຊື້ອຂອງ ກະສັດພູມີພົນ ຕໍ່ຄວາມໝັ້ນໝາຍໃນຄຸນຄ່າທົ່ວໄປ ແລະນັບ ຖືສິດທິມະນຸດ.”
ປະທານາທິບໍດີ Barack Obama ກ່າວວ່າ ກະສັດພູມີພົນເປັນເພື່ອນທີ່ໃກ້ຊິດກັບ ສະຫະລັດ ແລະ ເປັນຄູ່ຮ່ວມທີ່ມີຄຸນຄ່າຂອງບັນດາປະທານາທິບໍດີ ສະຫະລັດ ຫຼາຍຄົນ, ຊຶ່ງທ່ານໄດ້ພົບປະກັບກະສັດ ໃນເວລາທີ່ທ່ານໄດ້ເດີນທາງໄປຢ້ຽມຢາມ ບາງກອກ ໃນປີ 2012.
ຖະແຫລງການເຜິຍແຜ່ໂດຍທຳນຽບຂາວກ່າວວ່າ “ກະສັດໄດ້ປະປ່ອຍຄຸນງາມ ຄວາມດີໄວ້ກັບປະຊາຊົນໄທ ເພື່ອຈະຮັກສາໄວ້ໃຫ້ແກ່ຄົນລຸ້ນຕໍ່ໄປ. ປະຊາຊົນອາເມຣິກັນ ແລະຂ້າພະເຈົ້າພ້ອມດ້ວຍປະຊາຊົນໄທ ໃນຂະນະທີ່ພວກເຮົາພາກັນເສົ້າສະຫລົດໃຈກັບການສິ້ນພະຊົນຂອງກະສັດ ແລະມື້ນີ້ພວກເຮົາໄດ້ຈາລຶກປະຊາຊົນໄທ ຢູ່່ໃນຫົວໃຈຂອງພວກເຮົາ ແລະຄວາມໄຫວ້ວອນ.”
ລັດຖະມົນຕີີຕ່າງປະເທດສະຫະລັດ ທ່ານ John Kerry ໄດ້ຮ່ວມກັບປະທານາທິບໍດີ Barack Obama ສະແດງຄວາມເສົ້າສະຫລົດໃຈຕໍ່ປະຊາຊົນໄທ ໂດຍກ່າວວ່າກະສັດ ຂອງເຂົາເຈົ້າ “ຈະເປັນທີ່ຊົງຈຳໄວ້ຢ່າງຍາວນານ ແລະຈະເປັນທີ່ຄິດຮອດຄິດເຖິງທີ່ສຸດ.”
ນາຍົກລັດຖະມົນຕີຍີ່ປຸ່ນ ທ່ານ Shinzo Abe ກ່າວວ່າ ທ່ານຈື່ໄດ້ວ່າ ກະສັດ“ເປັນຜູ້ມີພອນສະຫວັນ ແລະເປັນຄົນອ່ອນນ້ອມ” ທ່ານໄດ້ສະແດງຄວາມເສົ້າສະຫລົດໃຈຕໍ່ “ການສິ້ນພະຊົນຂອງພະອົງ.”
ກະສັດພູມີພົນ ຍັງເປັນທີ່ຮູ້ກັນອີກວ່າ ກະສັດຣາມາ ທີເກົ້າ ໄດ້ສີ້ນພະຊົນໃນວັນພະຫັດວານນີ້ຢູ່່ທີ່ໂຮງໝໍໃນ ບາງກອກ ຮວມພະຊົນໄດ້ 88 ພັນສາ.
