‘ວິນເຕີ ອາກຣ໌’ ປະກົດການຂອງຄຳຕັ້ງອະທິຖານ ຊ່ວງລະດູໜາວ ທີ່ເປັນເທຣນໃໝ່ໃນໂລກສື່ສັງຄົມ

ປີໃໝ່ ກໍເປັນໂອກາດທີ່ດີໃນການຕັ້ງເປົ້າໝາຍໃໝ່ໆ ແຕ່ງານການວິໄຈຫຼາຍຄັ້ງຊີ້ບອກວ່າ ຜູ້ຄົນສ່ວນໃຫຍ່ ບໍ່ສາມາດເຮັດຕາມຄຳອິຖານປີໃໝ່ ຫຼື New Year Resolution ຂອງຕົນເອງໄດ້ ຕັ້ງແຕ່ເດືອນທຳອິດ ອີງຕາມລາຍງານຂອງອົງການຂ່າວເອພີ.

ດ້ວຍເຫດນີ້ ຈຶ່ງເກີດເທຣນໃໝ່ໃນໂລກສື່ສັງຄົມ ຫຼື ໂຊໂຊລມີເດຍ ທີ່ເອີ້ນວ່າ ວິນເຕີອາກຣ໌ (Winter Arc) ເຊິ່ງເປັນຄວາມພະຍາຍາມປະຕິບັດຕາມຄຳອະທິຖານ ຫຼືເປົ້າໝາຍທີ່ວາງໄວ້ຕັ້ງແຕ່ກ່ອນທີ່ປີໃໝ່ຈະມາເຖິງ.

ວິນເຕີອາກຣ໌ ແມ່ນຫຍັງ?

ວິນເຕອາກຣ໌ ເປັນຄວາມທ້າທາຍໃໝ່ໃນສື່ສັງຄົມອອນໄລນ໌ ທີ່ເກີດຂຶ້ນຈາກບັນດາອິນຟລູເອນເຊີຣ໌ ຜູ້ອອກກຳລັງກາຍແລະດ້ານສຸຂະພາບ ທີ່ເນັ້ນການກຳນົດເປົ້າໝາຍ ແລະເດີນໜ້າປະຕິບັດຕາມເປົ້າໝາຍນັ້ນຢ່າງເຂັ້ມງວດ ແລະມີວິໄນໃນໄລຍະເວລາສັ້ນໆ.

ໃນສື່ອິນສຕາແກຣມ ມີການໂພສລົງ ແຄັບຊັ້ນ #winterarc ກວ່າ 400,000 ເທື່ອ ສ່ວນໃນສື່ຕິກຕ໊ອກມີໂພສກ່ຽວກັບເທຣນນີ້ ກວ່າ 600,000 ເທື່ອ.

ວິນເຕີອາກຣ໌ ສຳລັບຫຼາຍຄົນເລີ້ມຕົ້ນຕັ້ງແຕ່ເດືອນຕຸລາ ໂດຍເລີ້ມປ່ຽນໄປອອກກຳລັງກາຍໃນບ້ານຫຼືເຂົ້າສະຖານທີ່ອອກກຳລັງ ຫຼື ຈິມ ຫຼາຍຂຶ້ນ ເນື່ອງຈາກອາກາດທີ່ໜາວເຢັນ ແລະແສງແດດທີ່ສັ້ນລົງ ລະຫວ່າງວັນ ເປົ້າໝາຍກໍແມ່ນວ່າ ເພື່ອໃຫ້ທັນວັນປີໃໝ່.

ຫຼາຍຄົນພະຍາຍາມກະຕຸ້ນໃຫ້ຕົນເອງມີລະບຽບວິໄນຢ່າງເຄັ່ງຄັດ ເພື່ອໃຫ້ສຳເລັດຕາມເປົ້າໝາຍໃນໄລຍະເວລາທີ່ສັ້ນກວ່າ ເມື່ອທຽບກັບການຕັ້ງຄຳອະທິຖານປີໃໝ່ ໂດຍທົ່ວໄປທີ່ນັກນຳນົດເວລາໄວ້ຕະຫຼອດທັງປີ ຫຼືອາດບໍ່ມີກຳນົດເລີຍ.

