ບັນດາລັດຖະມົນຕີການເງິນຈາກ 20 ປະເທດທີ່ມີເສດຖະກິດໃຫຍ່ທີ່ສຸດໃນໂລກພວມເຈ
ລະຈາຫາລືກັນເປັນມື້ທີສອງໃນວັນສຸກມື້ນີ້ ທີ່ກຸງວໍຊິງຕັນ ໂດຍມີທ່າທາງວ່າວິກິດການໜີ້
ສິນຂອງຢູໂຣບ ຈະເປັນຫົວຂໍ້ຄອບງຳການສົນທະນາຫາລືດັ່ງກ່າວ.
ອົງການກອງທືນສາກົນ ຫຼື IMF ກໍາລັງຊອກຫາເງິນຕື່ມອີກ 400 ພັນລ້ານໂດລາຈາກ
ບັນດດາປະເທດສະມາຊິກເພື່ອເສີມຂະຫຍາຍຄວາມສາມາດໃນການປ້ອງກັນເສດຖະກິດ
ຂອງໂລກຈາກວິກິດການໜີ້ສີນໃນເຂດໃຊ້ເງິນຢູໂຣ.
ອົງການ IMF ໄດ້ຮັບເງິນຈໍານວນ 320 ພັນລ້ານໂດລາເປັນທີ່ຮຽບຮ້ອຍແລ້ວຈາກການ
ໃຫ້ຄຳໝັ້ນສັນຍາຂອງປະເທດຕ່າງໆແລະລັດຖະມົນຕີການເງິນຍີ່ປຸ່ນທ່ານ Jun Azumi
ໄດ້ກ່າວຕໍ່ບັນດານັກຂ່າວ ໃນວັນພະຫັດວານນີ້ວ່າ ມັນເປັນໄປໄດ້ສູງ ທີ່ອົງການດັ່ງກ່າວ
ຈະບັນລຸເປົ້າໝາຍທີ່ໄດ້ວາງໄວ້.
ຜູ້ອໍານວຍການບໍລິຫານຂອງອົງການ IMF ທ່ານນາງ Christine Lagarde ໃຫ້ການ
ຢືນຢັນກ່ຽວກັບຄຳຖະແຫຼງຂອງທ່ານ Azumi ໂດຍກ່າວວ່າ ທ່ານນາງຫວັງວ່າ ຈະໄດ້
ຮັບການໃຫ້ຄຳໝັ້ນສັນຍາເພີ້ມເຕີມອີກຈາກສະມາຊິກ 188 ປະເທດຂອງອົງການ IMF
ໃນບໍ່ເທົ່າໃດມື້ຕໍ່ໜ້ານີ້.
ແຕ່ມາຮອດປັດຈຸບັນນີ້ ຍັງບໍ່ທັນມີການໃຫ້ຄຳໝັ້ນສັນຍາ ຈາກປະເທດທີ່ຖືຮຸ້ນລາຍໃຫຍ່
ທີ່ສຸດຂອງອົງການ IMF ນັ້ນກໍຄືສະຫະລັດ. ວໍຊິງຕັນໄດ້ແຍກເງິນກ້ອນນຶ່ງມູນຄ່າ 171
ພັນລ້ານໂດລາໄວ້ ເພື່ອໃຫ້ການກູ້ຢືມແກ່ກອງທຶນແຕ່ຍັງບໍ່ທັນໃຫ້ສັດຕະຍາບັນຕໍ່ຄວາມ
ໝາຍໝັ້ນສຳຫຼັບ ປີ 2010 ທີ່ຈະເພີ້ມຂຶ້ນກອງທຶນຂຶ້ນ 60 ພັນລ້ານໂດລາແລະຂໍ້ຕົກລົງ
ດັ່ງກ່າວບໍ່ມີທ່າທາງວ່າ ຈະມີຂື້ນໃນປີການເລືອກຕັ້ງນີ້.
ທ່ານນາງ Lagarde ກ່າວວ່າ ສະຫະລັດ ໄດ້ເລີ້ມຟື້ນໂຕຄືນຈາກສະ ພາບເສດຖະກິດ
ທີ່ຊ້າລົງຂອງໂລກ ແລະເຕືອນກ່ຽວກັບໄພຂົ່ມຂູ່ໃໝ່ຕໍ່ເສດຖະກິດໂລກ ທີ່ອາດຈະສ້າງບັນ
ຫາໃຫ້ແກ່ເສດຖະກິດຂອງສະຫະລັດນັ້ນ.
ທານນາງກ່າວວ່າ ຄວາມສ່ຽງຕ່າງໆແມ່ນຮວມທັງອັດຕາການຫວ່າງງານສູງ ຢູ່ໃນທົ່ວ
ໂລກ ຄວາມເຄັ່ງຕຶງດ້ານເສດຖະກິດຮອບໃໝ່ ຢູ່ໃນໂຣບສຳລັບບັນດາປະເທດທີ່ຍັງມີ
ໜີ້ສີນຢ່າງໜັກອື່ນໆແລະການແກ່ຍາວການເຕີບໂຕຂອງເສດຖະກິດແບບຊັກຊ້າ.