ການເຈລະຈາ ກ່ຽວກັບໂຄງການນິວເຄລຍຂອງອີຣ່ານ ຍັງດຳ
ເນີນຕໍ່ໄປໃນວັນອັງຄານມື້ນີ້ ທີ່ປະເທດ Switzerland ໂດຍທີ່
ລັດຖະມົນຕີຕ່າງປະເທດສະຫະ ລັດ ທ່ານ John Kerry ແລະ
ລັດຖະມົນຕີຕ່າງປະເທດອີຣ່ານ ທ່ານ Mohammad Javad
Zarif ສົນທະນາຫາລືກັນ ເປັນມື້ທີສອງ.
ການພົບປະກັນ ໄດ້ມີຂຶ້ນຫລັງຈາກ ທີ່ພວກທ່ານປະຊຸມກັນ ໃນ
ວັນຈັນວານນີ້ເພື່ອຫາທາງເຮັດໃຫ້ຊ່ອງຫວ່າງແຄບລົງ ໃນການ
ບັນລຸ ຮ່າງຂອງຂໍ້ຕົກລົງ ທີ່ຈະຄໍ້າ ປະກັນວ່າໂຄງການນິວເຄລຍ
ຂອງອີຣ່ານ ມີຈຸດປະສົງໃນທາງສັນຕິ ເພື່ອເປັນການແລກປ່ຽນ
ກັບການຜ່ອນຜັນການລົງໂທດທາງດ້ານເສດຖະກິດ ທີ່ໄດ້ສ້າງ ຄວາມເສຍຫາຍຢ່າງຮ້າຍແຮງໃຫ້ແກ່ເສດຖະກິດຂອງອີຣ່ານນັ້ນ.
ເຈົ້າໜ້າທີ່ຂັ້ນສູງສະຫະລັດຄົນນຶ່ງ ກ່າວໃນວັນຈັນວານນີ້ວ່າ ຍັງບໍ່ທັນເປັນທີ່ແຈ້ງຂາວ
ເທື່ອວ່າ ທັງສອງຝ່າຍຈະສາມາດບັນລຸຮ່າງຂໍ້ຕົກລົງ ທັນກັບກຳນົດເສັ້ນຕາຍທີ່ຕັ້ງໄວ້
ໃນທ້າຍເດືອນນີ້.
ເຈົ້າໜ້າທີ່ຄົນດັ່ງກ່າວ ໄດ້ບອກພວກນັກຂ່າວ ໂດຍບໍ່ເປີດເຜີຍຊື່ວ່າ “ອີຣ່ານ ຍັງຕ້ອງການ
ເຮັດການຕັດສິນໃຈທີ່ຍາກລຳບາກ ແລະມີຄວາມຈຳເປັນຈຳນວນ ນຶ່ງ”.
ເຈົ້າໜ້າທີ່ຍັງກ່າວວ່າ ໃນການປະຊຸມກັບທ່ານ Kerry ໃນວັນຈັນວານນີ້ ຝ່າຍອີຣ່ານຍັງໄດ້
ຍົກເອົາບັນຫາຂອງໜັງສືຂຶ້ນມາໂອ້ລົມກັນ ທີ່ສະມາຊິກຂອງພັກ ຣີພັບບລີກັນ 47 ຄົນ ສົ່ງ
ໄປໃນອາທິດແລ້ວນີ້ ທີ່ເຕືອນວ່າ ການທີ່ຈະບັນລຸຂໍ້ຕົກລົງໃດໆນັ້ນ ອາດຈະຖືກຕ່າວປີ້ນ
ຫລັງຈາກປະທານາທິບໍດີ Barack Obama ພົ້ນຈາກຕຳແໜ່ງແລ້ວ.
