ການແຂ່ງຂັນເຕະບານໂລກເລີ້ມຂຶ້ນອີກໃນວັນສຸກມື້ນີ້ ນຶ່ງມື້ຫລັງ ຈາກໄດ້ເກີດໂສກນາດຕະກຳ ຢູ່ທີ່ຫົວເມືອງນຶ່ງ ຊຶ່ງເປັນເຈົ້າພາບ
ຈັດການແຂ່ງຂັນ ເຮັດໃຫ້ມີຜູ້ເສຍຊີວິດໄປ 2 ຄົນ.
ທີມມະຫາອຳນາດຈາກຢູໂຣບ ຄື ຝຣັ່ງ ຈະສູ້ກັບ ເຢຍຣະມັນ ໃນ
ການແຂ່ງຂັນຮອບ 8 ທີມ.
ຝຣັ່ງ ເຄີຍຊະນະເຢຍຣະມັນ ມາແລ້ວ 4 ເທື່ອ ໃນການແຂ່ງຂັນ 6
ເທື່ອທີ່ຜ່ານມາແຕ່ເທື່ອຫຼ້າສຸດແມ່ນຊະນະຕຳແໜ່ງແຊ້ມເຕະບານ
ໂລກ ໃນປີ 1998.
ເຢຍຣະມັນບໍ່ໄດ້ຄອງຕຳແໜ່ງແຊ້ມເຕະບານໂລກ ມາຕັ້ງແຕ່ປີ 1990 ເວລາອະດີດເຢຍຣະ ມັນຕາເວັນຕົກ ໄດ້ຄວ້າເອົາຕຳແໜ່ງດັ່ງກ່າວ ໄປຄອງ.
ການແຂ່ງຂັນອີກຄູ່ນຶ່ງ ໃນຮອບ 8 ທີມ ໃນວັນສຸກມື້ນີ້ ແມ່ນລະຫວ່າງບຣາຊີລ ທີ່ເປັນແຊ້ມ 5 ສະໄໝ ກັບໂຄລອມເບຍ ຊຶ່ງບໍ່ເຄີຍໄດ້ຄອງຕຳແໜ່ງ ແຊ້ມເຕະບານໂລກມາກ່ອນ ແລະເຂົ້າແຂ່ງ ຂັນໃນຮອບ 8 ທີມ ເປັນເທື່ອທຳອິດ.
ການແຂ່ງຂັນເຕະບານໂລກໃນວັນສຸກມື້ນີ້ມີຂຶ້ນນຶ່ງມື້ຫລັງຈາກມີຜູ້ເສຍຊີວິດຢ່າງໜ້ອຍ 2 ຄົນ ແລະບາດເຈັບອີກ 19 ຄົນ ເວລາຂົວຂ້າມທາງ ທີ່ສ້າງບໍ່ທັນແລ້ວ ພັງລົງມາ ທັບຖະໜົນສາຍ ນຶ່ງທີ່ເມືອງ Belo Horizonte.
ເຈົ້າໜ້າທີ່ເວົ້າວ່າ ມີລົດຫຼາຍໆຄັນໄດ້ຖືກຂົວທີ່ພັງລົງມານັ້ນທັບ.
Belo Horizonte ແມ່ນເມືອງນຶ່ງ ທີ່ເປັນເຈົ້າພາບຈັດການແຂ່ງຂັນເຕະບານໂລກ ແລະຈະ ເປັນບ່ອນ ຈັດການແຂ່ງຂັນຮອບ 4 ທີມ ຫຼືຮອບຮອງຊະນະເລີດ ໃນວັນອັງຄານ ຈະມານີ້.
ສ່ວນອີກ 2 ຄູ່ ຈະແຂ່ງກັນໃນວັນເສົາມື້ອື່ນ ຄືອາເຈັນຕີນາ ຈະສູ້ກັບແບລຢ້ຽມ ທີ່ນະຄອນ Brasilia ແລະເນເທີແລນ ຈະສູ້ກັບຄອສຕາຣິກ້າ ຢູ່ທີ່ເມືອງ Salvador. ການແຂ່ງຂັນຊິງ ຕຳແໜ່ງແຊ້ມເຕະບານໂລກ ຈະມີຂຶ້ນໃນວັນທີ 13 ທີ່ນະຄອນ Rio de Janairo.
