ຄວາມຢ້ານກົວທີ່ວ່າກຣິສຈະບໍ່ສາມາດຮັບມືກັບເງື່ອນໄຂຂອງເງິນກູ້ຢືມທີ່ຕົນໄດ້ຕົກລົງຮັບເອົາໃນປີແລ້ວນີ້ ໄດ້ເຮັດໃຫ້ລາຄາຮຸ້ນໃນຕະຫຼາດໂລກ ຕົກຮວບລົງແລະສົ່ງຜົນໃຫ້ເງິນຢູໂຣຕົກລາຄາຢ່າງຫລວງຫລາຍ.
ລາຄາຮຸ້ນໃນຕະຫຼາດເອເຊຍຕົກລົງຢ່າງຫລວງຫລາຍ ຄືດັດຊະນີຮຸ້ນທີ່ ສໍາຄັນໃນຮອງກົງ ຕົກລາຄາຫລາຍກວ່າ 4 ເປີເຊັນ ແລະລາຄາຮຸ້ນໃນຢູໂຣບກໍໄດ້ລົດລົງເວລາຕະຫຼາດໄຂຂຶ້ນ ແລະສືບຕໍ່ລົດລົງ ປະມານ 4 ເປີເຊັນ ສໍາລັບຮຸ້ນສ່ວນໃຫຍ່.
ຮຸ້ນຂອງທະນາຄານແມ່ນໄດ້ຮັບຄວາມເສຍໜັກເປັນພິເສດ ຈາກຄວາມ ສາມາດເປັນໄປໄດ້ສູງທີ່ວ່າ ກຣິສຈະບໍ່ສາມາດໃຊ້ໜີ້ກູ້ຢືມຂອງຕົນໄດ້ ເນື່ອງຈາກພວກນັກລົງທຶນຢ້ານວ່າພວກອົງການໃຫ້ຄະແນນສິນເຊື່ອອາດສາມາດລົດຄະແນນສິນເຊື່ອຂອງທະນາຄານລົງໄດ້ ຍ້ອນເງິນກູ້ຢືມທີ່ໃຫ້ແກ່ປະເທດກຣິສນັ້ນ. ບັນດາເຈົ້າໜ້າທີ່ລັດຖະບານເຢຍຣະມັນໂດຍສະເພາະ ແມ່ນໄດ້ປະຊຸມກັນມາຢ່າງຕໍ່ເນື່ອງ ເພື່ອຮ່າງແຜນການສໍາລັບຄໍ້າປະກັນພາກສ່ວນການທະນາຄານຂອງຕົນ ໃນກໍລະນີທີ່ປະເທດກຣິສ ລົ້ມລະລາຍລົງນັ້ນ.
ຮ່ອງຮອຍຕ່າງໆທີ່ສະແດງວ່າພວກວາງນະໂຍບາຍໃນຢູໄຣບມີຄວາມ ແຕກແຍກກັນກ່ຽວກັບວິທີການຮັບມືກັບບັນຫາຫຍຸ້ງຍາກທາງດ້ານການເງິນຂອງກຣິສນີ້ ໄດ້ເຮັດໃຫ້ຄ່າຂອງເງິນຢູໂຣ ລົດລົງຕໍ່າສຸດໃນຮອບ 7 ເດືອນຜ່ານມາ ໃນການແລກປ່ຽນກັບເງິນໂດລາສະຫະລັດໃນວັນຈັນມື້ນີ້.
ລະຄານໍ້າມັນກໍໄດ້ລົດລົງຫລາຍກວ່າ 2 ໂດລາຕໍ່ຖັງ ຍ້ອນຄວາມເປັນຫ່ວງກ່ຽວກັບວິກິດການໜີ້ສິນຂອງຢູໂຣບ ແລະການເຕີບໂຕຊ້າຂອງເສດຖະກິດໂລກໃນເວລານີ້.
