ການແຂ່ງຂັນ ເຕະບານໂລກ ປີ 2010 ຮອບຊິງຊະນະ ເລີດ ທີ່ອາຟຣິກາໃຕ້ ໃນມື້ວັນອາທິດ ຈະມານີ້ ຈະເປັນການ ປະຊັນກັນ ລະຫວ່າງ ທີມສະເປນ ແລະເນເທີແລນ ເພື່ອຍາດເອົາຕຳແໜ່ງ ແຊັມເຕະບານ ນາໆຊາດ ເປັນເທື່ອທຳອິດ.
ການແຂ່ງຂັນ ເຕະບານໂລກ ຮອບຊິງແຊັມ ຈະມີຂຶ້ນ ທີ່ສະໜາມກິລາ SOCCER CITY ໃນນະຄອນ JOHANNESBURG ເພື່ອມ້ວນທ້າຍ ການແຂ່ງຂັນ ເຕະບານໂລກ ທີ່ອາຟຣິກາໃຕ້. ໃນການແຂ່ງຂັນກັນ 8 ຄັ້ງກ່ອນໜ້ານີ້ ເນເທີແລນ ໄດ້ຊະນະສະເປນ 4 ເທື່ອ ແລະຈາວກັນ ເທື່ອນຶ່ງ.
ເຢຍຣະມັນ ແລະອະດີດແຊັມ ເຕະບານໂລກ ສອງສະໄໝ ອູຣຸໄກວ ຈະລົງແຂ່ງຂັນ ເອົາທີ 3 ໃນມື້ວັນເສົາ ຈະມາ ທີ່ສະໜາມກິລາ ເມືອງ PORT ELIZABETH.
ສະເປນ ໄດ້ຊະນະ ເຢຍຣະມັນ 1 ປະຕູຕໍ່ 0 ໃນການແຂ່ງຂັນ ຮອບຮອງຊະນະເລີດ ທີ່ສະໜາມກິລາ ເມືອງ DURBAN ໃນວັນພຸດວານນີ້ ຂະນະທີ່ເນເທີແລນ ຊະນະອູຣຸໄກວ 3 ປະຕູຕໍ່ 2 ໃນການແຂ່ງຂັນ ທີ່ນະຄອນ CAPE TOWN ໃນມື້ວັນອັງຄານ ຜ່ານມາ.