ລໍຣາ ເກລບີ້ ອິນຟລູເອັນເຊີຣ໌ ທີ່ເອີ້ນຕົນເອງວ່າ “CEO of Glowup Series” ໂພສວີດີໂອຕົນເອງ ເວົ້າເຖິງວິນເຕີອາກຣ໌ ໂດຍນາງຕັ້ງເປົ້າວ່າ ຈະຍ່າງທຸກມື້ ຂຽນບັນທຶກແລະປະຕິບັດຕາມກິດຈະວັດດ້ານສຸຂະພາາບຢ່າງເຄັ່ງຄັດ ເຊິ່ງນາງບອກວ່າ ການກຳນົດເປົ້າໝາຍໄວ້ ແລະເຮັດຕາມຢ່າງຕໍ່ເນື່ອງຊ່ວຍໃຫ້ນາງປ່ຽນໄປໃນທາງທີ່ດີຂຶ້ນ ທັງຮ່າງກາຍແລະຈິດໃຈ.

ເກລບີ້ ແນະນຳວ່າ ເຄັດລັບຄືເຮັດໃຫ້ການອອກກຳລັງກາຍໃນເດືອນທີີ່ໜາວຈັດນີ້ “ສະດວກແລະສະບາຍ” ເພື່ອບໍ່ກົດດັນຕົນເອງເກີນໄປ ແລະສາມາດເຮັດໄດ້ຢ່າງສະໝ່ຳສະເໝີ.

ອາເລັກຊ໌ ຣອທສໄຕນ໌ ນັກຈິດຕະວິທະຍາດ້ານການອອກກຳລັງກາຍ ແຫ່ງສະຖາບັນເທັກໂນໂລຈີຂອງນິວຢອກ (New York Institute of Technology) ກ່າວວ່າ ປະເດັນສຳຄັນທີ່ສຸດຄືການຈັດສັນເວລາຢ່າງເໝາະສົມ ເພື່ອເຮັດຕາມເປົ້າໝາຍທີ່ວາງໄວ້ ໂດຍແນະນຳໃຫ້ຕັ້ງເປົ້າໝາຍທີ່ສາມາດເຮັດໄດ້ແທ້ ທີ່ສົມເຫດສົມຜົນ ແລະເໝາະສົມສຳລັບຕາຕະລາງເວລາໃນແຕ່ລະວັນຂອງເຈົ້າ ລວມທັງໃຫ້ມີຄວາມໂຍະຢານ ຫາກມື້ໃດ ບໍ່ສາມາດເຮັດຕາມຕາຕະລາງນັ້ນໄດ້.

ເອລລຽດ ເບິີກຣ໌ແມນ ສາດສະດາຈານດ້ານຈິດຕະວິທະຍາແຫ່ງ ມະຫາວິທະຍາໄລ ອໍເຣກອນ ຊີ້ວ່າ ການກຳນົດເປົ້າໝາຍໄລຍະສັ້ນແທນໄລຍະຍາວ ຢ່າງເຊັ່ນ ວິນເຕີອາກຣ໌ ນັ້ນ ອາດເປັນປະໂຫຍດໄດ້ “ເພາະສາມາດເພີ້ມໂອກາດທີ່ຈະເຮັດຕາມເປົ້າໝາຍນັ້ນ ຈົນສຳເລັດ ແລະຍັງງ່າທີຈະຮັກສາແຮງຈູງໃຈເອົາໄວ້ “ເພາະສາມາດເພີ້ມໂອກາດທີ່ຈະເຮັດຕາມ ເປົ້າໝາຍນັ້ນຈົນສຳເລັດ ແລະຍັງງ່າຍກວ່າທີ່ຈະຮັກສາແຮງຈູໃນເອົາໄວ້ ເມື່ອທຽບກັບການວາງເປົ້າໝາຍຢ່າງບໍ່ມີໄລຍະເວລາກຳນົດ ເຊິ່ງອາດຂາດແຮງຈູງໃຈ ໃນໄລຍະຍາວຈົນອາດຕ້ອງຢຸດລົງກາງຄັນ.”