ບັນດານັກເຄື່ອນໄຫວແມ່ຍິງທີ່ໂດ່ງດັງຈາກທົ່ວໂລກ ມີໝາຍ
ກຳໜົດທີ່ຈະເດີນຂະບວນໃນເຂດປອດທະຫານ ທີ່ແບ່ງຂັ້ນຊາຍ
ແດນລະຫວ່າງເກົາຫຼີເໜືອ ແລະເກົາຫຼີໃຕ້ ນັ້ນ ເພື່ອຮຽກຮ້ອງໃຫ້
ມີສັນຕິພາບ ລະຫວ່າງສອງປະເທດເພື່ອນບ້ານທີ່ໄດ້ແບ່ງແຍກ
ກັນອອກຈາກ ກັນ ມາດົນກວ່າ 60 ປີ ແລ້ວນັ້ນ.
ການເດີນຂະບວນທີ່ວ່ານີ້ຈະມີຂຶ້ນໃນວັນອາທິດ ທີ 24 ພຶດສະພາ ຈະມາເຖິງນີ້ ທີ່ເປັນຂີດໝາຍຂອງວັນແມ່ຍິງສາກົນ ຫຼື International Women’s Day ເພື່ອສັນຕິພາບ ແລະການປົດອາວຸດ ຊຶ່ງໄດ້ຮັບອະນຸຍາດຈາກທັງສອງປະເທດເກົາຫຼີແລ້ວ.
ນັກເຄື່ອນໄຫວເພື່ອສິດທິສະຕີອາເມຣິກັນ ທ່ານນາງ Gloria Steinem ກໍແມ່ນໜຶ່ງໃນພວກ
ນັກເຄື່ອນໄຫວແມ່ຍິງ 30 ຄົນ ທີ່ກຳລັງເດີນທາງຈາກນະຄອນຫຼວງປັກກິ່ງ ສູ່ເກົາຫຼີເໜືອ ເພື່ອຂ້າມເຂດປອດທະຫານເຂົ້າໄປໃນເກົາຫຼີໃຕ້ ນັ້ນ.
ທ່ານນາງ Steinem ກ່າວວ່າ: “ຖ້າເຈົ້າຫາກພິຈາລະນາເບິ່ງວ່າກຳແພງ Berlin ໄດ້ພັງທະລາຍລົງມາ ແລະສະຫະພາບໂຊຫວຽດ ກໍແມ່ນຢູ່ໃນສະຖານະການທີ່ແຕກຕ່າງກັນອອກໄປ ການແບ່ງແຍກເຊື້ອຊາດຜິວພັນນັ້ນ ບໍ່ມີອີກຕໍ່ໄປແລ້ວ ນັ້ນແມ່ນສັນຍາລັກອັນສຸດທ້າຍຂອງສົງຄາມເຢັນ ຂອງສົງຄາມໂລກຄັ້ງທີ 2 ແລະສົງຄາມເຢັນ ຂ້າພະເຈົ້າໝາຍເຖິງ ອະດີດປະທານາທິບໍດີສະຫະລັດ ທ່ານ Ronald Reagan ທີ່ໄດ້ຢືນຢູ່ຂ້າງ Berlin Wall ແລະໄດ້ກ່າວວ່າ ມ້າງກຳແພງນີ້ລົງ. ພວກເຮົາກຳລັງເວົ້າວ່າ “take down this isolation.” ກໍຄື ທັບມ້າງການຢູ່ໂດດດ່ຽວນີ້ ຊະ.”
ຜູ້ທີ່ຈັດການເດີນຂະບວນທີ່ວ່ານີ້ ກ່າວວ່າ ພວກເຂົາເຈົ້າຕ້ອງທີ່ຈະຟື້ນຟູຄວາມຫວັງໃນການ ສ້າງຄວາມປອງດອງຊາດລະຫວ່າງຊາວເກົາຫຼີ. ພວກເຂົາເຈົ້າຍັງຈະຊຸກຍູ້ໃຫ້ ຂໍ້ຕົກລົງສັນ ຕິພາບຢ່າງເປັນທາງການ. ທັງສອງປະເທດ ແມ່ນບໍ່ເຄີຍໄດ້ລົງນາມໃນຂໍ້ຕົກລົງໃດໆ ໃນການສິ້ນສຸດລົງ ຂອງສົງຄາມ 3 ປີ ໃນ 1953 ນັ້ນ.
ບັນດາແມ່ຍິງເຫຼົ່ານີ້ ໄດ້ໄປຮອດເກົາຫຼີເໜືອ ໃນວັນອັງຄານວານນີ້. ພວກເຂົາເຈົ້າວາງແຜນ
ຈັດກອງປະຊຸມສຳມະນາສັນຕິພາບທີ່ນະຄອນພຽງຢາງ ແລະອີກເທື່ອໜຶ່ງທີ່ນະຄອນຫຼວງ
ໂຊລ ຫຼັງຈາກໄດ້ຍ່າງຂ້າມເຂດປອດທະຫານເຂົ້າໄປໃນເກົາຫຼີໃຕ້ແລ້ວ.
