ທະນາຄານໂລກໄດ້ເສີມຂະຫຍາຍອິດທິພົນຂອງຈີນ ໂດຍອະນຸມັດໃຫ້ ຈີນມີອຳນາດໃນການລົງຄະແນນສຽງຫລາຍຂຶ້ນ ຊຶ່ງກໍເທົ່າກັບມີອິດທິພົນ ໃນການຊັກຈູງສະຖາບັນການພັດທະນາໂລກດັ່ງກ່າວ ທີ່ມີສະມາຊິກ 186 ປະເທດ. ທ່ານ Robert Zoellick ປະທານທະນາຄານໂລກກ່າວໃນວັນອາທິດວານນີ້ທີ່ກຸງວໍຊິງຕັນວ່າຈີນໄດ້ມີສ່ວນແບ່ງຫລາຍຂຶ້ນໃນການລົງຄະແນນສຽງ ກໍຍ້ອນການເຕີບໂຕຂອງຈີນໃນການເສດຖະກິດຂອງໂລກ. ອຳນາດການລົງມະຕິຂອງຈີນໄດ້ເພີ່ມຂຶ້ນ ຈາກ 2.7 ເປີເຊັນມາເປັນ 4.42 ເປີເຊັນ. ບັດນີ້ຈີນເປັນປະເທດສະມາຊິກ ທ່ີມີອິດທິພົນຊັກຈູງຫລາຍ ອັນດັບ 3 ຂອງທະນາຄານໂລກ ຮອງລົງມາຈາກສະຫະລັດ ແລະຍີ່ປຸ່ນ.
ຄວາມເຄື່ອນໄຫວທ່ີວ່ານີ້ ເປັນພາກສ່ວນນຶ່ງຂອງການປະຕິຮູບໃນຂອບເຂດກ້ວາງໃຫຍ່ ເພື່ອມອບອຳນາດໃນການລົງມະຕິຫລາຍຂຶ້ນໃຫ້ແກ່ພວກປະເທດພວມພັດທະນາ. ທ່ານ Zoellick ກ່າວຕໍ່ບັນດານັກຂ່າວວ່າ ທະນາຄານໂລກຮັບຮູ້ໃນຄວາມຈຳເປັນທີ່ຈະຕ້ອງເຄື່ອນຍ້າຍອອກຈາກແນວຄິດທີ່ລ້າສະໄໝທີ່ວ່າບາງປະເທດແມ່ນຈັດຢູ່ໃນກຸ່ມທີ່ເອີ້ນວ່າ ໂລກທີສາມນັ້ນ. ທ່ານ Zoellick ກ່າວວ່າ ໂລກກຳລັງເຄື່ອນໄປສູ່ການເສດຖະກິດທີ່ມີຫລາຍຂວັ້ນທີ່ກຳລັງວິວັດທະນາການໄປຢ່າງໄວ.
ນອກຈາກການເພີ່ມອຳນາດໃນການລົງມະຕິຫລາຍຂຶ້ນແກ່ພວກປະເທດ ພວມພັດທະນາແລ້ວ ພວກປະເທດສະມາຊິກທະນາຄານໂລກຍັງໄດ້ຕົກລົງເພ່ີມຊັບພະຍາກອນໃນການໃຫ້ເງິນກູ້ຢືມຂອງທະນາຄານໂລກຂຶ້ນ ເປັນຈຳນວນຫລາຍກວ່າ 86 ຕື້ດອນລ້າ ເພື່ອຮັບມືຄວາມຕ້ອງການເງິນກູ້ຢືມຢ່າງຫລວງຫລາຍຂອງປະເທດຕ່າງໆ ໃນລະຫວ່າງເກີດວິກິດການດ້ານການເງິນໂລກນັ້ນ.
