ກຳລັງຂອງລັດຖະບານຊີເຣຍແລະພວກຕໍ່ຕ້ານາ ຍັງສືບຕໍ່ປະທະກັນໃນວັນເສົາມື້ນີ້ ຢູ່ທີ່ ເມືອງ Aleppo ທີ່ຖືກປິດລ້ອມ ບ່ອນທີ່ປະຊາຊົນປະມານ 250,000 ຄົນຮວມທັງພວກ ເດັກນ້ອຍຈຳນວນນຶ່ງ ຍັງຕົກຄ້າງຢູ່ໃນເມືອງ ທີ່ມີການແຍ່ງແຍກດັ່ງກ່າວ.
ກຳລັງຂອງລັດຖະບານຊີເຣຍ ພວມທຳການເຄື່ອນໄຫວ ເຂົ້າຍຶດເອົາບາງເຂດຂອງເມືອງ Aleppo ທີ່ຄວບຄຸມໂດຍພວກຕໍ່ຕ້ານ ທີ່ໄດ້ຍິງໂຈມຕີເຂດຄວບຄຸມຂອງຝ່າຍລັດຖະບານຢູ່ໃນເມືອງດັ່ງກ່າວ. ໂຕເລກຜູ້ບາດເຈັບລົ້ມຕາຍຂອງທັງສອງຝ່າຍຍັງສືບຕໍ່ເພີ້ມທະວີຂຶ້ນ.
ອົງການອະນາໄມໂລກ ຮຽກຮ້ອງໃຫ້ຍົກຍ້າຍພວກທີ່ເຈັບປ່ວຍແລະພວກທີ່ໄດ້ຮັບບາດ ເຈັບ ອອກຈາກກ້ຳຕາເວັນອອກຂອງເມືອງ Aleppo ໃນທັນທີ.
ອົງການອະນາໄມໂລກກະປະມານວ່ ເດັກນ້ອຍແມ່ນປະກອບເປັນປະມານນຶ່ງສ່ວນສາມ ຂອງພົນລະເຮືອນທີ່ເສຍຊີວິດ ແລະບາດເຈັບຫຼາຍຮ້ອຍຄົນ ໃນຮອບສອງອາທິດທີ່ຜ່ານມານີ້.
ທ່ານ Rick Brennan ຜູ້ອຳນວຍການ ຮັບມືກັບເຫດການສຸກເສີນ ດ້ານມະນຸດສະທຳ ຂອງອົງການອະນາໄມໂລກກ່າວວ່າ “ສະຖານະການທີ່ຈິງແລ້ວແມ່ນຍັງບໍ່ສາມາດຮູ້ໄດ້ຢ່າງລະອຽດ. ອີງຕາມເຈົ້າໜ້າທີ່ການແພດທີ່ນັ້ນແລ້ວມີຜູ້ເສຍຊີວິດ 338 ຄົນໃນໄລຍະສອງສາມອາທິດທີ່ຜ່ານມານີ້ຍ້ອນການຖິ້ມລະເບີດໂຈມຕີ ຮວມທັງເດັກນ້ອຍ 106 ຄົນ. ສ່ວນອີກ 846 ຄົນ ແມ່ນໄດ້ຮັບບາດເຈັບ ອີກເທື່ອນຶ່ງ ເກືອບນຶ່ງສ່ວນສາມ ແມ່ນພວກເດັກນ້ອຍ ຄືມີເດັກນ້ອຍ 261 ຄົນ.”
ປະທານາທິບໍດີສະຫະລັດທ່ານບາຣັກ ໂອບາມາ ໄດ້ປະນາມຢ່າງແຮງຕໍ່ການໂຈມຕີທາງອາກາດຢ່າງປ່າເຖື່ອນ ຂອງຣັດເຊຍ ແລະອຳນາດການປົກຄອງຊີເຣຍ ໃສ່ພົນລະເຮືອນ ໃນກ້ຳຕາເວັນອອກຂອງເມືອງ Aleppo.
ທຳນຽບຂາວກ່າວວ່າ ທ່ານໂອບາມາ ໄດ້ໂອ້ລົມທາງໂທລະສັບ ໃນວັນພະຫັດຜ່ານມານີ້ ກັບນາຍົກລັດຖະມົນຕີເຢຍຣະມັນ ທ່ານນາງ Angela Merkel ຊຶ່ງທັງສອງທ່ານຕ່າງກໍໄດ້ເຫັນພ້ອມນຳກັນວ່າ ຣັດເຊຍ ແລະປະທານາທິບໍດີຊີເຣຍ ທ່ານ Bashar al-Assad ເປັນຜູ້ຮັບຜິດຊອບຢ່າງເປັນການສະເພາະທີ່ຈະຕ້ອງຢຸດເຊົາການໂຈມຕີແລະອະນຸຍາດໃຫ້ຈັດສົ່ງການຊ່ອຍເຫຼືອທາງດ້ານມະນຸດສະທຳເຂົ້າໄປໃນເມືອງດັງກ່າວ.
ລັດຖະມົນຕີການຕ່າງປະເທດສະຫະລັດ ທ່ານ John Kerry ກ່າວກ່ອນໜ້ານີ້ວ່າ ສະຫະ ລັດເກືອບຈະຢຸດເຊົາການເຈລະຈາທາງດ້ານການທູດກັບຣັດເຊຍຍ້ອນມົສກູຍັງສືບຕໍ່ຖິ້ມ ລະເບີດໃສ່ພວກຕໍ່ຕ້ານ ໃນກ້ຳຕາເວັນອອກຂອງເມືອງ Aleppo.
ກຸ່ມສັງເກດການກ່າວໃນວັນສຸກວານນີ້ວ່າ ການໂຈມຕີທາງອາກາດຂອງຣັດເຊຍ ໃນທົ່ວປະເທດຊີເຣຍໃນຮອບປີທີ່ຜ່ານມາ ໄດ້ສັງຫານຫລາຍກວ່າ 9,000 ຄົນ ຮວມທັງພົນລະເຮືອນຈຳນວນນຶ່ງ. ກຸ່ມສິ້ງຊອມສິດທິມະນຸດໃນຊີເຣຍ ທີ່ມີສຳນັກງານຢູ່ອັງກິດ ກ່າວວ່າ ນອກນັ້ນຍັງມີພົນລະເຮືອນອີກຈຳນວນຫຼວງຫຼາຍໄດ້ຮັບບາດເຈັບຈາກການໂຈມຕີທາງອາກາດຂອງຣັດເຊຍ.
