ທະນາຄານໂລກ ໄດ້ຈັດສັນເງິນທຶນໃນມູນຄ່າລວມ 68 ລ້ານ
ໂດລາເພື່ອໃຫ້ການເຊື່ອເຫຼືອລັດຖະບານ ລາວ ໃນ 3 ໂຄງການທີ່ແນໃສ່ການພັດທະນາເພື່ອຫຼຸດຜ່ອນບັນຫາຄວາມຍາກຈົນຂອງປະຊາຊົນ ລາວ.
ທ່ານນາງ ທິບພະກອນ ຈັນທະວົງສາ ລັດຖະມົນຕີຊ່ວຍວ່າການກະຊວງການເງິນ ຖະແຫຼງວ່າທະນາຄານໂລກ ໄດ້ຕົກລົງໃຫ້ການຊ່ວຍເຫຼືອແກ່ລັດຖະບານ ລາວ ຄິດເປັນມູນຄ່າລວມເຖິງ 68 ລ້ານໂດລາສຳລັບນຳໃຊ້ໃນ 3 ໂຄງການຄື ໂຄງການປັບປຸງຕາໜ່າງໄຟຟ້າເຂດນະຄອນຫຼວງວຽງຈັນ ໂຄງການພັດທະນາການຄຸ້ມຄອງບໍລິຫານໃນຂະແໜງສາທາລະນະສຸກ ແລະ ໂພສະນາການ ແລະ ໂຄງການກອງທຶນຫຼຸດຜ່ານຄວາມ ທຸກຍາກໄລຍະທີ 2.
ໂດຍສຳລັບໂຄງການປັບປຸງຕາໜ່າງໄຟຟ້າໃນເຂດນະຄອນຫຼວງ ວຽງຈັນ ນັ້ນເປັນການຊ່ວຍເຫຼືອທີ່ໃຫ້ກັບລັດວິສາຫະກິດໄຟຟ້າ ລາວ ໃນມູນຄ່າ 32.4 ລ້ານໂດລາ ພາຍໃຕ້ເປົ້າໝາຍເພື່ອການປັບປຸງລະບົບສາຍສົ່ງກະແສໄຟຟ້າໃຫ້ມີປະສິດທິພາບ ແລະ ຮັບປະກັນຄວາມແນ່ນອນໃນການສະໜອງໄຟຟ້າໃນເມືອງ ໄຊທານີໃຫ້ໄດ້ 100 ເປີເຊັນ ສ່ວນໂຄງການພັດທະນາຄຸ້ມຄອງ - ບໍລິຫານຂະແໜງສາທາລະນະສຸກ ແລະ ໂພສະນາການທີ່ໄດ້ຮັບການຊ່ວບເຫຼືອໃນມູນຄ່າ 26.4 ລ້ານໂດລານັ້ນ ກໍແນໃສ່ການປັບປຸງສຸຂະພາບຂອງແມ່ ແລະ ເດັກຜ່ານລະບົບການປະກັນສຸຂະພາບໂດຍບໍ່ເສຍຄ່າ ແລະ ໂຄງການກອງທຶນຫຼຸດຜ່ອນຄວາມທຸກຍາກກໍໄດ້ຮັບທຶນສະໜັບສະໜູນໃນມູນຄ່າ 9.2 ລ້ານໂດລາ ທັງຍັງໄດ້ຮັບທຶນສົມທົບອີກ 2.4 ລ້ານຈາກລັດຖະບານ ອອສເຕຣເລຍ ອີກດ້ວຍ.
ນອກຈາກນີ້ ທະນາຄານໂລກຍັງໄດ້ຕົກລົງຈັດສັນເງິນທຶນໃນມູນຄ່າລວມ 96 ຕື້ກີບ ຫຼື ປະມານ 12 ລ້ານໂດລາເພື່ອໃຫ້ການສະໜັບສະໜູນລັດຖະບານ ລາວ ໃນໂຄງການຕອບສະໜຶງເງິນທຶນກູ້ຢືມໃຫ້ແກ່ບັນດາວິສາຫະກິດຂະໜາດນ້ອຍ ແລະ ຂະໜາດກາງໃນທົ່ວ
ປະເທດໃນຕະຫຼອດແຜນການປະຈຳປີ 2014 ຫາ 2015 ທີ່ກຳລັງຈະສິ້ນສຸດແຜນການລົງໃນເດືອນກັນຍາ 2015 ນີ້ດ້ວຍ.
