ທະນາຄານໂລກ ຫຼື World Bank ປັບຂຶ້ນຄາດການອັດຕາການຂະຫຍາຍໂຕ ທາງເສດຖະກິດຂອງຈີນ ໃນປີນີ້ ແລະປີໜ້າ ແຕ່ເຕືອນວ່າ ຄວາມເຊື່ອໝັ້ນ ພາກທຸລະກິດ ແລະພາກຄົວເຮືອນທີ່ຍັງອ່ອນໂຕ ແລະທຸລະກິດອະສັງຫາລິມະ ຊັບທີ່ຍັງທົດຖອຍຢູ່ ອາດສົ່ງແຮງກົດດັນຈີດີພີ (GDP) ໃນປີໜ້າໄດ້ ອີງຕາມ ລາຍງານຂອງອົງການຂ່າວຣອຍເຕີສ.
ຕາມຂໍ້ມູນທີ່ເປີດເຜີຍອອກມາໃນວັນພະຫັດວານນີ້ ທະນາຄານໂລກ ປັບຂຶ້ນ ການຄາດການຈີດີພີຂອງຈີນ ໃນປີ 2024 ຈາກເດີມທີ່ 4.8 ເປີເຊັນ ເປັນ 4.9 ເປີເຊັນ ພ້ອມປະເມີນວ່າ ໃນປີ 2025 ຈີດີພີຂອງປະເທດທີ່ມີຂະໜາດເສດ ຖະກິດໃຫຍ່ອັນດັບສອງຂອງໂລກນີ້ ຈະຂະຫຍາຍໂຕທີ່ 4.5 ເປີເຊັນ ເຊິ່ງຕ່ຳ ກວ່າເປົ້າໝາຍປີນີ້ ແຕ່ຍັງສູງກວ່າໂຕເລກຄາດການ ເມື່ອກ່ອນໜ້ານີ້ ທີ່ 4.1 ເປີເຊັນ.
ເສດຖະກິດຂອງຈີນ ໃນປີນີ້ ປະສົບບັນຫາພໍສົມຄວນໂດຍຫຼັກໆ ນັ້ນກໍເປັນ ຍ້ອນວິກິດການດ້ານທຸລະກິດອະສັງຫາລິມະຊັບ ແລະຄວາມຕ້ອງການໃນປະ ເທດທີ່ຖົດຖອຍ ຂະນະທີ່ຄວາມໜ້າຈະເປັນທີ່ລັດຖະບານ ສະຫະລັດ ພາຍໃຕ້ການນຳຂອງວ່າທີ ປະທານາທິບໍດີ ດໍໂນລ ທຣຳ ຈະຮຽກເກັບພາສີ ນຳເຂົ້າສຳລັບສິນຄ້າຈີນ ກໍເປັນປັດໄຈລົບອີກຂໍ້ນຶ່ງ.
ທ່ານນາງມາຣາ ວອຣວິກຄ໌ ຜູ້ອຳນວຍການສຳນັກງານທະນາຄານໂລກ ປະຈຳ ປະເທດຈີນ ກ່າວໃນຖະແຫລງການວ່າ ສິ່ງທີ່ຈຳເປັນສຳລັບຈີນ ໃນການເຮັດໃຫ້ ການຟື້ນຟູເສດຖະກິດຍືນຍົງ ກໍຄືການແກ້ບັນຫາພາກອະສັງຫາລິມະຊໍັບ ເສີມສ້າງຄວາມເຂັ້ມແຂງໃຫ້ກັບໂຄງຂ່າຍຄວາມປອດໄພທາງສັງຄົມທັງຫຼາຍ ແລະປັບປຸງພັດທະນາລະບົບການເງິນຂອງລັດຖະບານທ້ອງຖິ່ນ ພ້ອມເນັ້ນຢ້ຳ ວ່າ “ສິ່ງສຳຄັນກໍຄື ການສ້າງຄວາມສົມດຸນລະຫວ່າງການສະໜັບສະໜູນໄລຍະ ສັ້ນຕໍ່ການຂະຫຍາຍໂຕ (ທາງເສດຖະກິດ) ກັບການປະຕິຮູບໂຄງສ້າງໄລຍະ ຍາວ.”
ເມື່ອບໍ່ດົນມານີ້ ທາງການຈີນຫາກໍຕົກລົງທີ່ຈະກຽມອອກພັນທະບັດມູນຄ່າສູງສຸດ ເປັນປະຫວັດການ ທີ່ 411,000 ລ້ານໂດລາໃນປີໜ້າ ເພື່ອຊ່ອຍພິກຟື້ນກຳລັງ ການຂະຫຍາຍໂຕຂອງເສດຖະກິດ ຕາມລາຍງານຂອງຣອຍເຕີສ.
ທັງນັ້ນ ໜ້າຈະມີການປະເມີນໂຕເລກທີ່ເປັນທາງການອອກມາໃນຊ່ວງການ ປະຊຸມລັດຖະສະພາຈີນ ປະຈຳປີ ໃນເດືອນມີນາ ຂອງປີໜ້າ ຈຶ່ງເຮັດໃຫ້ມີ ຄວາມໜ້າຈະເປັນວ່າ ອາດມີການປ່ຽນແປງໃນເລື້ອງນີ້ໄດ້ຢູ່.