ໂດຍທີ່ຜ່ານມາ ກົມສົ່ງເສີມນັກທຸລະກິດຂະໜາດນ້ອຍ ແລະ ຂະໜາດກາງ ກໍໄດ້ໃຫ້ສິນເຊື່ອແກ່ບັນດາວິສາຫະກິດຂະໜາດນ້ອຍ ແລະ ຂະໜາດກາງໄປແລ້ວຄິດເປັນມູນຄ່າລວມ 14 ຕື້ກີບ ຊຶ່ງເປັນການປ່ອຍກູ້ຜ່ານທະນາຄານພັດທະນາ ລາວ ຈິ່ງຍັງເຫຼືອເງິນທຶນໃນມູນຄ່າ 82 ຕື້ກີບທີ່ຈະຕ້ອງໃຫ້ສິນເຊື່ອແກ່ບັນດາວິສາຫະກິດຂະໜາດນ້ອຍ ແລະ ຂະໜາດກາງທີ່ມີເງື່ອນໄຂຢ່າງຄົບຖ້ວນພາຍໃນທ້າຍເດືອນ ກັນຍາ ປີນີ້.
ແຕ່ຢ່າງໃດກໍຕາມ ກະຊວງອຸດສາຫະກຳ ແລະ ການຄ້າ ໄດ້ລາຍງານການສຳຫຼວດກ່ຽວກັບຄວາມພ້ອມໃນການແຂ່ງຂັນຂອງບັນດາວິສາຫະກິດຂະໜາດນ້ອຍ ແລະ ຂະໜາດກາງຂອງ ລາວ ວ່າມີຫຼາຍກວ່າ 37,000 ແຫ່ງທີ່ບໍ່ມີຄວາມພ້ອມຈະແຂ່ງຂັນທາງດ້ານການຕະຫຼາດພາຍຫຼັງຈາກ 10 ປະເທດສະມາຊິກຂອງ ອາຊຽນ ໄດ້ເຊື່ອມຕໍ່ເສດຖະກິດເຂົ້າດ້ວຍກັນນັບແຕ່ວັນທີ 31 ທັນວາ 2015 ເປັນຕົ້ນໄປ.
ໂດຍມີສາເຫດມາຈາກການທີ່ບັນດາວິສາຫະກິດຂະໜາດນ້ອຍ ແລະ ຂະໜາດກາງເຫຼົ່ານີ້ຍັງມີການຜະລິດສິນຄ້າທີ່ມີລະດັບຄຸນນະພາບຕ່ຳ ເນື່ອງຈາກຜູ້ຜະລິດສິນຄ້າສ່ວນໃຫຍ່ຍັງຂາດຄວາມຮູ້ຄວາມເຂົ້າໃຈ ແລະ ບໍ່ມີທັກສະໃນການຜະລິດສິນຄ້າທີ່ເປັນທີ່ຕ້ອງການຂອງຕະຫຼາດ ລວມທັງຍັງບໍ່ມີຫຼັກວິຊາການໃນການຜະລິດສິນຄ້າທີ່ໄດ້ມາດຕະຖານອີກດ້ວຍ ດັ່ງທີ່ເຈົ້າໜ້າທີ່ຂັ້ນສູງຂອງ ລາວ ໄດ້ໃຫ້ການຊີ້ແຈງວ່າ:
“ຄວາມເຂົ້າໃຈລະດັບຝີມືການອອກແຮງງານຂອງປະຊາຊົນເນາະ ຍັງຈຳນວນໜຶ່ງຍັງບໍ່ທັນຮູ້ຜະລິດສິນຄ້າ ປູກກະປູກໄປນຳໜູ່ຈັ່ງຊັ້ນລະ ຈັກໃສ່ຝຸ່ນຫຍັງ ປູກອັນໃດເປັນສິນຄ້າບໍ່ເປັນ ປູກຜັກກະບາງເທື່ອກະປູກພໍກຸ້ມກິນ ຈັ່ງຊັ້ນມາຮອດນີ້ນິ ສິ່ງທີ່ຍັງຄ້າງຄາກໍຄືມີຈຳນວນໜຶ່ງບໍ່ທັນເຂົ້າໃຈວິທີຜະລິດ ສອງມາຫຼະແມ່ນວິຊາການພວກເຮົາໄປບໍ່ທັນທົ່ວບໍ່ທັນເຖິງຫັ່ນແຫຼະ.”
ໂດຍການທີ່ຈະປ້ອງກັນບໍ່ໃຫ້ບັນຫາດັ່ງກ່າວນີ້ເກີດຂຶ້ນກໍຈຳເປັນຈະຕ້ອງໃຊ້ເງິນທຶນໃນມູນຄ່າລວມຫຼາຍກວ່າ 7,000 ຕື້ກີບ ຫຼື ປະມານ 875 ລ້ານໂດລາ ເພື່ອນຳໃຊ້ເຂົ້າໃນການຍົກລະດັບຄຸນນະພາບການຜະລິດສິນຄ້າຂອງ SME ໃນ ລາວ ໃຫ້ດີຂຶ້ນ ຫາກແຕ່ວ່າລັດຖະບານ ລາວ ກໍມີເງິນທຶນແຕ່ 96 ຕື້ກີບເທົ່ານັ້ນ.
